އެމެރިކާގެ ޑައިރެކްޓަރ ކުއެންޓިން ޓަރަންޓީނޯގެ ކްލެސިކްސްގެ ތެރެއިން 2003 ވަނަ އަހަރު ދެއްކި "ކިލް ބިލް" ގެ ރައިޓްސް ހޯދުމަށް ބޮލީވުޑް ޕްރޮޑިއުސަރ ނިކިލް ދިވޭދީ ވާހަކަ ދައްކާފައި އޮންނަތާ ދުވަސްގަނޑެއް ވެއްޖެއެވެ.
އޭގެފަހުން މިހާރު މި ލިބުނު ހަބަރަކީ މި ފިލްމުގެ މަސައްކަތް ފެށުމުގެ މަގުމަތީގައިވާ ހަބަރެވެ.
މި ފިލްމުގެ ލީޑް ރޯލުން ފެނިގެންދާނީ "ރާބަތާ" ގެ ތަރި ކްރިތީ ސެނޮންކަމަށް އިންޑިއާގެ ނޫސްތަކުން ބުނެއެވެ. އޮރިޖިނަލް ފިލްމުގެ ބަޠަލާއެއްގެ ރޯލުން ފެނިގެންދިޔައީ އުމާ ތުރުމާން އެވެ. ފިލްމުގެ ސްކްރިޕްޓް ނިންމާ މިހާރު މަސައްކަތްކުރަމުންދަނީ ކާސްޓިން ނެގުމުގެ މަސައްކަތް ކަމަށްވެސް މީޑިއާ ރިޕޯޓްތައް ބުނެއެވެ.
އަނޫރާގް ކަޝަޕް ޑައިރެކްޓްކުރާ މި ރީމޭކަކީ ފުރަތަމަ ފަހަރަށް ކްރިތީގެ ވަރުގަދަ އެކްޝަން ސީންތަކެއް ފެނިގެންދާނެ ފިލްމެކެވެ. އަދި ކްރިތީ ދަނީ މިކަމުގެ ތައްޔާރީތައް ވަމުންކަމަށްވެސް ހަބަރުތައް ބުނެއެވެ. ކްރިތީގެ އިތުރުން އިތުރު އަންހެން ދެ ތަރިންވެސް މި އެކްޝަން ތްރިލަރ އިން ފެނިގެންދާނެއެވެ.
މި ފިލްމުގެ ޝޫޓިންތައް ފަށާނެ ދުވަހެއް އަދި ނޭގެއެވެ. ކްރިތީގެ ކުރިއަށް އޮތް ފިލްމަކީ ސައިފް ޢަލީ ޚާން އަދި ޕްރަބާޝް އާއެކު ފެނިގެންދާ "އަދިޕުރޫޝް" އެވެ.
"ކިލް ބިލް" ގެ އިތުރުން ނިކިލް އަންނަނީ ޝަރުދާ ކަޕޫރާއެކު މި ޒަމާނަށް ފައްތައިގެން ނާގިންގެ އައު ފިލްމެއް ހެދުމުގެ މަސައްކަތް ކުރަމުންނެވެ. ޑައިރެކްޓަރ އަނޫރާގް ކަޝަޕްގެ އަންނަންހުރި ފިލްމުތަކުގެ ތެރޭގައި "ކާގޯ" ، "ދޮބާރާ" ، "ގުލާބު ޖާމޫން" އަދި "ބަމްފާދު" ހިމެނެއެވެ.