މީޒާން ޖެފަރީ ލީޑްރޯލުން ފެނިގެންދިޔަ ފިލްމު "ހަންގާމާ 2" މި މަހުގެ 5 ވަނަ ދުވަހު އޫއޭއީގައި ރިލީޒްކުރުމަށް ހަމަޖެހިފައިވާއިރު ފިލްމުގެ ޓްރެއިލަރ އަށް ބެލުންތެރިންގެ މާބޮޑު ތަރުހީބެއް ލިބިފައެއް ނުވެއެވެ.
ނަމަވެސް ފިލްމުގެ ލީޑްރޯލުން ފެންނަ މީޒާން ޖެފަރީއަށް މިކަމުން މާބޮޑު އަސަރެއް ކުރިހެނެއް ހިޔެއް ނުވެއެވެ. "ހަންގާމާ 2" އަށްފަހު މީޒާން ދަނީ އަނެއްކާވެސް ޕްރިޔަދަރްޝަންއާއިއެކު އެހެން ފިލްމެއްގެ މަސައްކަތަށް ތައްޔާރުވަމުންނެވެ.
"ހަންގާމާ 2" ގެ ވެސް ޑައިރެކްޓަރ ޕްރިޔަދަރްޝަންގެ މި ތްރިލަރ ފިލްމުން މީޒާން ފެންނާނީ ލީޑް ރޯލުންނެވެ. މި ފިލްމުގައި ބޮޑެތި ސަސްޕެންސް ތަކެއް ހިމެނޭނެއެވެ. ރިޕޯޓްތައް ބުނާގޮތުން ފިލްމުގެ ވާހަކަ މީގެކުރިންވެސް ދެކެވިފައިވާތީ ފިލްމުގެ މަސައްކަތް މި މަހު ފަށާނެއެވެ. މިޒާން މި ފިލްމަށް ސޮއި ކޮށްފައިވަނީ "ހަންގާމާ 2" ގެ މަސައްކަތް ނިމެން ކައިރިވެފައިވަނިކޮށްކަމަށްވެސް ޚަބަރުތައް ބުނެއެވެ.
މީޒާންގެ އިތުރުން މި ފިލްމުގައި ލީޑުން އެހެން ބަތަލެއް ފެންނާނެއެވެ. އެހެންނަމަވެސް ފިލްމު މުޅި ކާސްޓް ޕްރޮޑަކްޝަން ޓީމުން އަދި ހާމަ ނުކުރާތީ އެ ރޯލް ދެނީ ކޮންތަރިއަކަށް ކަމެއް އަދި ނޭގެއެވެ.