މިއުޒީޝަން އަދި ލަވަކިޔުންތެރިޔާ ޔޯޔޯ ހަނީ ސިންގްގެ މައްޗަށް ގެވެށި އަނިޔާގެ ތުހުމަތުކޮށް އޭނާގެ އަންހެނުން ޝާލިނީ ތަލްވާރު މައްސަލަ ކޯޓަށް ހުށަހަޅައިފިއެވެ.
ގެވެށި އަނިޔާގެ އިތުރުން ހަނީ ސިންގަށްވަނީ ޖިންސީ ފުރައްސާރަކުރުމާއި ނަފްސާނީގޮތުން ބިރުދެއްކުން އަދި މާލީގޮތުންވެސް ފުރައްސާރަކޮށްފައިކަމަށްވެސް ޝާލިނީ ވަނީ ބުނެފައެވެ. "ޕްރޮޓެކްޝަން އޮފް ވުމެން ފްރޮމް ޑޮމެސްޓިކް ވަޔަލެންސް" އެކްޓުގެ ދަށުން މި މައްސަލަ ޝާލިނީ ވަނީ ދިއްލީގެ ތިޒް ހަޒާރީ ކޯޓަށް އިއްޔެ ހުށަހަޅާފައެވެ.
މި މައްސަލައާއި ގުޅިގެން ޖަވާބުދާރީވުމަށް ކޯޓުންވަނީ ހަނީ ސިންގަށް މިމަހުގެ 28 ގެ ނިޔަލަށް މުއްދަތު ދީފައެވެ.
ހަނީ ސިންގުގެ އަންހެނުން ޝާލިނީ ތަޢާރަފްކޮށްދީފައިވަނީ 2014 ވަނަ އަހަރު ދެއްކި ރިއަލިޓީ ޝޯ "އިންޑިއާސް ރޯ ސްޓާރ" އިންނެވެ. ޝާލިނީ ފާހަގަކުރެވެނީ ސޯޝަލް މީޑިއާގައި ވަރަށް އެކްޓިވް މީހެއްގެ ގޮތުގައެވެ. އަދި ހަނީ ސިންގާއެކު ނަގާފައި ހުންނަ ގިނަ ފޮޓޯތަކެއްވެސް ޝާލިނީ ދިޔައީ ސޯޝަލް މީޑިއާގައި އާންމު ކުރަމުންނެވެ. ނަމަވެސް ފަހަކަށް އައިސް ޝާލިނީ އިންސްޓަގްރާމްގައި އާންމުކޮށްފައި ހުންނަ ޕޯސްޓް ތަކުން ދެ މީހުންގެ ދެމެދުގައި މައްސަލަ އެއް އުޅޭހެން ހީވާކަމަށް ގިނަ ފަރާތްތަކުން ބުނެއެވެ.
ހަނީ ސިންގްގެ މަޝްހޫރު ލަވަތަކުގެ ތެރޭގައި "އަންގްރޭޒީ ބީޓް" ، "ލޫންގީ ޑާންސް" ، "ދިލް ޗޯރީ" އަދި "ސައިޔާން ޖީ" ހިމެނެއެވެ.