އެކްތާ ކަޕޫރާއި ޖޭ ޝެވަކްރަމާނީ ޕްރޮޑިއުސް ކުރާ ރޮމޭންޓިކް ތްރިލަރ "ފްރެޑީ" ގެ މަސައްކަތް އަންނަ އޯގަސްޓަމަހު ފަށަން ނިންމައިފިއެވެ.
ކާތިކް އާރްޔަން ލީޑް ރޯލުން ފެންނާނެ މި ފިލްމުގެ ވާހަކަ މީޑިއަތަކުގައި މީގެކުރިން ދެކެވިފައިވާއިރު ވޭތުވެދިޔަ ތިންމަސް ދުވަހުވެސް ކުރަމުން އައީ ފިލްމުގެ ޕްރީ ޕްރޮޑަކްޝަންގެ މަސައްކަތްކަމަށް ޕްރޮޑަކްޝަން ޓީމުން ބުނެއެވެ.
އަޖޭ ބާލް ޑައިރެކްޓް ކުރަން މީގެކުރިން ހަމަޖެހިފައިވާ މި ފިލްމު މިހާރު ޑައިރެކްޓްކުރާނީ "ވީރޭ ދަ ވެޑިންގް" ގެ ޑައިރެކްޓަރ ޝަޝަންކާ ގޯޝް އެވެ. "ފްރެޑީ" ގެ ލީޑްރޯލުން ކާތިކް ފެންނާނެކަމަށް އިޢުލާނު ކޮށްފައިވާއިރު އަންހެން ލީޑްރޯލުން ފެންނާނީ ކޮން ތަރިއެއްކަމެއް ޕްރޮޑަކްޝަން ޓީމުން އަދި ނުބުނެއެވެ. ނަމަވެސް ފިލްމުގެ ޝޫޓިންތައް އަންނަމަހު ފަށަން ވަނީ ހަމަޖެހިފައެވެ.
އަދިތްޔާ ރޯއި ކަޕޫރު، ދިޝާ ޕަތާނީ އަދި އަނިލް ކަޕޫރު ފެނިގެންދިޔަ ފިލްމު "މަލަންގް" އަދި ސައިފް ޢަލީ ޚާން، އަލާޔާ އެފް އަދި ތާބޫ ފެނިގެންދިޔަ "ޖަވާނި ޖާނެމަން" އަކީ ޕްރޮޑިއުސަރް ޖޭ ޝެވަންރަމާނީ މިދިޔަ އަހަރު ޕްރޮޑިއުސްކޮށްފައިވާ ދެ ފިލްމެވެ.