އަކްޝޭ ކުމާރު ލީޑްރޯލުން ފެނިގެންދާ ތާރީޚީ ފިލްމު "ޕްރިތްވީރާޖް" ގެ ދެވަނަ ޓްރެއިލަރވެސް މި މަސް ނިމުމުގެ ކުރިން ދައްކާލާނެކަމަށް ޕްރޮޑަކްޝަން ޓީމުން ބުނެފިއެވެ.
މި ފިލުމުގެ ޓްރެއިލަރއެއް އެންމެ ފަހުން އާއްމުކުރީ މިދިޔަ ނޮވެމްބަރުމަހުއެވެ. މި ޓްރެއިލަރއަށް ޢާންމުންގެ ބޮޑު ތަރުޙީބެއްވަނީ ލިބިފައެވެ. މީގެކުރިން މި މަހުގެ 27 ގައި ދައްކަން ހަމަޖެހިފައިވާ ޓްރެއިލަރ މިހާރު މި ވަނީ ފަހަތަށް ޖައްސާފައެވެ. ނަމަވެސް މި ހަފްތާ ތެރޭގައި ޓްރެއިލަރ ފެންނާނެކަމަށް ޓީމުން ބުނެއެވެ. މި ޓްރެއިލަރއިން ފިލްމުގެ ކެރެކްޓަތައް ތަޢާރަފްވުމުގެ އިތުރުން ފިލްމުގެ ވާހަކަ އެގޭނެއެވެ. މި ފިލްމު ރިލީޒްކުރަން ތާވަލުކޮށްފައިވަނީ އަންނަ މަހުގެ 21 ގައެވެ.
2017 ވަނަ އަހަރުގެ މިސް ވޯރލްޑް މަނީޝާ ޗިއްލަރު ފުރަތަމަ ފަހަރަށް ހިންދީ ފިލްމަކުން ފެނިގެންދާ "ޕްރިތްވީރާޖް" ގައި އަކްޝޭ އަދި މަނީޝާގެ އިތުރުން ސަންޖޭ ދަތު، ސޯނޫ ސޫދު، އަޝުތޯޝް ރާނާ، ސާކްޝީ ތަންވާރު، މާނަވް ވިޖް އަދި ލަލިތް ތިވާރީވެސް މުހިންމު ރޯލުތަކުން ފެނިގެންދާނެއެވެ.
ހިސްޓޯރިކަލް އެކްޝަން ޑްރާމާއެއްކަމަށްވާ މި ފިލްމު ޑައިރެކްޓްކުރަނީ ޗަންދުރަޕްރަކާޝް ދިވޭދީ އެވެ. ޔާޝްރާޖް ފިލްމްސްއިން ޕްރޮޑިއުސްކުރާ މި ފިލްމުގެ ރަސްމީ ޓީޒަރ މޯޝަން ޕިކްޗަރ މިދިޔަ އަހަރުގެ ސެޕްޓެމްބަރުމަހު ވަނީ ދައްކާފައެވެ.