ރާއްޖެއިން ވެކްސިން ފުރިހަމަކުރި މީހުންގެ ޢަދަދު ދޮޅުލަކައިން މައްޗަށް އަރައިފިއެވެ. ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ތަފާސްހިސާބުތަކަށް ބަލާއިރު، ވޭތުވެދިޔަ 24 ގަޑިއިރުގެ ތެރޭގައި 1،644 މީހުންވަނީ ވެކްސިންގެ 2ވަނަ ޑޯޒް ޖަހާފައެވެ.
މީގެތެރޭގައި ހިމެނެނީ މާލެ ސަރަޙައްދުން ވެކްސިންޖެހި 306 މީހުންނާއި އަތޮޅުތަކުގެ ސެންޓަރުތަކުން ވެކްސިންޖެހި 1،338 މީހުންނެވެ. މިއާއެކު ވެކްސިންގެ 2ވަނަ ޑޯޒް ފުރިހަމަކުރި މީހުންގެ ޖުމްލަ ޢަދަދުވަނީ 151،079އަށް އަރާފައެވެ.
ރާއްޖޭގެ އާބާދީގެ ބޮޑު ބައެއް ވެކްސިންގެ ފުރަތަމަ ޑޯޒް ފުރިހަމަކުރުމާއެކު ވެކްސިންގެ ފުރަތަމަ ޑޯޒް ޖަހާ މީހުންގެ ޢަދަދުވަނީ މިހާރު ވަރަށް ބޮޑަށް މަދުވެފައެވެ. ވޭތުވެދިޔަ 24ގަޑިއިރު ވެކްސިންގެ ފުރަތަމަ ޑޯޒް 467 މީހުންވަނީ ޖަހާފައެވެ.
މީގެތެރޭގައި ހިމެނެނީ މާލެއިން ވެކްސިންޖެހި 239 މީހުންނާއި އަތޮޅުތަކުން ވެކްސިންޖެހި 228 މީހުން ހިމެނެއެވެ. މިއާއެކު ވެކްސިންގެ ފުރަތަމަ ޑޯޒް ޖެހި މީހުންގެ ޖުމްލަ ޢަދަދު ވަނީ 204،861އަށް އަރާފައެވެ.
ވެކްސިން ދިނުމުގެ ކަންކަން މާލޭގެ 3 ސެންޓަރެއްގައި ދަނީ ކުރިއަށް ގެންދަމުންނެވެ. އަދި އަތޮޅުތަކުގެ 240 ސެންޓަރުންނާ، މާލޭގައި 4 މޯބައިލް ޓީމުންވެސް ވެކްސިން ދިނުންދަނީ ކުރިއަށް ގެންދަމުންނެވެ.