ކަރަން ޖޯހަރުގެ ފިލްމުތަކަކީ އަބަދުވެސް ގިނަ ތަރިންތަކެއް ހިމަނައިގެން ހަދާ ފިލްމުތަކެކެވެ. އަމީތާބް ބައްޗަން، ޖަޔާ ބައްޗަން، ޝާހުރުކްޚާން، ކާޖޮލް އަދި ރިތިކް ރޯޝަން އާއެކު 2001 ވަނަ އަހަރު ނެރުނު މެލޯ ޑްރާމާ "ކަބީ ޚުޝީ ކަބީޤަމް" އަކީ މީގެ މިސާލެކެވެ.
ކަރަންގެ އަންނަ އޮތް ފިލްމަކީވެސް ލީޑް ރޯލުން މަޝްހޫރު ގިނަ ތަރިންތަކެއް ފެނިގެންދާނެ ފިލްމެއްކަމުގައި އިންޑިއާގެ ނޫސްތަކުން ބުނެއެވެ.
ބޮޑު ކާސްޓެއް ހިމަނައިގެން ކަރަން އުފައްދާ މި ފިލްމުގައި ދަރުމެންދުރަ، ޖަޔާބަޗަން، ޝަބާނާ ޢާޒްމީ، ރަންވީރު ސިންގް އަދި ޢާލިއާ ބަޓް ފެނިގެންދާނެކަމަށް ހަބަރުތައް ބުނެއެވެ. ބޮޑު ކާސްޓެއް ހިމަނައިގެން އުފައްދާ ފެމެލީ ޑްރާމާ މި ފިލްމުގައި އާއިލީ ވަރުގަދަ ޖަޒުބާތުތަކެއް ފެނިގެންދާނެކަމަށް ފިލްމުގެ ޕްރޮޑަކްޝަން ޓީމުން ބުނެއެވެ. މީ ކޮން ނަމެއް ކިޔާ ފިލްމެއްކަމެއް އަދި ނޭގެއެވެ. އެހެންނަމަވެސް ފިލްމުގެ ނަން ގުޅޭނީ މި ފިލްމުގައި ރަންވީރާއި އާލިއާ ކުޅޭ ކެރެކްޓަރގެ މައްޗަށްކަމަށް ވެއެވެ.
ހަ ވަރަކަށް މަހުގެ ޝޫޓިން ޝެޑިއުލަކާއި މި ފިލްމުގެ މަސައްކަތް ސެޕްޓެމްބަރުމަހު ފަށަން ކަރަން ޕްލޭން ކުރާކަމަށްވެސް ޓީމުން ބުނެއެވެ.
މި ފިލްމުގެ ބައެއް ކާސްޓުންނާއި ފިލްމުގެ ނަން މިއަދު ރަސްމީކޮށް އިއުލާންކުރާނެކަމަށްވެސް ބޮލީވުޑް ހަބަރުތައް ގެނެސްދޭ އިންޑިއާގެ ނޫސްތަކުން ބުނެއެވެ.
ކަރަން އަލުން ޑައިރެކްޝަނަށް މި އަންނަނީ 5 އަހަރު ފަހުންނެވެ. ކަރަން އެންމެފަހުން ޑައިރެކްޓްކޮށްފައިވަނީ ރަންބީރު ކަޕޫރު އަދި އަނުޝްކާ ޝަރުމާ ފެނިގެންދިޔަ "އޭ ދިލްހެ މުޝްކިލް" އެވެ. އަދި އަލަށް ކަރަން ފަށާ މި ފިލްމު ވެގެންދާނީ ދަރުމެންދުރައާއި އެކުގައި އެނާ މަސައްކަތްކުރާ ފުރަތަމަ ފިލްމަށެވެ.