ބޮލީވުޑް ލެޖެންޑު ދަރުމެންދުރާގެ ޢާއިލާގެ ގިނަ މެމްބަރުތަކެއް ފެނިގެންދިޔަ 2007 ވަނަ އަހަރު ދެއްކި ސްޕޯރޓްސް ޑްރާމާ ފިލްމު "އަޕްނޭ" ގެ ސީކުއަލް "އަޕްނޭ 2" ރީލީޒްކުރުން މި އޮތީ އަންނަ ސެޕްޓެމްބަރުމަހަށް ތާވަލުކޮށްފައެވެ.
ފިލްމުގެ މަސައްކަތްތަކުގެ ތެރެއިން މިފިލްމުގެވެސް މިޔުޒިކް ހަދާނީ އޮރިޖިނަލް ފިލްމު "އަޕްނޭ" ގެ ކޮމްޕޯސަރ ހިމޭޝް ރޭޝްމިޔާއެވެ.
ދަރުމެންދުރާ، ސަނީ ޑިއޯލް، ބޮބީ ޑިއޯލް އަދި ސަނީ ޑިއޯލްގެ ދަރިފުޅު ކަރަން ޑިއޯލްވެސް ފެނިގެންދާ މި ފިލްމުގެ ސްކްރިޕްޓް އަދި މުޅިން ނިމުމަކަށް ނާންނައިރު އިންޑިއާގެ މިހާރުގެ ޙާލަތަށް ބަލައި ފިލްމުގެ މަސައްކަތް އަދި ވަނީ ނުފެށިއެވެ.
އޮރިޖިނަލް ފިލްމުގެ ވާހަކަވެސް ލިޔެފައިވާ ނީރްޖާ ޕަތަކް ފައްކާކޮށްފައިވާ ފިލްމުގެ ސްކްރިޕްޓަށް އިތުރު ބަދަލުތަކެއް ގެންނަން މިހާރު ނިންމާފައިވާއިރު މި ފިލްމަކީ ވަރަށް އަސަރުގަދަ ފިލްމަކަށް ވާނެކަމަށް ޑައިރެކްޓަރު އަނިލް ޝަރުމާ ބުނެއެވެ.
ފިލްމުގެ މަންޒަރުތައް ނެގުމަށް ހަމަޖެހިފައިވަނީ ލަންޑަން އަދި ޕަންޖާބުގައެވެ. އަދި އޮރިޖިނަލް ފިލްމަށްވުރެ މި ފިލްމުގެ މަސައްކަތް ރަގަޅުކުރަން މަސައްކަތްކުރާނެކަމަށްވެސް ޑައިރެކްޓަރ ވަނީ ބުނެފައެވެ.
ހިމޭޝް ރޭޝްމިޔާ މި ސީކުއަލްއަށް މިޔުޒިކް ހަދާއިރު އަކްޝޭ ކުމާރު ލީޑް ރޯލުން ފެނިގެންދާ ފެމިލީ ޑްރާމާ "ރަކްޝާ ބަންދަން" ގެ މިޔުޒިކްވެސް ހަދާނީ ހިމޭޝްކަމުގައި ޚަބަރުތައް ބުނެއެވެ.