ބޮޑު ބަޖެޓަކުން ޑައިރެކްޓަރ ޢަލީ ޢައްބާސް ޒަފަރު ކެޓްރީނާ ކައިފް އާއިއެކު އުފައްދަން ނިންމާފައި އޮތް ސުޕަރ ހީރޯ ފިލްމު "ސުޕަރ ސޯލްޖަރ" ގެ މަސައްކަތް ކޯވިޑްގެ ބަލިމަޑުކަމާއި ހެދި ވަނީ އަންނަ އަހަރަށް ލަސްކޮށްފައެވެ.
ނަމަވެސް "ޓައިގަރ ޒިންދާ ހޭ" ގެ ޑައިރެކްޓަރ އަނެއްކާވެސް މިވަނީ އިތުރު ޕްރޮޖެކްޓެއްގެ މަސައްކަތް މިއަހަރު ތެރޭގައި ފަށަން ނިންމާފައެވެ.
ޢަލީގެ މިފަހަރުގެ ފިލްމަކީ ތްރިލަރ އެކެވެ. ފިލްމުގެ ލީޑްރޯލުން "ކަބީރު ސިންގް" ގެ ތަރި ޝާހިދު ކަޕޫރު ފެންނާނެކަމަށް މިހާރުވަނީ ޔަޤީންވެސް ވެފައެވެ. އަދި މިއީ ބޭރު ފިލްމެއްގެ ހިންދީ ރީމޭކެއްކަމަށާއި ނަމަވެސް އެ ފިލްމުގެ ތަފްޞީލް ޕްރޮޑަކްޝަން ޓީމުން އަދި ހާމައެއް ނުކުރެއެވެ.
ޝާހިދުވެސް ބޭނުންވެފައި ހުރީ ތަފާތު ފިލްމެއްގައި މަސައްކަތް ކުރަންކަމަށާއި ފިލްމުގެ ޝޫޓިންތައް މިއަހަރު ފަށައިފިނަމަ މި ފިލްމު ވެގެންދަނީރާޖް އެންޑް ޑީކޭ ގެ އެމެޒޯން ޕްރައިމް ސީރީޒަށް ފަހު ޝާހިދު ދެން އެންމެ އަވަހަށް ފަށާ މަސައްކަތަށެވެ. މި ސީރީޒް ގެ ޝޫޓިންތައް މިހާރު މުމްބާއީގައި ދަނީ ކުރިއަށެވެ.
އޮފްސައިޑް އެންޓަރޓެއިންމަންޓް ބެނަރގެ ދަށުން ޢަލީ ޕްރޮޑިއުސް ކުރާ މި ފިލްމުގެ ބޮޑު ބައެއް ޝޫޓް ކުރާނީ މިއަހަރު ފަހުކޮޅު އަބޫދާބީގައެވެ.
ޝާހިދުގެ ކުރިއަށް އޮތް ފިލްމަކީ ތެލުގޫ ފިލްމު "ޖާރޒީ" ގެ ހިންދީ ރީމޭކެވެ. މީގެއިތުރުން އަމަރް ބުތާލާސް ގެ "އޮޕަރޭޝަން ކެކްޓަސް" ރާކޭޝް އޯމް ޕްރަކާޝް މެހެރާގެ މިތޮލޮޖިކަލް އެޕިކް "ކަރްނާ" އަދި ސުޖޭ ގޯޝްގެ ކުރިއަށް އޮތް އެކްޝަން ފިލްމަކީވެސް ޝާހިދުގެ ކުރިއަށް ހުރި ފިލްމުތަކެވެ.