އަކްޝޭ ކުމާރު އަނެއްކާވެސް ސާޖިދު ނަދިއާދްވާލާ ެކު މަސައްކަތް ކުރަން ތައްޔާރުވެއްޖެއެވެ. މިހާރު ރިލީޒްވުމަށް ތައްޔާރުވަމުން އަންނަ އެކްޝަން ކޮމެޑީ ފިލްމު "ބައްޗަން ޕާންޑޭ" އަކީވެސް ޕްރޮޑިއުސަރ އަދި ޑައިރެކްޓަރ ސާޖިދުގެ ފިލްމެކެވެ. އަކްޝޭ ވަނީ ސާޖިދާއި އެކު 10 ފިލްމެއްގައި މަސައްކަތް ކޮށްފައެވެ.
ސާޖިދުގެ މި ފަހަރުގެ ފިލުމަށް އަދި ހަމަޖައްސާފައިވަނީ އަކްޝޭ ގެ އިތުރުން މަޝްހޫރު ތަރި ސުނިލް ޝެޓީގެ ފިރިހެން ދަރިފުޅުން އަހާން ޝެޓީއެވެ. އިތުރު އެއްވެސް ކާސްޓެއް އަދި މިހާތަނަށް މި ފިލްމަށް ނަގާފައި ނުވާއިރު ފިލްމުގެ މާބޮޑު ވާހަކަތަކެއްވެސް އަދި ނުދެކެވެއެވެ. އެހެންނަމަވެސް މި ފިލްމަށް ތަފާތު ކާސްޓުން ނަގަން ސާޖިދު ވިސްނާކަމަށް ޕްރޮޑަކްޝަން ޓީމުން ބުނެއެވެ.
އަހާންގެ ބައްޕަ ސުނިލް ޝެޓީއާއެކު އަކްޝޭ ވަނީ ކާމިޔާބު ފިލްމުތަކެއްގައި މަސައްކަތްކޮށްފައެވެ. "ވަޤުތު ހަމާރާ ހޭ" "މޮހޮރާ" "ހީރާ ޕޭރީ" "ދަޅްކަން" އަދި "އަވާރާ ޕާގަލް ދީވާނާ" ފަދަ ފިލްމުތަކަކީ ދެ ތަރިން އެކުގައި މަސައްކަތްކޮށްފައިވާ ފާހަގަކޮށްލެވޭ ފިލްމުތަކެވެ.
ސާޖިދު އޭނާ ޕްރޮޑިއުސްކޮށް މިލާން ލުތްރިއާ ޑައިރެކްޓްކުރާ "ތަޑަޕް" އިން އަހާން ލޯންޗު ކުރަން ނިންމާފައިވާއިރު މި ފިލްމު އަންނަ ސެޕްޓެމްބަރު މަހު ރިލީޒްކުރަން މިހާރުވަނީ ތާވަލުކޮށްފައެވެ. މި ފިލްމުގެ ލީޑުން ދެން ފެނިގެންދާނީ ތަރާ ސުތާރިއާއެވެ.
ރޮމޭންޓިކް އެކްޝަން ޑްރާމާ ފިލްމު "ތަޑަޕް" އަދި "ބައްޗަން ޕާންޑޭ" އަށްފަހު ސާޖިދު ގެ ކުރިއަށް ހުރި ފިލްމުތަކަކީ ކަބީރު ޚާން ޑައިރެކްޓުކުރާ ކަޕިލް ދޭވްގެ ބަޔޯޕިކް "83" ، ސަލްމާނު ޚާނު ފެނިގެންދާ "ކަބީ ޢީދު ކަބީ ދިވާލީ" ޓައިގަރ ޝްރޮފް ލީޑްރޯލުން ފެނިގެންދާ "ޓައިގަރ 3" އަދި މީގެ އިތުރުން ސަމީރު ވިދުވާން ޑައިރެކްޓްކޮށް ކާތިކް އާރްޔަން ލީޑުން ފެނިގެންދާ ރޮމޭންޓިކް ފިލްމެވެ.