2005 ވަނަ އަހަރު ރިލީޒްކުރި ކޮމެޑީ ފިލްމު "ނޯ އެންޓްރީ" ދެވަނަ ބައެއްގެ މަސައްކަތްވެސް ފަށާފައިވާކަމަށް ފިލްމުގެ ލީޑްރޯލުން ފެނުނު ސުޕަރ ސްޓާރ ސަލްމާންޚާން ބުނެފިއެވެ.
ސަލްމާންގެ 57 ވަނަ އުފަންދުވަސް ފާހަގަކުރަން ބޭއްވި ޙަފްލާއެއްގައި ވާހަކަދައްކަމުން ސަލްމާން ބުނީ އަނީސް ބަޒްމީ ޑައިރެކްޓްކޮށްފައިވާ އޮރިޖިނަލް ސުޕަރހިޓް ފިލްމުގެ ސީކުއަލްވެސް ޑައިރެކްޓްކުރާނީ އަނީސްކަމުގައެވެ.
ސަލްމާން، އަނިލް ކަޕޫރު އަދި ފަރްދީންޚާން ޓްރިޕްލް ރޯލުން މި ފަހަރުގެ ފިލްމު ފެންނައިރު ކުރީގެ ފިލްމަށްވުރެސް މިފަހަރުގެ މި ފިލްމު މާ ބޮޑަށްވެސް މަޖާވާނެކަމަށް ފިލްމީ ޚަބަރުތައް ގެނެސްދޭ އިންޑިއާގެ ނޫސްތަކުން ބުނެއެވެ.
ބޫޝަން ކުމާރުގެ ޓީ ސީރީޒާއި މުރާދް ކެތާނީ ގުޅިގެން ޕްރޮޑިއުސްކުރާ މި ފިލްމުގެ މަސައްކަތް އަންނަ އަހަރު ނިމެންވާއިރު ނިންމަން ވަނީ ހަމަޖެހިފައެވެ.
2012 ވަނަ އަހަރު ދެއްކި އަކްޝޭގެ "ރައުޑީ ރާތޯޑް" އަދި 2015 ވަނަ އަހަރު ދެއްކި ސަލްމާންގެ "ބަޖްރަންގީ ބައިޖާން" ގެ ދެވަނަ ބައެއް އުފައްދާނެކަމަށްވެސް ދާދި ފަހުންވަނީ ޢިޢުލާނުކޮށްފައެވެ.
ބޯނީ ކަޕޫރު ޕްރޮޑިއުސްކޮށް އަނީސް ބަޒްމީ ޑައިރެކްޓްކޮށްފައިވާ އޮރިޖިނަލް ފިލްމު "ނޯ އެންޓްރީ" ގައި ސަލްމާންގެ އިތުރުން އަނިލް ކަޕޫރު، ފަރްދީންޚާން، ބިޕާޝާ ބާސޫ، އީޝާ ޑިއޯލް، ލާރާ ދައްތާ ސެލިނާ ޖެއިޓްލީ އަދި ސަމީރް ރެޑީވެސް ފެނުނެވެ.