ރިއަލިޓީ ޝޯ އިންޑިއަން އައިޑޮލްގެ 12 ވަނަ ސީޒަން ފެށުނު ފަހުން އެ ސީޒަނަށް އަމާޒުވެފައިވާ ފާޑުކިޔުންތައް ގިނައެވެ. ބައިވެރިންނަށް ޙައްޤުނޫން ތަޢުރީފް ކުރުމަށް ޖަޖުންނަށް މަޖުބޫރުކުރުވާ ކަމަށާއި ބައެއް ބައިވެރިންނަށް ފޭވަރ ކުރާކަމަށްވެސް އަޑުތައް ވަނީ އަރާފައެވެ. އަދި ވަރަށް ގިނަ އާރޓިސްޓުން ވަނީ މިކަންކަމާއި އެއްބަސްވެސްވެފައެވެ.
އައިޑޮލްގެ ބައެއް ސީޒަންތަކުގައި ޖަޖެއްގެ ގޮތުގައި މަސައްކަތްކޮށްފައިވާ ލަވަކިޔުންތެރިޔާ އަދި މިޔުޒިކް ޑިރެކްޓަރ ސޯނޫ ނިގާމްވެސް ވަނީ އެ ޝޯގައި މިއީ ހިނގާކަންކަން ކަމުގައި ބުނެފައެވެ. ސޯނޫ ބުނީ ބައެއް ބައިވެރިން ހަދާ ކުށްތައް ބުނެނުދީ ޙައްޤު ނޫން ތަޢުރީފު ކުރުވާކަމަށެވެ. ޖަޖުންގެ އަސްލު އަދާކުރަން ޖެހޭ ޒިންމާތަކުގެ ބަދަލުގައި އެހެންކަމެއް ކުރުވާކަމަށް ބުނެ ސޯނޫގެ ފާޑުކިޔުންތައްވެސް ވަނީ ޝޯއަށް އަމާޒުވެފައެވެ.
ސޯނޫގެ އިތުރުން ދާދިފަހުން ޝޯއަށް ގެނައި މެހްމާން ކުރީގެ މަޝްހޫރު ލަވަކިޔުންތެރިޔާ ކިޝޯރު ކުމާރުގެ ދަރިފުޅު އަމިތް ކުމާރުވެސް ވަނީ މި ޝޯއަށް ވަރަށް ބޮޑަށް ފާޑުކިޔާފައެވެ. އަމިތު ބުނީ އެ ޝޯއަށް އޭނާ ގެންދިޔައީ ބައިވެރިންނަށް ތަޢުރީފް ކުރުން ފިޔަވައި އިތުރު ވާހަކަތައް ނުދައްކަން އެއްބަސް ކުރުވައިގެންނެވެ.
މަޝްހޫރު ލަވަކިޔުންތެރިޔާ ސުނީދީ ޗޯހާންވެސް ވަނީ ޝޯއާއި ދެކޮޅަށް ވާހަކަދައްކާފައެވެ. ދެ ސީޒަނެއްގެ ޖަޖްކަން ކޮށްފައިވާ ސުނީދީވެސް ބުނީ އޭނާވެސް ޝޯ ދޫކޮށްލީ ބައިވެރިންނަށް ޙައްޤުނޫން ތަޢުރީފް ކުރުމަށް ޕްރޮޑަކްޝަން ޓީމުން މަޖްބޫރު ކުރުވުމުންކަމުގައެވެ.
އިންޑިއަން އައިޑޮލް ސީޒަން 1ގެ މަޤާމް ހޯދި އަބީޖީތް ސާވަންތްވެސް ވަނީ ޝޯގައި ބައިވެރިންގެ ހުނަރަށްވުރެ ޖަޒްބާތުތައް ކުރިއަށްނެރޭކަމަށް ބުނެ ފާޑުކިޔާފައެވެ. މީގެއިތުރުން ޝޯގެ ގިނަ ސީޒަންތަކެއް ޙޯސްޓްކުރި މިނީ މާތޫރުވެސް ވަނީ ޝޯއާއި މެދު ހިތްހަމަނުޖެހިގެން ވާހަކަ ދައްކާފައެވެ.