ރާއްޖޭގައި ކުރެވޭ
އިންވެސްޓްމަންޓްތަކަށް އެހީތެރިވުމަށް ބޭންކް އޮފް މޯލްޑިވްސްގެ ޙިދުމަތް
ރާއްޖެއިން ބޭރަށް ފުޅާކުރުމަށް ވިސްނަމުންދާ ކަމަށް އެ ބޭންކުގެ ސީއީއޯ އެންޑްރޫ
ހީލީ ވިދާޅުވެއްޖެއެވެ.
ޓައިވާން ގެ ވެރިރަށް ޓައިޕޭ ގައި ކުރިއަށް ދިޔަ އޭޝިއަން
ބޭންކަރސް އެސޯސިއޭޝަންގެ އަހަރީ އާއްމު ޖަލްސާގައި ވާހަކަ ދައްކަވަމުން އެންޑްރޫ
ހީލީ ވިދާޅުވީ ބީއެމްއެލްގެ ޙިދުމަތް ރާއްޖެއިން ބޭރަށް ފުޅާކުރުމުން ރާއްޖޭގައި
ކުރެވޭ އިންވެސްޓްމަންޓްތަކަށް އިތުރަށް ފައިސާލިބި، އަގުހެޔޮ ފަންޑުތައް ލިބި
އޭގެ ފައިދާ ކަސްޓަމަރުންނަށް ކުރާނެ ކަމަށެވެ. އަދި ބޭންކުގެ ބޯޑުން ދެކޭގޮތުގައި މިވަގުތު ބީއެމްއެލް އިން
އޮތީ ރާއްޖޭއިން ބޭރުގެ ދެ މާރކެޓެއްގައި ޙިދުމަތް ދޭން ފެށޭނެ ފަދަ ޙާލަތެއްގައި
ކަމަށާއި، ކުރިއަށް އޮތް 12 މަސް ދުވަސްތެރޭގައި ރާއްޖެއިން ބޭރުގެ މަރކެޓެއްގައި ޙިދުމަތް
ދެވެން ފެށޭވަރު ވާނެ ކަމަށް ވެސް އެންޑްރޫ ވިދާޅުވިއެވެ.
ބީއެމްއެލްގެ އެންމެ ފަހުގެ ތަފާސް ހިސާބްތައް
ދައްކާގޮތުން މިއަހަރުގެ މިހާތަނަށް އާއްމު ފަރުދުންނަށާއި ވިޔަފާރިތަކަށް
ދޫކޮށްފައިވާ ލޯނުގެ އަދަދު ވަނީ މިދިޔަ އަހަރުގެ އެ މުއްދަތާއި އަޅާބަލާއިރު
ދެގުނަ އަށް ވުރެ އިތުރުވެ 2.2 ބިލިއަން ރުފިޔާއަށް އަރާފައެވެ. އަދި ރައުސްމާލުގެ
ފުދުންތެރިކަން ވެސް، ޤާނޫނުން ލާޒިމްކުރާ މިންގަނޑުތަކަށް ވުރެ އިތުރަށް
ބެހެއްޓިފައިވާކަން ބީއެމްއެލް އިން ފާހަގަ ކުރެއެވެ.