2019 ވަނަ އަހަރުގެ ޖުލައި މަހު ރިލީޒްކުރި ޑާކްރެއިން އެންޓަޓެއިންމަންޓުގެ ކާމިޔާބު ފިލްމު "މާމުއި" ވެގެންދިޔައީ ބެލުންތެރިންގެ މެދުގައި ވަރަށް ބޮޑަށް މަގްބޫލު ފިލްމަކަށެވެ.
ފިލްމުގެ ޑައިލޮގްތަކަކީ ގިނަ ބަޔަކަށް ކަމުދިޔަ ޑައިލޮގްތަކެވެ. އެކަން އެގުނީ ފިލްމު ރިލީޒްވުމާއި އެކު ފިލްމުގެ ޑައިލޮގްތަކުން ސޯޝަލް މީޑިއާގައި މުއާމަލާތުކުރަން ފަށާފައެވެ. މި ފިލްމު ސްކްރީންނުން ނެގި ނަމަވެސް ގިނަ ބަޔަކު އަދިވެސް ތިބީ މި ފިލްމު ބަލާލަން ބޭނުންވެފައެވެ.
ފިލްމަށް އިންތިޒާރުކުރާ މީހުންނަށް ޑާކްރެއިނުން މިވަނީ އަންނަ އީދަށް އުފާވެރި އީދު ހަދިޔާއެއް ދީފައެވެ. ފިލްމު ބަލާލަން ބޭނުން މީހުންނަށް އަންނަ މަހުގެ 19 ވަނަދުވަހު އަލުން ފިލްމު ބަލާލެވޭނެކަމުގެ އުފާވެރި ހަބަރު ދީފައއެވެ.
އަންނަ އަޟްހާ އިދާ ދިމާކޮށް "މާމުއި" މިފަހަރު ފެނިގެންދާނީ މީޑިއާ ނެޓްގެ މަލްޓި ސްކްރީނުންނެވެ. "މާމުއި" އަކީ އައިޝަތު ފުއާދާއި އަހްމަދު ތަލާލްގެ ސްކްރިޕްޓެކެވެ. މުހައްމަދު އަލީ (މޮގާ) ޕްރޮޑިއުސްކުރި މި ފިލްމުގެ ޑައިރެކްޓަރަކީ އަލީ ޝިފާއު (ޗިއްޕެ)އެވެ.
މި ފިލްމުގެ ތަރިންގެ ތެރޭގައި މަރިޔަމް އައްޒަ، ޖުމައްޔިލް ނިމާލް، އަޙްމަދު ސައީދު، މަރިޔަމް މަޖުދާ، ޝީލާ ނަޖީބު، ނުޒުހަތު ޝުއައިބު، މުހައްމަދު ފައިސަލް، އަހްމަދު ސުނީ ހިމެނެއެވެ. މީގެއިތުރުން މި ފިލްމުގެ މުހިއްމު ރޯލަކުން ކުރީގެ މަޝްހޫރު ތަރި އިސްމާއިލް ވަޖީހާއި ފިލްމެ ޑައިރެކްޓަރ ޗިއްޕެގެ އަންހެނުން އައިޝަތު ޔަދާވެސް ފެނިގެންދައެވެ.
ޑާކްރެއިނުން ވަނީ "މާމުއި"ހެ ޕްރީކުއަލްގެ މަސައްކަތް ފަށާކަން އިއުލާންކޮށްފައެވެ. އެ ފިލްމަށް ދީފައިވާ ނަމަކީ " ފައްކަލޭ" އެވެ.