ތ.ތިމަރަފުށީގައި ސަރުކާރުން ތަރައްޤީކުރަމުން އަންނަ 100 ހައުސިންގ ޔުނިޓްގެ މަސައްކަތް އަންނަ ނޮވެމްބަރު މަހު ނިންމާލެވޭނެ ކަމަށް ހައުސިންގ މިނިސްޓްރީން ވިދާޅުވެއްޖެއެވެ. ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ތ.އަތޮޅަށް މިހާރު ކުރައްވަމުން ގެންދަވާ ދަތުރުފުޅުގައި ވަނީ ތިމަރަފުށީގެ ތަރައްޤީއަށް ކުރިއަށް ގެންދާ ބައެއް މަޝްރޫޢުތައް ކުރިއަށްދާގޮތް ބައްލަވާލައްވާފައެވެ.
ތިމަރަފުށީގެ ހައުސިންގ މަޝްރޫޢަކީ އެސްޖޭ ކޮންސްޓްރަކްޝަންނާއި ހަވާލުކޮށްގެން ކުރިއަށްގެންދާ މަޝްރޫއެކެވެ. މި މަޝްރޫޢު އެކުންފުންޏާއި ހަވާލުކޮށްފައިވަނީ މިދިޔަ އަހަރުގެ ޖެނުއަރީ މަހުގެ ތެރޭގައެވެ. މި މަޝްރޫޢުގެ ދަށުން ޢިމާރާތްކުރާ ހައުސިންގ ޔުނިޓްތަކުގެ ކޮންމެ ޔުނިޓެއްގައި3 ކޮޓަރިއާއި، 3 ފާޚާނާ އާއ ސިޓިންގ ރޫމާއި ލޯންޑްރީ އާއި ފްރަންޓް ޔަރޑްވެސް ހިމެނޭނެއެވެ.
ޕީއެސްއެމް ނިއުސްއާއި ވާހަކަފުޅު ދައްކަވަމުން ހައުސިން މިނިސްޓްރީގެ ސީނިއަރ ކޮންޓްރެކްޓިން އޮފިސަރ މުޙައްމަދު ޒަރީރު ވިދާޅުވީ، ތިމަރަފުށި ހައުސިން މަޝްރޫޢުގެ ދަށުން ޢިމާރާތްކުރާ ގެތަކުގެ 32 ގެއެއްގެ މަސައްކަތް މިހާރު ނިމުމަކާއި ގާތްވެފައިވާކަމަށެވެ. އެގޮތުން އެގެތައް ރާނާ ނިމި ހިޔާކޮށްފައިވާ ކަމަށް އޭނާ ވިދާޅުވިއެވެ. އަދި ބާކީ ހުރި ހައުސިންގ ޔުނިޓްތަކުގައި ކުރިއަށްދަނީ ރޭނުމުގެ ބައެއް މަސައްކަތާއި ސިމެންތި ޖެހުމުގެ މަސައްކަތް ކަމަށް ޒަރީރު ވިދާޅުވިއެވެ. ޒަރީރު ވިދާޅުވީ މިހާރު މިމަޝްރޫޢު ކުރިއަށްދާގޮތަށް ބަލާއިރު ނޮވެމްބަރު މަހުގެ ތެރޭގައި މިމަޝްރޫޢު އެއްކޮށް ނިންމާލެވޭނެކަމަށްވެސް އޭނާ ވިދާޅުވިއެވެ.
"ކޯވިޑާއި ގުޅިގެން މަޝްރޫޢަށް މަޑުޖެހުމެއް އައިނަމަވެސް މިހާރު ވަރަށް ބާރަށް މަސައްކަތް އެބަ ކުރިއަށްދޭ. މިދާގޮތަށް އިރާދަކުރެއްވިއްޔާ ނޮވެމްބަރު މަަހު މި މަޝްރޫޢު އެއްކޮށް ނިންމާލެވޭނެ." މުޙައްމަދު ޒަރީރު ވިދާޅުވިއެވެ.
އާބާދީގައި 2,500 އަށްވުރެ ގިނަ މީހުން އުޅޭ ތިމަރަފުއްޓަކީ 20 ހެކްޓަރުގެ ބިން އޮންނަ ރަށެކެވެ.
ރައީސުލްޖުމްހޫރިއްޔާ ތިމަރަފުށްޓަށް ކުރެއްވި ދަތުރުފުޅުގައި ވަނީ މަގު ހެދުމުގެ މަޝްރޫޢު ކުރިއަށްދާގޮތްވެސް ބައްލަވާލައްވާފައެވެ. ތިމަރަފުށި މަގު ހެދުމުގެ މަޝްރޫޢަކީ ރޯޑް ޑިވެލޮޕްމަންޓް ކޯޕަރޭޝަނާއި ހަވާލުކޮށްގެން ކުރިއަށްދާ މަޝްރޫޢެކެވެ. މިމަޝްރޫޢު އެކުންފުންޏާ ހަވާލުކޮށްފައިވަނީ 2019 ވަނަ އަހަރުގެ ޑިސެމްބަރު މަހުގެ ތެރޭގައެވެ. މިމަޝްރޫޢުގެ ދަށުން ކުރުމަށް ހަމަޖެހިފައިވާ މަސައްކަތްތަކުގެ ތެރޭގައި، ތިމަރަފުށީގެ 08 މަގެއްގައި ތާރުއަޅާ ރަނގަޅު ފެންވަރަކަށް ހެދުން ހިމެނެއެވެ. އެގޮތުން ތިމަރަފުށީގައި ހެދުމަށް ހަމަޖެހިފައިވަނީ 4 ކިލޯމީޓަރު (32،144 އަކަމީޓަރު)ގެމަގެވެ. 75،704،226.92 ރުފިޔާ ޚަރަދުކޮށްގެން ކުރިއަށްގެންދާ މި މަޝްރޫޢަކީ 365 ދުވަހުގެ ތެރޭގައި ނިންމުމަށް ހަވާލުކޮށްފައިވާ މަޝްރޫޢެކެވެ.
ރައީސުލްޖުމްހޫރިއްޔާ ވަނީ ތިމަރަފުށި ތަރައްޤީއަށް ކުރެވޭ މަސައްކަތްތަކުގެ އިތުރުން އެރަށުގައި ހުންނަ ތ.އަތޮޅު ތަޢުލީމީ މަރުކަޒަށާއި، ސިއްޙީ މަރުކަޒަށް ޒިޔާރަތްކުރައްވާ އެތަންތަނަށް ދިމާވެފައިވާ ދަތިތައްވެސް އޮޅުންފިލުއްވާފައެވެ. އަދި އެތަންތަނަށް ދިމާވެފައިވާ ދަތިތައް ހައްލުކޮށްދެއްވުމަށް އަންނަ އަހަރުގެ ބަޖެޓުގައި މަސައްކަތްކުރައްވާނެ ކަމަށް ރައީސް ވިދާޅުވިއެވެ.