ރައްޔިތުންގެ މަޖިލިސް ގޮއްވާލާނެކަމަށް ބުނެ ސޯޝަލް މީޑިއާގައި ކޮމެންޓްކުރި ޒުވާނަކު ފުލުހުން ހައްޔަރުކޮށްފިއެވެ.
ފުލުހުން ބުނީ މި މައްސަލާގައި ހައްޔަރުކޮށްފައިވަނީ ޢުމުރުން 28 އަހަރުގެ ފިރިހެނެއްކަމަށެވެ.
އޭނާ ރައްޔިތުންގެ މަޖިލިސް ގޮއްވާލާނެކަމަށް ބުނެފައިވަނީ މަޖިލީހުގެ ޖަލްސާއެއް ފޭސްބުކް އިން ލައިވްކުރަމުންދަނިކޮށް، ކުރި ކޮމެންޓެއްގައެވެ.
ފުލުހުން ވިދާޅުވީ، ޓެރަރިޒަމަށް ހިތްވަރު ލިބޭގޮތަށް، ތަންތަނަށާއި، މީހުންނަށް ގެއްލުން ދޭނެކަމަށް ބުނެ ސޯޝަލް މީޑިއާ އަދިވެސް އެހެނިގެން ގޮތްގޮތުންދޭ އިންޒާރުތަކަކީ ސީރިއަސް މައްސަލަތަކެއްގެ ގޮތުގައި ބަލައި ފިޔަވަޅު އަޅަމުން ގެންދާ މައްސަލަތަކެއްކަމަށެވެ. އަދި މި މައްސަލައާއި ގުޅޭގޮތުން ބަލަންޖެހޭ ކަންކަން ބަލަމުން ގެންދާކަމަށް ފުލުހުން ބުންޏެވެ.
މި މައްސަލަ ފުލުހުން ބަލަމުންދާއިރު، ލޭއޮހޮރުވުމަށާއި، ޓެރަރިޒަމަށް ހިއްވަރު ލިބޭ ވާހަކަ ދެއްކުމަކީ ކުށެއްކަމަށް ކަނޑައެޅުމަށް ބިލެއް އެކުލަވާލާ މިހާރު ވަނީ މަޖިލީހަށް ހުށައަޅަފައެވެ. ޓެރަރިޒަމަށް ހިތްވަރުދިނުމުގެ އަމަލެއްކޮށްފި މީހެއްގެ އަދަބަކީ 10 އަހަރާއި 15 އަހަރާ ދެމެދުގެ މުއްދަތަކަށް ޖަލަށްލުމެވެ.