އިންތިޤާލީ އިންސާފުގެ އޮފީހަށް މައްސަލަ ހުށަހެޅުމަށް ހުޅުވާލި ފުރުޞަތުގައި މިހާތަނަށް 9 މައްސަލަ ހުށައަޅާފައިވާކަމަށް އެއޮފީހުން ބުނެފިއެވެ.
އިންތިޤާލީ އިންސާފުގެ އޮފީހުން ވަނީ މިމަހުގެ 13 އިން ފެށިގެން އޮގަސްޓްމަހުގެ 13 ވަނަ ދުވަހުގެ ނިޔަލަށް މައްސަލަތައް ހުށައެޅުމުގެ ފުރުޞަތު ހުޅުވާލާފައެވެ. ޕީއެސްއެމް ނިއުސްއަށް މައުލޫމާތުދެއްވަމުން އިންތިޤާލީ އިންސާފުގެ އޮފީހުގެ ޕީއާރު އޮފިސަރ ޢާއިޝަތު ފަތުހީ ވިދާޅުވީ މައްސަލަ ހުށައެޅުމަށް ފުރުސަތު ހުޅުވާލައި މިވީ ހަފްތާއެއްހާ ދުވަހުގެ ތެރޭގައި ޖުމްލަ 9 މައްސަލައެއް ހުށައަޅާފައިވާކަމަށެވެ.
އެ އޮފީހުން ބުނީ، މައްސަލައެއް ހުށަހަޅަން ބޭނުންވާނަމަ، މައްސަލަ ހުށަހަޅާ ފޯމް އަދި ބަދަލު ހޯދަން އެދޭނަމަ، ބަދަލު ހޯދުމަށް އެދޭ ފޯމް ހުށަހަޅަން ޖެހޭނެކަމަށެވެ. ރަސްމީ ދުވަސްތަކުގައި އިންތިޤާލީ އިންސާފުގެ އޮފީހުގެ ކައުންޓަރަށް މައްސަލަ ހުށައެޅުމުގެ ފުރުސަތު އޮންނާނެކަމަށާއި، އީމެއިލް މެދުވެރިކޮށްވެސް މައްސަލަ ހުށައެޅޭނެކަމަށެވެ.
އިންތިޤާލީ އިންސާފުގެ އޮފީހަށް މައްސަލަ ހުށައެޅުން އޮގަސްޓް 13އާ ހަމައަށް ހުޅުވާލާފައިވީނަމަވެސް މައްސަލަ ހުށައަޅަން ބޭނުންވާ ފަރާތްތަކުން އެންމެ ފަހުވަގުތަށް މަޑުނުކޮށް މައްސަލަތައް ހުށައަޅަމުން ދިއުމަށް އެއޮފީހުންވަނީ އެދިފައެވެ.
އިންތިޤާލީ އިންސާފުގެ އޮފީހުގެ މަސައްކަތަކީ 1953 ޖަނަވަރީ 1 އިން ފެށިގެން 2018 ނޮވެންބަރު 17 އާ ދެމެދު ހިނގާދިޔަ މުއްދަތުގެ ތެރޭގައި ރައްޔިތުންގެ އިންސާނީ ޙައްޤުތަކާއި އަސާސީ މިނިވަންކަމާ ޚިލާފަށް ހިންގާފައިވާ ޢަމަލުތައް ބަލައި އިންސާފް ޤާއިމްކޮށްދިނުމެވެ.
އިންތިޤާލީ އިންސާފުގެ ޤާނޫނުގެ ދަށުން މައްސަލަ ހުށައެޅުމުގެ ފުރުޞަތު ހުޅުވާލާފައިވާއިރު، އެ އޮފީހުން އިސްނަގައިގެންވެސް މައްސަލަ ބަލާނެކަމަށް އިންތިޤާލީ އިންސާފުގެ އޮފީހުން ވިދާޅުވެފައިވެއެވެ.
ރައްޔިތުންގެ އިންސާނީ ޙައްޤުތަކާއި އަސާސީ މިނިވަންކަމާ ޚިލާފަށް ހިންގާފައިވާ ޢަމަލުތައް ބަލައި އިންސާފް ޤާއިމްކޮށްދިނުމުގެ ބާރު ޤާނޫނުން އެ އޮފީހަށް ލިބިދީފައިވާއިރު، އެއޮފީހަށް ހުށަހެޅޭ މައްސަލަތަކުގެ ތެރެއިން މާލީ ބަދަލު ނަގައިދޭން ހުށަހެޅޭ ބާވަތުގެ މައްސަލައެއްނަމަ، އެބަދަލު ނަގައިދެވޭނެ ގޮތްތައްވެސް ވަނީ ކަނޑައަޅާފައެވެ. މާލީ ބަދަލުގެގޮތުގައި ބަލަނީ މީހާގެ ވަޒީފާއަށް ނުވަތަ ދެވިފައިވާ އަނިޔާއަކާއި ގުޅިގެން ސިއްޙީ ގޮތުން ކުރަންޖެހުނު ޚަރަދުތަކާއި އެނޫން ޚަރަދުތަކުގެ ބަދަލު ނަގައި ދިނުމަށެވެ.
އިންތިޤާލީ އިންސާފު އޮފީހުގެ އޮމްބަޑްސްޕަރސަން ޖިހާދާ އަނީސް ވިދާޅުވެފައިވަނީ 1953 ވަނަ އަހަރުން ފެށިގެން 2018 ވަނަ އަހަރުގެ ނިޔަލަށް ހިންގާފައިވާ އެކި މައްސަލަތަކަށް އިންސާފު ހޯދުމުގައި އެ އޮފީހުން އެންމެ ބޮޑު އިސްކަމެއްދެއްވާނީ ވާހަކަ ދައްކައިގެން މަޝްވަރާގެ އުސޫލުން ކަންކަން ހައްލުކުރުމަށްކަމަށެވެ. އަދި އިންތިޤާލީ އިންސާފުގެ ޤާނޫނުންވެސް ބާރުއަޅަނީ އެގޮތަށް ކަމަށާއި، ވާހަކަ ދައްކައިގެން ހައްލު ނުކުރެވޭ ހާލަތެއްގައި ތަހުގީގްކޮށް ދައުވާކުރަންޖެހޭ ހާލަތަށް ދާންޖެހިއްޖެނަމަ އިންސާފު ހޯދައިދިނުމަށްޓަކައި އެމަސައްކަތްވެސް ކުރާނެކަމަށް ޖިހާދާ ވިދާޅުވިއެވެ.
އިންތިޤާލީ އިންސާފުގެ އޮފީހުން ކުރާ މަސައްކަތްތަކާއި ތަހުޤީޤުތަކާ ގުޅޭރިޕޯޓް ކޮންމެ ތިން މަހަކުން ރައީސުލްޖުމްހޫރިއްޔާއަށް ހުށަހަޅުއްވަންޖެހެއެވެ. އެރިޕޯޓްތައް ގެޒެޓްގައި ޝާއިއުކުރުމަށްވެސް ވަނީ ކަނޑައަޅާފައެވެ. އަދި މިރިޕޯޓްތައް ރައީސުލްޖުމްހޫރިއްޔާ ރައްޔިތުންގެ މަޖިލީހަށް ހުށަހަޅުއްވާގޮތަށްވެސް ވަނީ ހަމަޖެހިފައެވެ.