ރަށްރަށުގައި
ނަރުދަމާ ޤާއިމްކުރުމުގެ މަސައްކަތް ސަރުކާރުން ކުރިއަށް ގެންދަނީ ކޮންމެ ރަށެއް
އެއީ މުހިންމު ރަށެއްގެ ގޮތުގައި ދެކިގެންނެވެ.
" ނަރުދަމާ އިން އުއްމީދީ ދިރިއުޅުން " ވަޢުދުގެ ތެރެއިން 63 ރަށެއްގައި ނަރުދަމާ ނިޒާމް
ޤާއިމްކުރުމުގެ އެކި މަރުހަލާގައި ކުރިއަށް އެބަގެންދަވައެވެ.
އަންނަ އަހަރު
ސަރުކާރުގެ ބަޖެޓުން ޚަރަދުކުރައްވައިގެން 20 ރަށެއްގައި ފެން އަދި 20 ރަށެއްގައި
ނަރުދަމާގެ މަސައްކަތް ކުރެއްވުމަށްވެސް މިހާރު ވަނީ ސަރުކާރުން ނިންމަވާފައެވެ.
އެންވަޔަރމަންޓް
މިނިސްޓަރ ތޯރިޤް އިބްރާހީމް ވިދާޅުވީ،
މިއީ މިހާތަނަށް ރާއްޖޭގައި ހިންގަވާ ފެނާއި ނަރުދަމާގެ އެންމެ ބޮޑު ބިޔަ މަޝްރޫޢު
އަށް ވެގެންދާނެކަމަށެވެ. މިއަހަރުގެ ތެރޭގައި މިހާތަނަށް 13 ރަށެއްގައި ފެނައި
ނަރުދަމާގެ މަސައްކަތް ފެށިގެން ކުރިއަށްދާއިރު،
މިއަހަރު ކުރިއަށް އޮތް މަދު ދުވަސްކޮޅެއްގެ ތެރޭގައި އިތުރު ދެރަށެއްގައި
ފެނާއި ނަރުދަމާގެ މަސައްކަތް ފަށްޓަވާނެކަމަށް މިނިސްޓަރ ވިދާޅުވިއެވެ.
ނަރުދަމާ
ޤާއިމްކުރުމުގެ މަސައްކަތާއި އެއްވަރަށް ރައްކާތެރި ބޯފެން ފޯރުކޮށްދިނުމަށްވެސް
ސަރުކާރުން ގިނަ މަޝްރޫޢު ތަކެއް ކުރިއަށް ގެންދެއެވެ.
"އެންމެނަށް ސާފު ބޯފެން" ވައުދުގެ ތެރެއިން
ރައްކާތެރި ސާފު ބޯފެނުގެ ޚިދުމަތް ޤާއިމްކުރުމަށް ސަރުކާރުން ކުރިއަށްގެންދާ މަސައްކަތްތަކުގެ
ދަށުން 49 ރަށެއްގައި ފެނުގެ ނިޒާމް ޤާއިމްކުރުމުގެ މަސައްކަތް އެކި މަރުހަލާގައި މިހާރުވެސް
ކުރިއަށް އެބަދެއެވެ.
ފެނާއި ނަރުދަމާ ނިޒާމް ޤާއިމްކުރުމުގެ މަޝްރޫއުތަކުގެ
އިތުރުން، ހޫނުމޫސުމުގައި ރާއްޖޭގެ ރަށްރަށުގެ ރައްޔިތުން ފެނަށް ޖެހޭ މައްސަލައަށް
ދާއިމީ ހައްލެއް ހޯދައި ދިނުމަށްޓަކައި، ސަރުކާރުން
ޚާއްސަ އިސްކަމެއް ދީގެން، މަޝްރޫއެއް ދަނީ ހިންގަމުނެވެ. އެގޮތުން ރަށްރަށުގައި
ތާނގީ ބެހެއްޓުމާއި ، އާރުއޯ ޕްލާންޓް ބެހެއްޓުމުގެ މަސައްކަތް ކުރިއަށްދެއެވެ.