އެކްޓިންގެ ދާއިރާގައި 21 އަހަރު ހޭދަކުރުމަށްފަހު ބޮލީވުޑްގެ އެންމެ ކާމިޔާބު އެއް ބަޠަލާ ކަރީނާ ކަޕޫރު އަލަށް ފިލްމެއް ޕްރޮޑިއުސް ކުރަން ނިންމާ އެކަން އިއުލާންކޮށްފިއެވެ.
ނަމެއް އަދި ނުނިންމާ މި ތްރިލަރ ފިލްމުގެ ކޯ ޕްރޮޑިއުސަރަކީ އެކްތާ ކަޕޫރެވެ. ފިލްމު ޑައިރެކްޓްކުރަނީ "ސްކޭމް 1992: ދަ ހަރްޝަދް މެހެތާ ސްޓޯރީ" ގެ ޑައިރެކްޓަރ ހަންސަލް މެހެތާއެވެ.
ހަޤީޤީ ޙާދިސާއެއްގެ މައްޗަށް އުފައްދާ މި ފިލްމުގެ މަންޒަރުތައް ނަގަން ހަމަޖެހިފައިވަނީ އިނގިރޭސިވިލާތުގައެވެ. މި ފިލްމުގެ ވާހަކަތައް ހިއްސާކުރަމުން ކަރީނާ ބުނީ އެކްތާ އާއެކު މަސައްކަތްކުރަން ލިބުމަކީ ލިބުނު ފަޚްރެއްކަމަށެވެ. އަދި އޭނާއަކީ ޑައިރެކްޓަރ ހަންސަލް މެހެތާގެ ފިލްމުތަކުގެ ފޭނެއްކަމުން ހަންސަލް އާއިއެކު މަސައްކަތްކުރުމަކީ ޚާއްޞަކަމެއްކަމަށެވެ.
2018 ވަނަ އަހަރު ދެއްކި "ވީރޭ ދެ ވެޑިންގ" ގައި ކަރީނާއާއި އެކްތާ ވަނީ އެކުގައި މަސައްކަތްކޮށްފައެވެ. މި ފިލްމާއިއެކު ކަރީނާ ހުނަރަށް އެކްތާ ވަނީ ވަރަށް ބޮޑަށް ތަޢުރީފްވެސް ކޮށްފައެވެ.
ކަރީނާ ދެން އެންމެ އަވަހަށް ފެނިގެންދާނީ ޢާމިރު ޚާނާއިއެކު ފެނިގެންދާ ފިލްމު "ލާލް ސިންގް ޗައްޑާ" އިންނެވެ.