ބޮލީވުޑް އެކްޓަރ ފަރުހާން އަޚްތަރު އަދި ސިދްވާނީ ޕްރޮޑަކްޝަނުން ހަދާ ސީރީޒް "ޑޮންގްރީ ޓު ދުބާއީ" ގެ ޝޫޓިންތައް ފެށި ނަމަވެސް އެ ހުރަސްތައް ކުރިމަތިވެ ސީރީޒްގެ މަސައްކަތް މިވަނީ ކުރިޔަށް ނުގެންދެވިފައެވެ.
ކޯވިޑް ބަލިމަޑުކަމުގައި ފުރަތަމަ ފަހަރަށް އިންޑިއާ ލޮކްޑައުން ކުރުމުގެ ކުރިން ސީރީޒްގެ ބައެއް މަންޒަރުތައް ފުރަތަމަ ޝޫޓްކުރަން ފެށީ މުމްބާއީގެ މަޑް އައިލޭންޑްގައި ހަދާފައިހުރި ސެޓްގައެވެ. އެހެންނަމަވެސް ގިނަ ދުވަސްތަކެއް ވަންދެން އެތައް ބޭނުންނުކޮށް ހުރުމުން މިދިޔަ އަހަރުގެ މޭމަހު އަލުން ޝޫޓިންތައް ފަށަން ބެލއިރު ސެޓް ހުރީ ވަރަށް ބޮޑަށް ހަލާކުވެފައެވެ.
ސެޓަށް ލިބިފައި ހުރު ގެއްލުންތައް މިދިޔަ ޖަނުއަރީ މަހު އަލުން މަރާމާތުކޮށް ދެވަނަ ފަހަރަށް ޝޫޓިންތައް ފެށުމަށް ތައްޔާރުވިއެވެ. އެހެންނަމަވެސް ސީރީޒް ޑައިރެކްޓަރ ކޯވިޑަށް ޕޮޒިޓިވްވުމުން އަނެއްކާވެސް ޝޫޓިންތައް ހުއްޓި މުޅި ޕްރޮޑަކްޝަން ޓީމް ކަރަންޓީނަށް ދާންޖެހުނެވެ.
ގިނަ ބަޔަކު ބޭނުންކޮށްގެން ގިނަ މަންޒަރުތަކެއް ނަގަންޖެހޭ މި ސީރީޒްގެ 40 ހަކަށް ދުވަހުގެ ޝޫޓިން އަދި ނުނިމި އެބައޮތެވެ. މި ސީރީޒްގެ ބައެއް ދުބާއީގައި ނަގަންޖެހޭއިރު އެ މަންޒަރުތައްވެސް އަދިވަނީ ނުނިމިއެވެ.
އިންޑިއާގެ ލިޔުންތެރިޔާ އަދި ކުރީގެ ތަޙުޤީޤީ ނޫސްވެރިޔާ ޙުސައިން ޒައިދީގެ ފޮތް "ޑޮންގްރީ ޓު ދުބާއީ: ސިކްސް ޑީކޭޑްސް އޮފް ދަ މުމްބާއީ މާފިއާ" އަސްލަކަށް ބަލައިގެން މުމްބާއީގެ ޑޮންގްރީގައި އުޅުނު އަންޑަރވޯރލްޑް ޑޯން ދާއޫދު އިބްރާހީމް ގެ މައްޗަށް ހަދާ މި ސީރީޒްގެ މަސައްކަތް ދެން ފަށާނީ އިންޑިއާގައި މިހާރު އޮތް ވިއްސާރަ މޫސުން ނިންމުމުންކަމަށްވެސް ޕްރޮޑަކްޝަން ޓީމުން ބުނެއެވެ.
ސުޖާތު ސައުދާގަރު ޑައިރެކްޓްކުރާ މި ސީރީޒުން އަވިނާޝް ތިވާރީ، ކޭ ކޭ މެނޮން، ޖިތިން ގުލާޓީ، އަމީރާ ދަސްތޫރީ އަދި ކްރިތިކާ ކަމްރާ ފެނިގެންދާނެއެވެ.