ކުރީގެ ރައީސް ޢަބްދުﷲ ޔާމީންގެ މައްޗަށް ތަހުޤީގުކޮށް ދަޢުވާކުރަން ފޮނުވާފައިވާ މައްސަލައެއްގައި ދެވަނަ ފަހަރަށް ޖިނާޢީ ތަހުޤީގުކުރަން މަސައްކަތްކުރާކަމަށް ބުނެ އެމަނިކުފާނުގެ ޤާނޫނީ ވަކީލުންގެ ޓީމުން އެމައްސަލައިން ތަނާޒުލްވެއްޖެއެވެ.
އެމްއެމްޕީއާރުސީގެ ޚިޔާނާތާ ގުޅުންހުރި މައްސަލައެއްގައި ރައީސް ޔާމީނާ ސުވާލުކޮށް ބަޔާން ނަގުމަށް އިއްޔެއާއި މިއަދުވެސް އެމަނިކުފާނުވަނީ ފުލުހުންގެ މައި އިދާރާ ޝަހީދު ޙުސައިން އާދަމް ބިލްޑިންގއަށް ހާޒިރުކޮށްފައެވެ.
ނޫސްވެރިންނަށް މަޢުލޫމާތުދެއްވަމުން ރައީސް ޔާމީންގެ ޤާނޫނީ ވަކީލުންގެ ޓީމުން ވިދާޅުވީ، އެމަނިކުފާނު މި ދެދުވަހު ފުލުހުންގެ އިދާރާއަށް ހާޒިރުކޮށްފައިވަނީ ވ.އާރަށް ވިއްކާލައިގެން ލިބުނު ފައިސާ އެމަނިކުފާނުގެ އެކައުންޓަކަށް ޖަމާ ކުރެއްވި ކަމަށް ބުނާ މައްސަލައެއްގައިކަމަށެވެ. ވަކީލުންގެ ޓީމުން މިއަދުވަނީ ފުލުހުން އެ މައްސަލައިގެ ތަހުޤީގު ކުރިއަށް ގެންދަނީ ޤާނޫނާ ޚިލާފަށްކަމަށް ވިދާޅުވެ މައްސަލައިން ތަނާޒުލް ވެފައިވާކަން ހާމަކުރައްވާފައެވެ.
ޤާނޫނީ ވަކީލުންގެ ޓީމުގެ ފަތާރުން ޑރ.މުޙައްމަދު ޖަމީލު އަހުމަދު ވިދާޅުވީ، ކުރިން ނިންމާފައިވާ މައްސަލައެއްގައި އަލުން ޤާނޫނީ އިންޒާރުދީގެން ބަޔާން ނަގަން އުޅުމުން، އެކަމުގެ ގާނޫނީ ހުއްޖަތް ދެއްކުމަށް ފުލުހުންގެ ކިބައިން އެދިވަޑައިގަތްނަމަވެސް ފުލުހުން އެކަމަށް ފުރުސަތު ދީފައިނުވާކަމަށެވެ.
އެހެންކަމުން މިހާރު ހިންގަނީ ތަޙުޤީގުކޮށް ދައުވާ ކުރަން ފޮނުވާފައިވާ މައްސަލަކަމަށްވުމުން އެއީ ދެ ވަނަ ފަހަރަށް ޖިނާޢީ ތަހުގީގެއް ހިންގަން ގާނޫނު ތަންނުދޭތީ ހުރިހާ ވަކީލުންވެސް ތަޙުގީގުގެ މަޖިލީހުން ތަނާޒުލްވީކަމަށް ޑރ.ޖަމީލް ވިދާޅުވިއެވެ.
ވ.ތިނަދޫ ކައިރީގައި އޮންނަ އާރަށް އަމިއްލަ ކުންފުންޏަކަށް ދީފައިވަނިކޮށް 2015ވަނަ އަހަރު އެރަށްވަނީ އެއަތޮޅު ފެލިދޫ ކައުންސިލާ ހަވާލުކޮށްފައެވެ. އަދި ޓޫރިސްޓް ރިސޯޓެއްގެ ގޮތުގައި އެރަށް ތަރައްގީކުރުމަށް ޓޫޖީ މޯލްޑިވްސް ކިޔާ ކުންފުންޏަކާވަނީ ފަހުން ހަވާލުކޮށްފައެވެ. އަދި އޭގެ ފަހުންވަނީ އެރަށް ބޭރުގެ ކުންފުންޏަކަށް ވިއްކާވެސްލާފައެވެ. މައުލޫމާތު ލިބިފައިވާ ގޮތުން މި މިމައްސަލައިގައި ހިމެނޭ ރަށް ވިއްކައިގެން ލިބުނު ފައިސާ ރައީސް ޔާމީންގެ އަމިއްލަފުޅު އެކައުންޓަކަށް ޖަމާކޮށްފައިވާކަން ހާމަވެފައިވަނީ އެމްއެމްޕީއާރްސީގެ ބޮޑު ޚިޔާނާތުގެ ތަހުޤީގުގެ ތެރެއިންނެވެ.
އެއްމިލިޔަން ޑޮލަރުގެ މައްސަލާގައި ރައީސް ޔާމީންގެ މައްޗަށް ދައުވާކުރުމަށް ފޮނުވާފައި މިވަނީ މަނީލޯންޑަރިންގެ ކުށް ސާބިތުވެ، އެމަނިކުފާނުގެ މައްޗަށް 2019ވަނަ އަހަރު 5 އަހަރުގެ ޖަލު ހުކުމެއް އިއްވައި އެޙުކުން ތަންފީޒުކުރައްވަމުން ގެންދަވަނިކޮށެވެ. ދަށުކޯޓުގެ އެ ނިންމުން ހައިކޯޓުގައި އިސްތިއުނާފުކުރުމަށްފަހު ރައީސް ޔާމިންގެ ފަރާތްޕުޅުން މިހާރުވަނީ އިސްތިއުނާފްކުރުމަށް ސުޕްރީމް ކޯޓަށްވެސް ހުށައަޅާފައެވެ.