ހިންދީ ސްކްރީންތަކުގައި އެންމެ ކާމިޔާބު އެއް ޑައިރެކްޓަރަކީ ސަންޖޭ ލީލާ ބަންސާލީއެވެ. އަހަރު ތެރޭ މާ ގިނަ ފިލްމުތަކެއް ނުއުފައްދާ ހުރެ އޭނާ ދޫކޮށްލާ މަދު ފިލްމުތައް ބޮކްސް އޮފީސް ހިލުވާލައެވެ. އަދި ގިނަ ފިލްމުތަކުގައި ސުޕަރ ހިޓް ބޯޑު އަޅުވަން ބޮކްސް އޮފީހަށް މަޖްބޫރުވެއެވެ.
ސަންޖޭގެ ވާހަކަތަކުން މިހާރު އެންމެ ގަދަ އެއް ވާހަކައަކީ އެނާ ތައްޔާރުކުރަމުން އަންނަ "ބައިޖޫ ބައުރާ"ގެ ވާހަކައެވެ. މި ފިލްމުގެ ލީޑިން ކާސްޓާއި ގުޅޭ ގޮތުން ތަފާތު ވާހަކަތައް އަންނަނީ ދެކެވެމުންނެވެ. މި ފިލްމުގެ ލީޑް ރޯލް ފުރަތަމަ ރަންބީރަށް ހުށައެޅުމުން އެނާ އެ ފިލްމަށް ނޫނެކޭ ބުނި ވާހަކަ މީގެކުރިން ފެތުރިގެން ދިޔެވެ. އެހެންނަމަވެސް އޭނާއަށް ފިލްމު ހުށަނާޅާކަމަށް ވެއެވެ.
ސަންޖޭގެ ފިލްމަކުން ކެރިއަރ ފެށި ރަންބީރު މިހާތަނަށް ސަންޖޭއަށް ނޫނެކޭ ބުނީ އެންމެ ހުށައެޅުމަކަށެވެ. އެއީ ރިތިކާއި އައިޝްވަރިޔާ ފެނިގެން ދިޔަ "ގުޒާރިޝް" އަށެވެ. މި ފިލްމުގައި ރަންބީރަށް ހުށައެޅީ ފަހުން އަދިތިޔާ ރޯއީ ކުޅުނު ސަޕޯޓިން ރޯލެވެ.
ސަންޖޭގެ ޕްރޮޑަކްޝަން ޓީމުން ބުނީ "ބައިޖޫ ބައުރާ" ގެ ލީޑްރޯލް މިހާރު ފައިނަލް ވެފައިވާކަމަށެވެ. މި ފަހަރުވެސް ސަންޖޭ އެރޯލް ދީފައިވަނީ އޭނާގެ އެންމެފަހުން ނުކުތް ކާމިޔާބު ފިލްމުތަކުގައި މުހިއްމު ރޯލަތައް އަދާކުރި ރަންވީރު ސިންގަށެވެ. ރަސްމީކޮށް ސަންޖޭ ވަރަށް އަވަހަށް މިކަން އިޢުލާން ކުރާނެކަމަށްވެސް ސަންޖޭގެ ޓީމުން ބުނެއެވެ.
މިޔުޒިކަލް ފިލްމު "ބައިޖޫ ބައުރާ" ވާހަކަ ލިޔެ ޑައިރެކްޓްވެސް ކުރަނީ ސަންޖޭ އެވެ. ރަންވީރުގެ އިތުރުން މި ފިލްމުން ދެން ފެނިގެންދާނީ އޭނާގެ އަންހެނުން ދީޕިކާ ޕަޑްކޯނާއި އާލިއާ ބަޓްއެވެ.