ބ.އަތޮޅު ބަޔޮސްފިޔާ ރިޒާރވްގެ ހިތްގައިމު މަންޒަރުތަކާއި، އެ ސަރަޙައްދުގެ ދިރުންތައް ދައްކުވައިދޭ ގޮތަށް ތައްޔާރުކޮށްފައިވާ ސްޓޭމްޕާއި، ޕޯސްޓް ކާޑް އިފްތިތާޙް ކޮށްފިއެވެ.މި ތަކެތި އިފްތިތާޙް ކޮށްދެއްވީ މިއަދު ބޭއްވެވި ރަސްމިއްޔާތެއްގައި އެންވަޔަރމަންޓް މިނިސްޓަރ ތާރިގް އިބްރާހިމާއި، ޓޫރިޒަމް މިނިސްޓަރ މޫސާ ޒަމީރެވެ. މި ރަސްމިއްޔާތުގައި ވާހަކަފުޅު ދައްކަވަމުން އެންވަޔަރމަންޓް މިނިސްޓަރ ތާރިގް އިބްރާހިމް ވިދާޅުވީ، ބ އަތޮޅު ބަޔޮސްފިޔާ ރިޒާވްގެ ތެރޭގައި މައިގަނޑު 9 ސަރަޙައްދެއް އޮތްއިރު އޭގެތެރެއިން ހަނިފަރު ފިޔަވާ ދެން ހުރި ތަންތަން ހިމާޔަތް ކުރުމަށް މާބޮޑު މަސައްކަތެއް ކުރެވިފައި ނުވާކަމަށެވެ. ނަމަވެސް އަންނަ އަހަރުން ފެށިގެން ހަނިފަރު ފިޔަވާ ދެންހުރި ސަރަޙައްދުތަކަށްވެސް ޚާއްސަ އިސްކަމެއް ދެއްވާނެ ކަމަށް މިނިސްޓަރ ތާރިގް ވިދާޅުވިއެވެ. ޓޫރިޒަމް މިނިސްޓަރ މޫސާ ޒަމީރު ވިދާޅުވީ، ބ އަތޮޅު ބަޔޮސްފިޔާ ރިޒާވްގައި ބައިވެރިވެފައި ނުވާ ރިސޯޓް ތަކާއެކު މަޝްވަރާ ކުރެވިފައިވާ ކަމަށާއި، ސަރުކާރުން ބޭނުންވަނީ ބަޔޮސްފިޔާ ރިޒާވް މިހާރަށްވުރެ ހަރުދަނާވުން ކަމަށެވެ. މި ރަސްމިއްޔާތުގައި ވަނީ ބ އަތޮޅު ބަޔޮސްފިޔާ ރިޒާވާއި، މޯލްޑިވްސް ޕޯސްޓާއި ދެމެދު ޕާޓްނަރޝިޕް އެއްބަސްވުމެއްގައި ސޮއިކުރައްވާފައެވެ.