ކޯވިޑް-19 : ކާފިއު ވަގުތު އިތުރުކޮށް ހުއްދަ ނެތި އެއްވެސް ވަގުތެއްގައި ބޭރުގައިއުޅުން މަނާކޮށްފި
ކޯވިޑް-19 ފެތުރުން ކޮންޓްރޯލް ކުރުމައްޓަކައި މާލެ ސަރަޙައްދުގައި މިހާރު އިއުލާންކޮށްފައިވާ ކާފިއުގެ ވަގުތު އިތުރުކޮށްފިއެވެ.
އެގޮތުން ކުރިން ހަވީރު 16:00އިން ފަތިހު 04:00އަށް އޮތް 12 ގަޑިއިރުގެ ކާފިއު ބުދަދުވަހުން ފެށިގެން ހެނދުނު 08:00އާ ހަމައަށްވަނީ އިތުރުކޮށްފައެވެ.
ހެލްތް އިމަޖެންސީ އޮޕަރޭޝަން ސެންޓަރުން ވިދާޅުވީ ބަލި ކޮންޓްރޯލްކުރުމަށް އަޅާފައިވާ ފިޔަވަޅުތަކާއެކު ބުދަ ދުވަހުން ފެށިގެން މާލެ ސަރަޙައްދުގައި އެއްވެސް ވަގުތަކު ބޭރަށް ނިކުމެ އުޅެވޭނީ ޚާއްސަ ހުއްދައަކާއެކުކަމަށެވެ.
އެގޮތުން ކޮންމެ ގޭބިސީއަކުން ދެމީހަކަށް ހުއްދަ ލިބިގެންދާނެކަމަށާ، މި ހުއްދަ ދޫކުރާނީ ކަރަންޓް މީޓަރަށް ބަލައިގެންކަމަށެވެ. މީގެ އިތުރުން ކާފިއުގެ ވަގުތުތަކުގައި ޓޭކްއަވޭ ހެދުމާއި ފިހާރަތަކަށް ވަދެ ޚިދުމަތް ހޯދުން ވަނީ މަނާކޮށްފައެވެ. އެވަގުތުގައި އެއިން ޚިދުމަތެއް ހޯދައިފިނަމަ މަދުވެގެން 5،000 ރުފިޔާއިން ޖޫރިމަނާކުރާނެއެވެ.
ތަފްސީލް އަންނަނީ ..
ބުދަ ދުވަހުން ފެށިގެން 2 ހަފްތާގެ މުއްދަތަށް މާލެ ސަރަޙައްދުގައި އަޅަން ނިންމާފައިވާ ފިޔަވަޅުތައް
- ހަވީރު 16:00އިން ހެނދުނު 08:00އަށް ކާފިއުގެ ވަގުތު އިތުރުކުރުން
- ހެނދުނު 08:00އިން ހަވީރު 16:00އަށް "ރެސިޑެންޝަލް ޕާމިޓެއް" ނެތި ބޭރަށް ނިކުތުން މަނާ (ކޮންމެ ގޭބިސީއަކަށް ދޫކުރާނީ 2 ޕާމިޓް)
- ކޮންމެ ގޭބިސީއަކަށް ދޫކުރާ ޕާމިޓް ދެވޭނީ ކާފިއު ނޫން ވަގުތުގައި ދެ ދަންފަޅިއަކަށް ބަހާލައިގެން (އހެނދުނު 8އިން މެންދުރު 12އަށް އެއް ފާސް އަދި މެންދުރު 12އިން ހަވީރު 4އަށް އެއް ފާސް)
- ފުލުހުން ދޫކުރާ ފާސް ދޫކުރުމަށް ހަމަޖެހިފައިވަނީ ކޮންމެހެން ބޭރަށް ނިކުންނަންޖެހޭ ހާލަތްތަކުގައި ބޭނުންކުރުމަށް
- ކާފިއު ގަޑިތަކުގައި ފިހާރަތަކަށް ވަދެ ވިޔަފާރިކުރުން މަނާ
- ކާފިއު ގަޑިތަކުގައި ޓޭކްއަވޭގެ ޚިދުމަތް ދިނުން މަނާ
- ކާފިއު ގަޑިތަކުގައިވެސް ހެނދުނު 6އިން މެންދަމު 12އަށް ފިހާރަތަކާއި ކެފޭ ރެސްޓޯރެންޓްތަކުން ޑެލިވަރީ ކުރެވޭނެ
- ކާފިއުގެ ވަގުތުގައި ފިހާތަކަށްވަދެ ވިޔަފާރިކުރުމާއި ޓެކްއަވޭގެ ޚިދުމަތް ހޯދާނަމަ މަދުވެގެން 5،000 ރުފިޔާއިން ޖޫރިމަނާކުރާނެ
- ކާފިއު ނޫން ގަޑިތަކުގައި ހުއްދައާއެކު މާލެއިން ވިލިމާލެއަށް އަދި ވިލިމާލެއިން މާލެއަށް ދަތުރުކުރެވޭނެ
- ޚާއްސަ ޒަރޫރީ ކަމެއްގެ ހުއްދައާއެކު ނޫނީ ހުޅުމާލެއިން މާލެއަށް އަދި މާލެއިން ހުޅުމާލެއަށް ނުދެވޭނެ
ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން ޗީފް ސުޕްރިންޓެންޑެންޓް އޮފް ޕޮލިސް ޢަބްދުﷲ ޝަރީފް ވިދާޅުވީ އަލަށް އަޅާ ފިޔަވަޅުތައް ތަންފީޒުކުރުމަށް ކުރަންޖެހޭ ކަންކަމާއި ތައްޔާރީތައް މިހާރުވަމުންދާކަމަށެވެ.
އެގޮތުން މިރޭ 08:00އިން ފެށިގެން ޕޮލިސް ޕޯޓަލް، police.gov.mv/permit މެދުވެރިކޮށް ހުއްދައަށް އެދެވޭނެކަމަށާ، ކަފިއު ގަޑީގައިވެސް އަދި އެނޫން ވަގުތުތަކުގައިވެސް ކޮންމެހެން ބޭރަށްދާނެޖެހޭ އެމަރޖެންސީ ހާލަތެއް ދިމާވެއްޖެނަމަ އެކަން ހާމަކޮށް ރިކުއެއްސްޓްކުރުމުން ހުއްދަދޭނެކަމަށް ޝަރީފް ވިދާޅުވިއެވެ.
މީގެ އިތުރުން "ރެސިޑެންޝަލް ޕާމިޓް" ނުވަތަ ގޭބިސީތަކަށް ދޫކުރާ ހުއްދަ ދޫކުރާނީ ކޮންމެ ގެއެއްގެވެސް ކަރަންޓް މީޓަރަށް ބަލައިގެންކަމަށާ، ކުރިން ހުއްދަ ދީފައިވާ ފަރާތް ބަދަލުކުރެވޭނީ ކޮންމެ 72 ގަޑިއިރެއްގެ ފަހުންކަމަށްވެސް ޝަރީފް ވިދާޅުވިއެވެ.
"ހެނދުނު 8އިން ހަވީރު 4އަށް އެއްވެސް މީހަކަށް ބޭރަށް ނުކުމެވޭނީ ފުލުހުންގެ ހުއްދައެއް އޮވެގެން، އެ ޙުއްދަ ލިބިގެން. މިގަޑިތަކަކީވެސް ބޭރުގައި އުޅުން މަަނާ ގަޑިތަކެއް. މިކަމަށް ހުރިހާބޭފުޅުންވެސް ސަމާލުކަން ދެއްވަންވާނެ." ޗީފް ސުޕްރިންޓެންޑެންޓް އޮފް ޕޮލިސް އަބްދުﷲ ޝަރީފް ވިދާޅުވިއެވެ.
ރާއްޖޭގައި ކޯވިޑް-19އަށް ޕޮޒިޓިވްވާ މީހުންގެ ޢަދަދު އިތުރުވެ، ފަރުވާ ހޯދާ މީހުންގެ ޢަދަދު މިހާރުވަނީ 23،000އިން މައްޗަށް އަރާފައެވެ. އަދި މިވަގުތުވެސް އެތައް ބަޔަކަށް އެޑްމިޓްކޮށްގެން ފަރުވާދެމުންގެންދާއިރު މަރުވާމީހުންވެސްދަނީ އިތުރުވަމުންނެވެ. މިއާއެކު ސަރުކާރުން ކުރިންވެސް ވަނީ މާލޭގެ އިތުރުން ބަލީގެ ނުރައްކާ ބޮޑު ރަށްރަށުގައިވެސް ފިޔަވަޅުތައް ވަރުގަދަކޮށްފައެވެ.