މުނިފޫހިފިލުވުމުގެ ދާއިރާއިން މި ހަފްތާގެ ލިބުނު ޚަބަރުތަކުން ބޮޑު އެއް ޚަބަރަކަށް ވެގެންދާނީ ބޮލީވުޑް އެކްޓަރ ރަންވީރުގެ ސިންގުގެ ބޮޑު ޕްރޮޖެކްޓަކާއި އެކު ނެޓްފްލިކްސަށް އަންނަން އުޅޭ ޚަބަރެވެ.
ރަންވީރުގެ މިފަހަރު ފެނިގެންދާނީ އިނގިރޭސިވިލާތުގެ އެޑްވެންޗަރ/ލިޔުންތެރިޔާ/ޕްރެޒެންޓަރ ބިއަރ ގްރިލްސް އާއެކު އުފައްދާ ނޮން ފިކްޝަން ޝޯއަކުންނެވެ. ދުނިޔޭގެ އެކި ކަންކޮޅުން ނެޓްފިލްކްސާއި ގުޅިގެން އުފެއްދުންތައް އުފައްދަމުން އަންނައިރު ރަންވީރާއި ބިއަރ ގްރިލްސްގެ މި ޝޯއަކީ ނެޓްފިލްކްސުން އުފައްދާ އެންމެ ބޮޑު ޝޯއަށް ވެގެންދާނެއެވެ.
ނެޓްފިލްކްސާއި ގުޅިގެން މި ޝޯ އުފެއްދުމަށް ބިއަރ ގްރިލްސް ވާހަކަ ދައްކަމުން އަންނަތާ ދުވަސްކޮޅެއް ވެއްޖެކަމަށް ޚަބަރުތައް ބުނެއެވެ. އަދި މިޝޯއަށް ރަނގަޅު ތަރިއެއް ހޯދަމުންދަނިކޮށް މިކަމަށް އެންމެ ކަމުދަނީ ރަންވީރުކަން ފާހަގަކުރެވި އެ ހުށައެޅުން އެނާއަށް ހުށައެޅީކަމަށްވެސް މީޑިއާ ރިޕޯޓްތައް ބުނެއެވެ.
މިޝޯގެ ނަން އަދި ހާމަނުކުރި ނަމަވެސް އަންނަ މަހު ޝޯގެ ޝޫޓިންތައް ފެށުމަށް އަންނަނީ ތައްޔާރުވަމުންނެވެ. ބައެއް ބިރުވެރި ނުރައްކާތެރި ސްޓަންޓްތައް ރަންބީރު ހަދަންޖެހޭ މި ޝޯގެ ޝޫޓިންތައް ކުރިޔަށްދާނީ ސައިބީރިއާގައެވެ. އަދި އޮގަސްޓް މަހުގެ ނިޔަލަށް މި ޝޫޓިންތައް ކުރިޔަށް ދާނެކަމަށް ބެލެވެއެވެ.
ރަންވީރުގެ ކުރިއަށްހުރި މަސައްކަތްތަކުގެ ތެރޭގައި އާލިއާ ބަޓާއި އެކު ރަންވީރު ލީޑް ރޯލުން ފެނިގެންދާ ކަރަން ޖޯހަރްގެ ޑައިރެކްޓްކުރާ ފިލްމު ގެ ޝޫޓިން ފަށަން މިހާރުވަނީ ތައްޔާރުވެފައެވެ. މީގެއިތުރުން ޝަންކަރު ޑައިރެކްޓްކުރާ "އަނިޔާން" ގެ ހިންދީ ރީމޭކްވެސް ކުރިއަށް އެބައޮތެވެ. ރަންވީރު ފެނިގެންދާ ފިލްމު "83"، "ޖަޔޭޝްބާއި ޖޯރުދާރު" އަދި ރޯހިތް ޝެޓީގެ "ސާރކްސް" ވެސް އޮތީ ސިނަމާތަކުގައި ރިލީޒްކުރުމުގެ މަގުމަތީގައެވެ.