މާލޭގެ އަލިމަސް ކާނިވާ ސަރަޙައްދުގައި 500އަށްވުރެ ގިނަ އުޅަނދު ޕާކު ކުރެވޭނެ ޕާކިން ޒޯނެއް ތަރައްޤީކުރުމުގެ މަސައްކަތް މާލޭ ސިޓީ ކައުންސިލުން ފަށައިފިއެވެ. މި ޒޯންގައި ކާރާއި ސައިކަލު ޕާކު ކުރާނެ ޖާގަ ހިމެނެއެވެ.
މާލޭގައި ދުއްވާ އެއްގަމު އުޅަނދުތައް އިތުރުވުމުގެ ސަބަބުން ކުރިމަތިވާ އެންމެ ބޮޑު ދަތިކަމަކީ އުޅަނދުތައް ޕާކުކުރާނެ ޖާގަ ނެތުމެވެ. މާލޭގެ މަގުތަކުގައި ޕާކު ކުރުމަށް ކުރަހާފަވާ ސަރަޙައްދުތަކުގެ އިތުރުން، ހުސްކޮށް ހުރި ބިންތައް ޕާކިން ޒޯންތަކަށް ބަދަލުކުރުމުގެ މަސައްކަތް މާލޭ ސިޓީކައުންސިލުން އަންނަނީ ކުރަމުންނެވެ. މިހާތަނަށް އައިއިރުވެސް މިފަދަ ގިނަ ބިންތަކެއް ޕާކިންއަށް ޚާއްސަކޮށް، ވަނީ ހުޅުވާފައެވެ.
މާލޭގެ ކާނިވާ ސަރަޙައްދުގަވެސް އިތުރު ޕާކިން ޖާގަ ހެދުމުގެ މަސައްކަތް ސިޓީ ކަންސިލުން މިހާރުވަނީ ފަށާފައެވެ. މި މަސައްކަތް ވެގެންދާނީ އެއް ސަރަޙައްދުގައި އެންމެ ގިނަ އުޅަނދު ޕާކު ކުރެވޭގޮތަށް ޚާއްސަކޮށްގެން މާލޭގައި ހަދާ އެއް ޕާކިން ޒޯނަށެވެ. ސިޓީ ކައުންސިލުން މަޢުލޫމާތު ދެއްވާގޮތުގަ ކާނިވާ ސަރަޙައްދުގައި ހަދާ ޕާކިން ޒޯނަކީ 500 ސައިކަލު ޕާކުކުރެވޭނެ ޖާގައާއެކު ތަރައްޤީކުރާ ޒޯނެކެވެ. އަދި ޒޯނުގެ ބައެއް، ކާރު ޕާކިންއަށް ޚާއްސަކުރުމަށް ނިންމާފަވެއެވެ. ކާރު ޕާކިން ޒޯންގައި 55 ކާރު ޕާކު ކުރެވޭނެއެވެ.
ކާނިވާ ސަރަހައްދުގައި ތަރައްޤީ ކުރެވޭ ޕާރކިންގް ޒޯންގެ މަސައްކަތް ކުރިޔަށްދާ ގޮތް މާލޭ ސިޓީ މޭރަރ @MMuizzu ބައްލަވާލަށްވަނީ pic.twitter.com/hKrLfmZr1u
— Male' City Council (@MaleCitymv) September 23, 2021
ސިޓި ކައުންސިލުން މިހާރު ކުރަމުންދާ މަސައްކަތަކީ ޒޯން ހެދުމަށް ކާނިވާ ސަރަޙައްދުގެ ބިން ތައްޔާރުކުރުމުގެ މަސައްކަތެކެވެ. އެގޮތުން ވެލިގަނޑު އެއްވަރުކޮށް ޒޯނުގެ މަސައްކަތްތައް ވަނީ ފަށާފައެވެ.
މި ޒޯން ތަރައްޤީކުރާނީ ވެހިކަލް ޕާކުކުރާ މީހުންނަށް ވީހާވެސް ފަސޭހައިން ބޭނުންކުރެވޭގޮތަށް، ގާ އަތުރައި ޒޯންގައި ކުރަހަންޖެހޭ ނިޝާންތަކާއެކުއެވެ. ސިޓީ ކައުންސިލުން ވިދާޅުވީ ޒޯނުގެ މަސައްކަތްތައް ވީހާވެސް އަވަހަށް ނިންމައި ބޭނުންކުރަން ހުޅުވާލުމަށް މަސައްކަތް ކުރަމުންދާކަމަށެވެ.
ކާނިވަލުގެ ބޮޑު ސަރަޙައްދެއް މިހާރުވެސް ވެހިކަލް ޕާކުކުރުމަށް ޚާއްސަކޮށް، ބޭނުންކުރަމުންނެވެ.
މާލޭގެ ޕާކިން މައްސަލަ ޙައްލުކުރުމުގެ ދިގު މުއްދަތުގެ ޕްލޭނަކީ މާލޭގެ އެކި ސަރަޙައްދުތަކުގަ ޕާކިން އިމާރާތްތަކެއް ހެދުމެވެ. މި ޢިމާރާތްތަކަކީ އެކި ފަންގިފިލާތަކުގައި ޕާކުކުރެވޭގޮތަށް ހަދާ އިމާރާތްތަކެކެވެ. މީގެސަބަބުން ކުޑަ ޖާގައެއްގައި ގިނަ އުޅަނދުތަކެއް ޕާކުކޮށްފާ ބޭއްވުމަށް މަގުފަހިވެ، މަގުތަކުގެ ތޮއްޖެހުން ވަރަށް ބޮޑަށް ކުޑަވެގެންދާނެއެވެ.
މާލޭގައި އުޅަނދު ގެންގުޅޭ ފަރާތްތަކަށް ލުއިފަސޭހަކޮށްދިނުމަށް، ޒޯންތަކުގައި ޕާކު ކުރުމަށް ކުއްޔަށްނަގާ މީހުން ދައްކަންޖެހޭ ފީވެސް ސިޓީ ކައުންސިލުންވަނީ ކުޑަކޮށްފައެވެ. އެގޮތުން ޕާކިން ފީގެ ގޮތުގައި ކުރިން ދައްކަމުންއައި މަހުކުލި 3000 ރުފިޔާއިން 750 ރުފިޔާއަށްވަނީ ކުޑަކޮށްފައެވެ.