އަނޫރާގް ކަޝަޕް ޑައިރެކްޓްކޮށް 2018 ވަނަ އަހަރު ދެއްކި ރޮމޭންޓިކް ޑްރާމާ ފިލްމު "މަންމަރުޒިޔާން" އަށްފަހު ތާޕްސީ އާއި އަނޫރާގް އެކުގައި މަސައްކަތް ކުރާ ފިލްމަކީ މިހާރު މަސައްކަތް ފަށާފައި އޮތް "ދޮބާރާ" އެވެ.
ކޯވިޑްގެ ބަލިމަޑުކަމުގެ ތެރޭގައި ޝޫޓިންތައް ކުރިއަށް ގެންގޮސްފައިވާ މި ފިލްމަކީ ސްޕެނިޝް މިސްޓްރީ ޑްރާމާ "މިރާޖް" ގެ ރީމޭކެކެވެ. "މިރާޖް" އަސްލަކަށް ބަލައިގެން މި ވާހަކަ ހިންދީ އޯޑިއަންސަށް ފެތޭ ގޮތަށް ފައްކާކޮށްފައިވަނީ ނިހިތް ބާވޭއެވެ.
ފިލްމުގައި ތާޕްސީއާއެކު ދެން ފެނިގެންދާނީ އެނާއާއެކު ފިލްމު "ތައްޕަޅު" ގައި ފެނިގެންދިޔަ ޕަވައިލް ގުލާތީ އެވެ. އޮރިޖިނަލް ފިލްމު "މިރާޖް"ގައި ފެނިގެންދިޔަ ތަރިންނަކީ އަދްރިއާނާ އުގަރްތޭ، އަލްވާރޯ މޯޓޭ، ލޫން ފްލްގެންސިއޯ، އަދި ސިލްވިއާ އަލޮންސޯއެވެ.
"ދޮބާރާ" ޕްރޮޑިއުސް ކުރަނީ އެކްތާގެ ކަލްޓް މޫވީސް، ސުނީރު ކެތްރަޕާލްގެ އަތޭނާ އަދި ގޯރަވް ބޯސްގެ ދަ ވާރމިލަން ވޯރލްޑް ޕްރޮޑަކްޝަނުންނެވެ.
އަޖޭ ބާލް ޑައިރެކްޓްކުރާ ތާޕްސީގެ ކުރިއަށް އޮތް ފިލްމަކީވެސް ސްޕެނިޝް ފިލްމު "ޖޫލިއާސް އައިސް" ގެ ރީމޭކެކެވެ. އަދި މީގެކުރިން ތާޕްސީ ކުޅެފައިވާ ފިލްމު "ބަދްލާ" އަކީވެސް ސްޕެނިޝް ރީމޭކެކެވެ.