އެމްއެމްޕީއާރުސީގެ ޚިޔާނާތުގައި ބައިވެރިވެފައިވާ މީހުންގެ ތެރެއިން ސަރުކާރުގެ މަޤާމުތަކުގައި ތިއްބެވި މީހުން މަޤާމުން ދުރުކުރުމަށް ރައްޔިތުންގެ މަޖިލީހުގެ ނާއިބު ރައީސް އީވާ ޢަބްދުﷲ ހުށައަޅުއްވައިފިއެވެ.
އެމްއެމްޕީއާރުސީގެ ބޮޑު ޚިޔާނާތުގެ ފައިސާގައި ޖެހުނުކަމަށް ބުނާ މީހުންގެ ލިސްޓް ރައްޔިތުންގެ މަޖިލީހުގެ އެދިވަޑައިގަތުމަށް ތަހުގީގީ އިދާރާތަކުން ވަނީ ފޮނުވާފައެވެ. ތަހުގީގީ އެ އިދާރާތަކުން ފޮނުވި ލިސްޓް ދިރާސާކުރަމުން އަންނަނީ މަޖިލީހުގެ ސަލާމަތީ ޚިދުމަތްތަކުގެ ކޮމިޓީ ނުވަތަ 241 ކޮމިޓީއާއި، މަޖިލީހުގެ ޖުޑީޝިއަރީ ކޮމިޓީން ގުޅިގެން އުފައްދާފައިވާ ޖޮއިންޓް ކޮމިޓީއަކުންނެވެ. ތަހުގީގީ އިދާރާއަކުން ފޮނުވި ލިސްޓްގައި އެމްއެމްޕީއާރުސީގެ ޚިޔާނާތުގެ ފައިސާ ލިބުނު 281 މީހެއްގެ ނަންވަނީ ހިމަނާފައެވެ.
އެމްއެމްޕީއާރުސީގެ ޚިޔާނާތުގެ މައްސަލަ ބެލުމަށް މިރޭ ބޭއްވި ކޮމިޓީގެ ބައްދަލުވުމުގައި މަޖިލީހުގެ ނާއިބު ރައީސް އީވާ ޢަބްދުﷲ ވިދާޅުވީ، ޚިޔާނާތުގެ ފައިސާ ލިބުނު މީހުންގެ ލިސްޓުން މިވަގުތު އެންމެ އިސްކަމެއް ދޭންޖެހޭނީ ސަރުކާރުގެ މަޤާމުތަކުގައި މިހާރު ތިއްބެވި މީހުންނަށް ކަމަށާއި، ސަބަބަކީ އެމީހުން މަޤާމުގައި ތިބެގެން ތަހުގީގަށް ނުފޫޒް ފޯރުވުމާއި، ދައުލަތުގެ މިސްރާބު ބަދަލުކުރުމަށް މަސައްކަތްކުރުމުގެ ފުރުޞަތު އޮތުމުންކަމަށެވެ.
އެހެންކަމުން ތަހުގީގީ އިދާރާތަކަށް އެމީހުންގެ މައްޗަށް ދައުވާކުރެވޭނެ ވަރަށް ހެކި ނެތްނަމަވެސް އަދި ދައުވާ ސާބިތު ނުކުރެވުނުނަމަވެސް އެމީހުން ސަރުކާރުގެ މަޤާމުތަކުން ދުރުކުރުމަށް މަޖިލީހުގެ ނާއިބު ރައީސް އަދި ގަލޮޅު އުތުރު ދާއިރާގެ މެންބަރު އީވާ ޢަބްދުﷲ ހުށައެޅުއްވިއެވެ.
މިކޮމިޓީ ބައްދަލުވުމުގައި އީވާވަނީ ފައިނޭންޝަލް ކްރައިމްސް ހުއްޓުވުމަށް އެސެޓް ރިކަވަރީ ކޮމިޝަނުން ފާހަގަކޮށްފައިވާ ކަންކަން ކޮމިޓީން ލަފާދޭ ކަންކަމުގެ ގޮތުގައި ހިމެނުއްވުމަށްވެސް ހުށައަޅުއްވާފައެވެ.
އީވާގެ މި ހުށައެޅުއްވުމަށް ވަނީ ތާޢީދުވެސް ލިބިފައެވެ. އެގޮތުން ތުޅާދޫ ދާއިރާގެ މެންބަރު ހިސާން ހުސައިން ވަނީ އީވާގެ ހުށައެޅުއްވުމަށް ތާޢީދުކުރައްވާފައެވެ. ޙިސާންވެސް ވަނީ ކޮރަޕްޝަންގެ ފައިސާ ލިބިފައިވާ މީހުން ދައުލަތުގެ މަޤާމުތަކުގައި ތިބުމަކީ ދައުލަތުގެ އެކި ކަންކަމަށް ނުފޫޒު ފޯރުވާނެކަމެއްގެ ގޮތުގައި ފާހަގަކުރައްވާ އެމީހުން މަޤާމުތަކުގައި ތިބުމަކީ ބަލައި ގަނެވޭނެކަމެއް ނޫންކަމަށް ވިދާޅުވެފައެވެ. އަދި އެމީހުން ދުރުކުރުމަށް މިހާރުން މިހާރަށް އެޅެން ހުރި ފިޔަވަޅުތައް އެޅުމަށް އަވަސްކުރުމަށް ހިސާންވެސް ގޮވާލެއްވިއެވެ.
ހިސާން ވިދާޅުވީ އެމީހުންގެ މައްޗަށް ޖިނާޢީ ދައުވާ ސާބިތުވާވަރަށް ހެކި ނެތްނަމަވެސް، ދައުލަތުން ގެއްލުނު ފައިސާ ހޯދުމަށް ދައުވާކުރެވޭނެ ކަމަށް އެސެޓް ރިކަވަރީ ކޮމިޝަނުން ފާހަގަކޮށްފައިވާކަމަށެވެ.
އެމްއެމްޕީއާރުސީގެ ޚިޔާނާތުގެ ފައިސާ ލިބިފައިވާ މީހުން ސަރުކާރުގެ މަޤާމުތަކުން ދުރުކުރުމަށް ކޮމިޓީއަށް ހުށައަޅާފައިވާއިރު، މި މައްސަލަ ބަލާ ބަސް ކޮމިޓީގެ މަސައްކަތްތައް މާދަމާގެ ނިޔަލަށް ނިންމުމަށްވެސް ވަނީ ކަނޑައަޅާފައެވެ. އެއަށްފަހު އެ ކޮމިޓީގެ ރިޕޯޓް ފޮނުވާނީ މައި ކޮމިޓީއަށެވެ.
އެސެޓް ރިކަވަރީ ކޮމިޝަނުން އެމްއެމްޕީއާރުސީގެ ކޮރަޕްޝަންގެ ފައިސާ ލިބުނުކަމަށް ބުނާ މީހުންގެ ލިސްޓް މަޖިލީހާއި ހިއްސާކުރައްވަމުން އެ ލިސްޓްގެ ސިއްރުކަން ހިފަހައްޓައިދިނުމަށްވަނީ އެދިފައެވެ. އެހެންކަމުން އެ ނަންތައް ކޮމިޓީގެ ބައްދަލުވުމުގައިވެސް ނުކިޔުމަށް ކޮމިޓީގެ މުގައްރިރު މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ ވަނީ ނިންމަވާފައެވެ.
އެމްއެމްޕީއާރުސީގެ ޚިޔާނާތުގެ މައްސަލަ މަޖިލީހުން ބަލަން ފަށާފައިވާއިރު، މަޖިލީހުގެ ރައީސް މުޙައްމަދު ނަޝީދު ވަނީ އެމްއެމްޕީއާރުސީގެ މައްސަލަ ބެލުމުގައި ތަހުގީގީ އިދާރާތަކަށް ނަތީޖާއެއް ނެރެވިފައިނުވާކަމަށް ވިދާޅުވެފައެވެ. އެހެންކަމުން އެމައްސަލަ މަޖިލީހުން ކުރިއަށްގެންދަވާނެކަމަށާއި، މި މައްސަލަ ބެލުމަށް މަޖިލީހުން ކުރެވެން ހުރި ހުރިހާ ކަމެއް ކުރައްވާނެކަމަށް ރައީސް ނަޝީދު ވިދާޅުވެފައިވެއެވެ.
އެމްއެމްޕީއާރުސީގެ ކޮރަޕްޝަންގެ މައްސަލަ ބަލާ ކޮމިޓީން އަންނަނީ ކޮރަޕްޝަނާއި ގުޅޭގޮތުން މުޢާމަލާތުކޮށްފައިވާ 70،000އަށްވުރެ ގިނަ މެސެޖުވެސް ދިރާސާކުރަމުންނެވެ.
އެމްއެމްޕީއާރުސީގެ ޚިޔާނާތުގެ ފައިސާ 18ވަނަ ރައްޔިތުންގެ މަޖިލީހުގެ 44 މެމްބަރަކާއި، ރައްޔިތުންގެ މަޖިލީހުގެ މިހާރުގެ 16 މެމްބަރަކާއި، މިނިވަން މުވައްސަސާތަކުގައި އިސްކޮށް ތިއްބެވި ބައެއް ބޭފުޅުންނާއި، ސަރުކާރުގެ މަގާމުގައިތަކުގައި ތިއްބެވި ބައެއް ބޭފުޅުންގެ އިތުރުން ބައެއް ފަނޑިޔާރުންނަށްވެސް ލިބިފައިވާކަމަށް ތަހުގީގީ އިދާރާތަކުން ކުރިން ހާމަކުރައްވާފައިވެއެވެ.
އެމްއެމްޕީއާރުސީގެ ޚިޔާނާތުގެ ފައިސާތައް ބޭނުންކޮށްފައިވަނީ ސިޔާސީ މަންފާތަކެއް ހޯދުމަށް ކަމަށް އެސެޓް ރިކަވަރީ ކޮމިޝަނުންވަނީ ބުނެފައެވެ. މިހާތަނަށް ކުރެވުނު ތަހުގީގުތަކުން އެގޭ ގޮތުގައި އެމްއެމްޕީއާރުސީގެ ޚިޔާނާތް 3.4 ބިލިޔަން ރުފިޔާއަށް އަރައެވެ.