"ދަންގަލް" އަދި "ޗިޗޯރޭ" ގެ ވެސް ޑައިރެކްޓަރ ނިތޭޝް ތިވާރީ ދެން އެންމެ އަވަހަށް ޑައިރެކްޓް ކުރާ ފިލްމަށް ވަރުން ދަވަން އާއި ޖާންވީ ކަޕޫރު ހަމައްޖައްސައިފިއެވެ.
ލޯބީގެ ފިލްމެއްކަމަށްވާ މި ފިލްމުގެ ޕްރޮޑިއުސަރަކީ ތިވާރީ އެންމެ ފަހުން ޑައިރެކްޓްކޮށްފައިވާ ފިލްމު "ޗިޗޯރޭ" ގެ ވެސް ޕްރޮޑިއުސަރ ސާޖިދު ނަދިއާދްވާލާ އެވެ. ތިވާރީގެ އެހެން ޑައިރެކްޝަނެއްކަމަށްވާ "ރާމަޔާނާ" ގެ މަސައްކަތް ފަހަތަށް ޖެއްސުމަށްފަހު މި ފިލްމުގެ މަސައްކަތް އަންނަ އަހަރު ފެށޭ ހިސާބުގައި ފަށަންވެސް މިހާރުވަނީ ނިންމާފައެވެ.
"ރާމަޔާނާ" ގެ މަސައްކަތް އަންނަ އަހަރު ފަހުކޮޅު ފެށުމަށް ނިންމީ ފިލްމުގެ ލީޑްރޯލުން ފެންނާނެ ދެ ތަރިންކަމުގައިވާ ރިތިކް ރޯޝަންއާއި ރަންބީރު ކަޕޫރަށް ފިލްމަށް ވަގުތު ނުދެވުމުންނެވެ.
މިދިޔަ އަހަރު ދެއްކި "ކޫލީ ނަންބަރު 1" އިން އެންމެފަހުން ފެނުނު ވަރުން ފިލްމަކުން ނުފެންނަތާ މިހާރު އަހަރެއްވީއެވެ. ނަމަވެސް "ބޭދިޔާ" ، "ޖުގް ޖުގް ޖިޔޯ" އަދި ރާޖްކުމާރު ހިރާނީގެ ފިލްމަކުންވެސް އަދި ވަރުން ފެންނާނެއެވެ.
ޖާންވީ އެންމެފަހުން ފެނުނީ ފިލްމު "ރޫޙީ" އިންނެވެ. ޖާންވީގެ ކުރިއަށްހުރި ފިލްމުތަކަކީ "ގުޑްލަކް ޖެރީ" ، "މިސްޓަރ އެންޑް މިސިޒް މާހީ" އަދި ފިލްމު "ހެލެން" ގެ ރީމޭކެވެ.