"ދަބަންގް"ގެ ތަރި ސޮނާކްޝީ ސިންހާ އާއި ރިތޭޝް ދޭޝްމުކް އެކުގައި ފުރަތަމަ ފަހަރަށް ފެންނަ ހޮރޯ ކޮމެޑީ "ކަކޫދާ" ގެ ޝޫޓިންތައް އިއްޔެ ފަށައިފިއެވެ. ޝޫޓިންގެ މުއްދަތަކީ 40 ދުވަސް ކަމުގައި ޕްރޮޑަކްޝަން ޓީމުން މީގެކުރިންވަނީ ބުނެފައެވެ. އަދި މިއީ ޙަޤީޤީ ހާދިސާއެއްގެ މައްޗަށް ހަދާ ފިކްޝަނަލް ފިލްމެކެވެ.
އަވިނޭޝް ދިވޭދީ އަދި ޗިރާގް ކާގް ލިޔެފައިވާ ވާހަކައެއްގެ މައްޗަށް ހަދާ މި ފިލްމާއި ބެހޭގޮތުން ސޮނާކްޝީ ބުނީ މިހާރުގެ ޙާލަތަށް ބަލާއިރު މިކަހަލަ މަޖާ ފިލްމެއް މިހާރު ބޭނުންވާކަމަށެވެ. ފިލްމުގެ ސްކްރިޕްޓް ކިޔާފައި ފުރަތަމަވެސް ހިތްހަމަޖެހުނުކަމަށް ސޮނާކްޝީ ބުނެއެވެ. އެކްޓަރ ރިތޭޝްވެސް ބުނީ މިކަހަލަ ފިލްމެއްގައި ސޮނާކްޝީއާއި ސާގިބް އާއެކު މަސައްކަތްކުރަން ލިބުން މިއީ ރަގަޅު ފުރުޞަތެއްކަމަށެވެ.
ރޯނީ ސްކްރޫވާލާގެ ކުރިޔަށް އޮތް މި ފިލްމުގައި ރިތޭޝް އަދި ސޮނާކްޝީގެ އިތުރުން "ރޭސް 3"ގެ ތަރި ސާގިބް ސަލީމްވެސް ފެނިގެންދާނެއެވެ. ސާގިބް ފެނިގެންދާނީ ގޯސްޓް ހަންޓަރެއް ގޮތުގައި ސޮނާކްޝީގެ ލޯބިވެރިޔާގެ ރޯލުންނެވެ.
މި ފިލްމު ޑައިރެކްޓްކުރަނީ މަރާތީ ޑައިރެކްޓަރ އަދިތްޔާ ސަރްޕޮޓްދާރް އެވެ. އަދިތްޔާ ވަނީ މީގެކުރިންވެސް ރިތޭޝްގެ ކަންނާދާ ފިލްމު "މައުލީ" ޑައިރެކްޓްކޮށްފައެވެ.