ކާމިޔާބު ތަރިން ޑައިރެކްޓަރުންނާއި ޕްރޮޑިއުސަރުންނަށް ވުމަކީ ބޮލީވުޑްގައި ވަރަށް އާއްމުކަމަކެވެ. މި ލިސްޓަށް އަނެއްކާވެސް މިވަނީ އައު ނަމެއް އިތުރުވެފައެވެ. ބޮލީވުޑްގެ ހިރޯއިންގެ ލިސްޓުގައި ހިމެނޭ ކާމިޔާބު ތަރިންގެ ތެރެއިން އާލިއާ ބަޓްވެސް މިވަނީ ފިލްމެއް ޕްރޮޑިއުސްކުރަން ނިންމާ އެކަން އިއުލާންކޮށްފައެވެ.
އާލިއާ ޕްރޮޑިއުސްކުރާ ފުރަތަމަ ފިލްމަށް ދީފައިވާ ނަމަކީ ":ޑާލިންގްސް" އެވެ. މި ފިލްމުގެ ޝޫޓިންގެ ތެރެއިން ވެނިޓީ ވޭނެއްގައި އާލިއާ އިން ފޮޓޯއެއް ޙިއްޞާކުރަމުން އާލިއާ ބުނީ ފުރަތަމަ ޕްރޮޑަކްޝަން ކަމަށްވުމުން ވަރަށް ހިތް ބިރުގަންނަ ކަމަށެވެ. އަދި މިއީ ޕްރޮޑިއުސަރަކަށްވާ ފުރަތަމަ ފަހަރު ކަމަށްވިޔަސް އޭނާ އަބަދުވެސް ފެންނާނީ އެކްޓަރެއްގައި ގޮތުގަކަމަށް އާލިއާ ބުނެއެވެ.
ޝާހުރުކުޚާންގެ ޕްރޮޑަކްޝަން ހައުސް ރެޑް ޗިލީޒް އާއި އާލިއާގެ އެޓާރނަލް ސަންޝައިން ޕްރޮޑަކްޝަން ގުޅިގެން ހަދާ މި ފިލްމުގައި އާލިއާވެސް ފެނިގެންދާނެއެވެ. އާލިއާގެ އިތުރުން ޝެފާލީ ވިޖޭ އަދި ރޯޝަން ވެސް މި ފިލްމުން ފެނިގެންދާނެއެވެ.
މި ފިލްމު ޑައިރެކްޓަރަކީ "ޕަތީ ޕަތްނީ އޯ ވޯ" އަދި "ފޯސް 2"ގެ ޑައިރެކްޓަރ ޖެސްމީތް ކޭ ރީން އެވެ. ފިލްމުގެ ޝޫޓިންތައް މިހާރު ވަނީ ފަށާފައެވެ.
ސަންޖޭ ލީލާ ބަންސާލީގެ "ގަންގޫބާއީ ކާތިއާވާދީ" ގެ މަސައްކަތް ދާދިފަހުން އާލިއާ ވަނީ ނިންމާލާފައެވެ. މީގެއިތުރުން ލޯބިވެރިޔާ ރަންބީރު ކަޕޫރާއެކު އާލިއާ ފުރަތަމަ ފަހަރަށް ސްކްރީނުން ފެންނާނެ "ބްރަމަސްތްރާ" އަދި ރާމްޗަރަން އާއި ޖޭއާރް އެންޓީއާރްގެ ފިލްމު "އާރްއާރް" އަކީވެސް އާލިއާގެ ކުރިއަށް ހުރި ފިލްމުތަކެވެ.