"ބާގް މީކާ ބާގް" ފާހަގަކުރެވިފައިވަނީ ހިންދީ ސިނަމާގައި ދެއްކި އެންމެ ހިތްގައިމް ބަޔޯޕިކްގެ ގޮތުގައެވެ.
އިންޑިއާގެ ލެޖެންޑްރީ އެތްލީޓް މީކާ ސިންގް ގެ މައްޗަށް ހަދާފައިވާ މި ފިލްމުގެ ލީޑްރޯލުން މީކާ ސިންގްގެ ގޮތުގައި ފެނިގެންދިޔައީ އެކްޓަރ ފަރްޙާން އަޚްތަރުއެވެ.
މި ފިލްމު ޑައިރެކްޓްކޮށްފައިވަނީ ރާކޭޝް އޮމްޕްރަކާޝް މެހެރާއެވެ. ސޯނަމް ކަޕޫރު، ދިވްޔާ ދައްތާ، ޔޯގްރާޖް ސިންގް، ޕަވަން މަލޯތްރާ އަދި އާރޓް މާލިކް މުހިންމު ރޯލުތަކުން ފެނިގެންދިޔަ މި ފިލްމުގެ ސްކްރިޕްޓް ލިޔެފައިވަނީ ޕްރަސޫން ޖޯޝީއެވެ.
2010 ވަނަ އަހަރު ދެއްކި ހިޓް ފިލްމު "ބޭންޑް ބާޖާ ބާރާތް" އިން ފިލްމީ ކެރިއަރ ފެށި ރަންވީރު ސިންގް އަކީ ބޮލީވުޑްގައި މިހާރު ވިދަމުންދާ އެއް ތަރިއެވެ. "ބާގް މީކާ ބާގް" ގެ ލީޑްރޯލަށް އޮޑިޝަންގައި ބައިވެރިވި ތަރިންގެ ތެރޭގައި ރަންވީރު ވެސް ހިމެނެއެވެ. ފިލްމުގެ ޑައިރެކްޓަރ ރާކޭޝް ބުނެފައިވާ ގޮތުގައި ރަންވީރު އޮޑިޝަންގައި ބައިވެރިވިނަމަވެސް ފަރްހާނަށް ފިލްމު ދިނީ އެނާގެ ލޮލަށް ބަލާފައިކަމުގައެވެ.
އޮޑިޝަނުން 3 މީހަކު ޝޯޓް ލިސްޓް ވީއިރު އެތަނުން އެކަކީ ރަންވީރު އެވެ. ދެން އައީ ފަރްޙާން އަދި ނިތޭޝް ކިޔާ މީހެކެވެ. ނަމަވެސް ފަރުޙާން މި ރޯލު ދިނީ އޭނާގެ މަޑުމައިތިރިކަމުން ކަމަށް ރާކޭޝްވަނީ ބުނެފައެވެ.
މީގެއިތުރުން ފަރްޙާން އަކީ އަސްލު ޢުމުރުގެ ގޮތުން ބަލާއިރު މި ރޯލަށް ފިޓް މީހެއް ނޫންކަމަށްވެސް ރާކޭޝްވަނީ ބުނެފައެވެ. މީކާ ސިންގް ފިލްމުގައި ދައްކަނީ އޭނާގެ 20 ގެ އަހަރުތަކުގެ ތެރޭގައި އުޅެނިކޮށްކަމަށްވާއިރު ފަރްޙާން އޮޑިޝަން ދިން އިރު ޢުމުރަކީ 36 އަހަރެވެ.
ރާކޭޝް އާއި ފަރްޙާން އަނެއްކާވެސް އަންނަނީ އެކުގައި މަސައްކަތް ކުރަމުންނެވެ. ސްޕޯރޓްސް ފިލްމު 'ޠޫފާން' މަސައްކަތް ނިންމާ މި ފިލްމު މިމަހުގެ 16 ވަނަދުވަހު ރިލީޒްކުރުމަށް މި ޓީމުން އަންނަނީ މަސައްކަތް ކުރަމުންނެވެ.