ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދަކީ ރައީސުލްޖުމްހޫރިއްޔާ ފިޔަވައި ރާއްޖޭގައި އެންމެ ހައިރިސްކު ބޭފުޅާކަމަށް ސަލާމަތީ ބާރުތަކުން ވަނީ ވިދާޅުވެފައެވެ.
އެމްއެންޑީއެފުން ރައީސް ނަޝީދަށް ދެނީ ކުރީގެ ރައީސެއް ނުވަތަ ދައުލަތުގެ އެހެން ބާރެއްގެ އިސްވެރިއަކަށް ދޭ ސެކިއުރިޓީ އަށް ވުރެ މަތީ ދަރަޖައެއްގެ ސެކިއުރިޓީއެކެވެ. އެގޮތުން ސްޕެޝަލް ޕްރޮޓެކްޝަން ގްރޫޕް (އެސްޕީޖީ)އިން ރައީސް ނަޝީދާއެކު ލީތަލް ވެޕަން ހިފައިގެން އަބަދުވެސް ހަރަކާތްތެރިވަމުން ދާނެކަމަށް އެމްއެންޑީއެފްއިން ވަނީ ހާމަކުރައްވާފައެވެ.
ކަން މިހެން އޮތްނަމަވެސް، ރައީސް ނަޝީދަށް އަމާޒުކޮށް ދިން ޓެރަރިސްޓް ހަމަލާއިން މުޅި ރާއްޖެ ސިއްސުވާލިއެވެ. ސައިކަލެއްގައި ބޮމެއް ހަރުކޮށް، ރައީސް ނަޝީދަށް ފާރަލައި އެމަނިކުފާނު ގެކޮޅުން ނިކުމެވަޑައިގެން ކާރުކޮޅަށް އަރާވަޑައިގަންނަވަނިކޮށް ގޮއްވާލި ބޮމާއެކު ލިބިވަޑައިގަތް ޒަޚާމްތަކަށް ގެންދަވަނީ އޭޑީކޭގައި ފަރުވާ ހޯއްދަވަމުންނެވެ.
މިޓެރަރިސްޓް ޙަމަލާގައި ގޮއްވާލި އައިއީޑީން ބުރައިގެންދިޔަ ތޫނު ދަގަނޑު އެތިކޮޅުތަކުގެ ތެރެއިން އެތިކޮޅެއް، އެމަނިކުފާނުގެ ސީދާ ހިތަށް ނުވަދެ ހުރީ އެންމެ ސެންޓިމީޓަރެއްގެ ދުރުމިންކަމަށް އޭޑީކޭގެ ޑޮކްޓަރުންގެ ޓީމުން ވަނީ ހާމަކޮށްފައެވެ. މި އެތިކޮޅު ރައީސް ނަޝީދުގެ ހިތަށް ނުވަދެ ސަލާމަތްވީ އެމަނިކުފާނުގެ މޭކަށިގަނޑުގައި ޖެހި ކަށިގަނޑު ފުނޑުފުނޑުވުމުގެ ސަބަބުން އެ އެތިކޮޅު އެތެރެއަށް ދިޔުން މަތަވެގެންކަމަށްވެސް ޑޮކްޓަރުން ވަނީ ވިދާޅުވެފައެވެ.
އެންމެ ބޮޑު ޝޮކެއް މަންމާފުޅާއި ބައްޕާފުޅަށް
ރައީސް ނަޝީދަށް އޮތް ނުރައްކަލުގެ ވާހަކައަކީ އަބަދުވެސް އެމަނިކުފާނުގެ ޢާއިލާގެ ތެރޭގައި ދެކެވޭ ވާހަކައެކެވެ. އަބަދުވެސް އެކި މިންވަރަށް އެވާހަކަ ދެކެވެއެވެ. ނަމަވެސް ރައީސް ނަޝީދަށް ޓެރަރިސްޓް ހަމަލާ އަމާޒުވި ހަފްތާއަކީ އެންމެ ބޮޑަށް އެންމެ ސީރިއަސްކޮށް އެވާހަކަތައް އާއިލާގެ ތެރޭގައި ދެކެވުނު ހަފްތާއެވެ.
އެމަނިކުފާނު އަވަހާރަކޮށްލަން ޙަމަލާ ދީފައިވަނީ، އާއިލާ ތެރޭގައި އެމަނިކުފާނަށް އޮތް ނުރައްކާގެ ވާހަކަ ވަރަށް ބޮޑަށް ދެކެވެމުންދަނިކޮށްކަމަށް އާއިލާއިން ހިއްސާކުރި މަޢުލޫމާތުތަކުންވެސް ވަނީ ހާމަވެފައެވެ. ރައީސް ނަޝީދުގެ ހާލުކޮޅާ ގުޅޭގޮތުން ޕީއެސްއެމް ނިއުސްއާ ވާހަކަފުޅު ދައްކަވަމުން އެމަނިކުފާނުގެ ބޭބޭފުޅު ޑރ.އިބްރާހީމް ނާޝީދު (ނާޝް) ވިދާޅުވީ، ރައީސް ނަޝީދަށް އަމާޒުކޮށް ދިން ހަމަލާއާއެކު ޢާއިލާއިން އަދިވެސް ތިބީ ވަރަށް ބޮޑު ޝޮކެއްގައިކަމަށެވެ. އެބޭފުޅުންގެ މަންމާފުޅާއި ބައްޕާފުޅަށް ކުރި އަސަރު ވަރަށް ބޮޑޫކަން ޑރ.ނާޝް ފާހަގަކުރެއްވިއެވެ.
"އަދިވެސް ވަރަށް ބޮޑު ޝޮކެއްގަ މިތިބީ، މަންމައާއި ބައްޕައަށް ކުރި އަސަރު މާބޮޑު." ޑރ.ނާޝިދު ވިދާޅުވިއެވެ.
ރައީސް ނަޝީދަށް ލިބިވަޑައިގެންނެވި އަނިޔާތަކަށް ފަރުވާ ދެއްވުމަށް އޭޑީކޭ ހޮސްޕިޓަލަށް ގެންދިޔަ ހިސާބުން ސާޖަރީތައް ނިމުމާހަމައަށް ހޮސްޕިޓަލުގައި ހުންނެވިކަމަށާ، ރައީސް ނަޝީދަށް ލިބިވަޑައިގެންފައިވާ ޒަޚަމްތަކުން އެކަމުން އަރައިގަނެވޭނެކަމުގެ ޔަޤީންކަމެއްވެސް ފުރަތަމަ ނެތްކަމަށް ނާޝްވިދާޅުވިއެވެ.
ޙަމަލާ ދިނީ އެންމެބޮޑަށް އެވާހަކަ ދެކެވުނު ހަފްތާގައި
ޑރ.ނާޝް ވިދާޅުވީ، ރައީސް ނަޝީދަށް އޮންނަ ނުރައްކާ ދުވަހުން ދުވަހަށް ދިޔައީ އިތުރުވަމުންކަމަށެވެ. ނަމަވެސް އެކަމުގައި އާއިލާއަށް ކުރެވޭނެ މާބޮޑު ކަމެއްނެތްކަމަށެވެ. ސަބަބަކީ ރައީސް ނަޝީދަށް ސެކިއުރިޓީ ފޯރުކޮށްދެނީ ސަލާމަތީ ޚިދުމަތްތަކުންކަމަށްވާތީއެވެ.
ރައީސް ނަޝީދަށް އޮތް ނުރައްކާ ކުރިއަށްވުރެ ބޮޑުވެފައިވާކަމުގެ ވާހަކަތައް މާބޮޑަށް މިދިޔަ ހަފްތާގައި ޢާއިލާގެ ތެރޭގައި ދެކެވިފައިވެއެވެ. އެވާހަކަތައް ދެކެވުނީ ރައީސް ނަޝީދަށް ނުރައްކަލެއް ކުރިމަތިވާން އުޅޭތީކަމެއް އާއިލާއަކަށް އޭރަކު ނޭނގެއެވެ. ނަމަވެސް އެވާހަކަތައް އާއިލާގެ ތެރޭގައި މާބޮޑަށް ދެކެވުނީ ކީއްވެގެންކަން މިހާރު ރައީސް ނަޝީދުގެ އާއިލާގެ މެންބަރުންނަށް އެނގިވަޑައިގަންނަވައެވެ.
"ދެން އަބަދުވެސް ތްރެޓް އޮވޭ. އެ ތްރެޓް މަޑުމަޑުން ބޮޑުވަމުން އަންނަނީ. ދެން ދުވަސް ދުވަހު އެ ތްރެޓް ބޮޑުވާ ވާހަކަ ދެކެވޭ. އެކަމު އަޅުގަނޑުމެން އާއިލާގެ ފަރާތުން ކުރެވޭނެ މާބޮޑު ކަމެއް ނޯވޭ. އެހެން ފަރާތަކުން ސެކިއުރިޓީއާއި އެއްޗެހި ބަލަހައްޓަމުންދަނީ. އެފަރާތްތަކަށް އެނގޭނީވެސް، އެގެންވާނީވެސް. އަޅުގަނޑުމެންނަށް އެނގޭނީ އަންނި ގޭތެރޭގަ ޝެއަރކުރަން ބޭނުންވި އެއްޗެއް. އެކަހަަލަ އިންފޮމޭޝަން އަޅުގަނޑުމެންނަށް ނުވެސްދޭނެ، ހާމަ ނުވެސް ކުރެވޭނެ. އެހެންނަމަވެސް ތްރެޓް ބޮޑުވާ ވާހަކަ ދެއްކީމަ އަޅުގަނޑުމެން ކޮންސާންވޭ. އެކަމު ތްރެޓް ބޮޑުވާވާހަކަ މާ ޑީޓެއިލްކޮށް މިހަފްތާގެ ތެރޭގަ ދައްކަމުން ދިޔައީ. ތްރެޓް ލެވެލް ވަރަށް ބޮޑުވެއޭ. މިހާރު އެބަ ވިސްނޭ ކީއްވެކަން އެވާހަކަ ފާއިތުވި ހަފްތާގަ އެ ދެއްކީ." ނާޝިދު ވިދާޅުވިއެވެ.
ސަލާމަތްވުމަކީ، ހަމަ ނަސީބު
ރައީސް ނަޝީދަށް ފަރުވާ ދިނުމުގައި އޭޑީކޭ ހޮސްޕިޓަލުގެ އެންމެ ތަޖުރިބާކާރު ޑޮކްޓަރުން ދިޔައީ ހަރަކާތްތެރިވަމުންނެވެ. ޖުމްލަ 16 ގަޑިއިރު އެމަނިކުފާނުގެ އޮޕަރޭޝަންތަކަށާއި، ސާޖަރީތަކަށް ހޭދަވިއިރު، ޑޮކްޓަރުންގެ ވާހަތަކަށް ގިނަ ބަޔަކަށް ސިހުންލިބި، މާޔޫސްކަންވެސް ވެރިވިއެވެ.
ރައީސް ނަޝީދަށް އަމާޒުކޮށް ދިން ހަމަލާގައި އެމަނިކުފާނުގެ ފުރާނަ ނުދިޔައީ ހަމަ ކިރިޔާއެވެ. ހަށިގަނޑުގެ އެތައް ތަނެއް ޒަޚަމްވެ، ގިނަ އޮޕަރޭޝަންތަކެއް ވަނީ ކޮށްފައެވެ. ޑޮކްޓަރުން ވިދާޅުވެފައިވަނީ ރައީސް ނަޝީދުގެ ހާލަތު މިވަގުތު ސްޓޭބަލް ކަމަށްވީނަމަވެސް އެމަނިކުފާނަށް ފަރުވާ ދެމުންދަނީ ވަރަށްގާތުން ސީރިއަސް ޕޭޝަންޓެއްގެ ގޮތުގައި ބަލައިގެކަމަށެވެ.
ޑޮކްޓަރުން ވިދާޅުވިގޮތުގައި އޮޕަރޭޝަންކޮށް ބެލިއިރު، ރޭޒާފުކެއް ހަށިގަނޑުގެ އެތެރެއަށް ވަދެގެންގޮސް މޭގެ ކަށިގަނޑެއްގައި ޖެހި، ކަށިގަނޑަކަށް ވަނީ ގެއްލުންވެފައެވެ. އެ ކަށިގަނޑަށް ވުރެ ތަންކޮޅެއް ތިރިން އެ ރޭޒާ ފުއް ދިޔަ ނަމަ، އޭތި ގޮސް ވަންނާނީ ހިތަށެވެ. އެފަދަ ހާލަތެއް ކުރިމަތި ނުވިކަމީ ޑޮކްޓަރުން ވިދާޅުވި ގޮތުން ވަރަށް ބޮޑު ނަސީބެކެވެ. އެކަމަކު ކަށިގަނޑެއް ފުނޑުފުނޑުވުމުން އޭގެ ކުނޑިތައް ފުއްޕާމެއަށް އެޅިފައި ހުއްޓެވެ. އަދި ފުއްޕާމޭގެ ބައެއް ތަންތަނުގައި ޕެޗް އަޅަން ޖެހުނެވެ.
ރައީސް ނަޝީދަށް ލިބިވަޑައިގެންނެވި ޒަޚަމްތަކަށް ފަރުވާ ދެއްވުމަށް ޑޮކްޓަރުންގެ ޓީމުން ވަނީ ނުރައްކާތެރި ގޮންޖެހުން ބޮޑު މަސައްކަތްތަކެއް ކުރައްވާފައެވެ. ސާޖަރީއަށް ބޭނުންވާ ބައެއް ޓޫލްސްވެސް އެހެން ތަންތަނުން ގެންނަން ޖެހުނެވެ. ޑޮކްޓަރުންގެ ޓީމުން ކޮންމެ 30 މިނަޓަކުން އާއިލާއަށް ރައީސް ނަޝީދުގެ ހާލުކޮޅާއި ގުޅޭގޮތުން ދިޔައީ މަޢުލޫމާތު ހިއްސާ ކުރައްވަމުންނެވެ. އޭޑީކޭގެ ޑޮކްޓަރުންގެ ޓީމުން ރައީސް ނަޝިދަަށް ދެއްވި ފަރުވާއަށް އެމަނިކުފާނުގެ އާއިލާއިން ތިބީ ހިތްހަމަ ޖެހިގެންނެވެ.
ޑރ.ނާޝް ވިދާޅުވީ، ރައީސް ނަޝީދަށް ލިބިވަޑައިގެންނެވި އަނިޔާތަކުން ސަލާމަތްވީ ހަމަ ނަސީބަކުންކަމަށެވެ. އޭނާ ވަނީ ޑޮކްޓަރުންގެ ޓީމުން ޢާއިލާއަށް ދެއްވި ހިތްވަރާއި މިކަމުގައި ކުރެއްވި މަސައްކަތަށް ޝުކުރު އަދާކުރައްވާފައެވެ.
"ފުރަތަމަ މަޢުލޫމާތު ދިންއިރު ކިޑްނީކައިރީގައި އެއްޗެއް އޮތްވާހަކަ ޑޮކްޓަރުން ވިދާޅުވި. ފަހުން ބެލިއިރު އެވެސް އޮތީ ލިވާރގައި. އޭގެ ކުރިން ކިޑްނި ކައިރީގަ އޭތި އެބަ އޮތޭ އަދި ލިވަރ ކައިރީގަވެސް އެބައޮތޭ، ލިވާއާ ކުޅުމަކީ ތިމަންނަމެނަށް ވަރަށް އުނދަގޫ ކަމެކޭ. ފަހަރުގައި އެ ބާއްވަފާނޭ އުނދަގުލެއް ނުވަންޏާ. ނަމަވެސް ނަސީބަކުން ކިޑްނިއަށް ޑެމޭޖުނުވެ އޭތިވެސް ނެގުނީމަ ވަރަށް އުފަލުން ޑޮކްޓަރުން އައި." ނާޝިދު ވިދާޅުވިއެވެ.
“ކުރިން ވެސް ކެތްތެރިވީ، ދެން ވެސް ކެތްތެރިވާނަން: -ރައީސް ނަޝީދުގެ ބައްޕާފުޅު-
— ??? (@Simwarr) May 9, 2021
"އަބަދުވެސް އަނިޔާ ލިބެމުން އައީ. އެކަމަކު ކުރިން ވެސް ކެތްކުރީތާ. މިއަދު ވެސް ކެތްތެރިވާނަން އަޅުގަނޑާއި އާބިދާ." #PrayForPresidentNasheed ? pic.twitter.com/RthaLJ2Tik
"މަންމާ މަ ރަނގަޅޭ، އަދި މާ ރަނގަޅުވާނޭ"
ގިނަ ސާޖަރީތަކަށްފަހު ރައީސް ނަޝީދުގެ ހާލުކޮޅު މިހާރު އަންނަނީ ރަނގަޅުވަމުންނެވެ. މިހާރު އެމަނިކުފާނު ކުޑަކޮށް ވާހަކަ ދައްކާވެސް ހައްދަވައެވެ. ރައިސް ނަޝިދު ވެންޓިލޭޓަރުން ނަގައި، ހޭ ވެރިކަން ވުމަށްފަހު އެންމެ ފުރަތަމަ އެމަނިކުފާނަށް ޒިޔާރަތްކުރެއްވީ މަންމާފުޅާއި ބައްޕާފުޅާއި ބޭބޭފުޅެވެ.
ރައީސް ނަޝީދުވަނީ އެމަނިކުފާނުގެ ހާލު ރަނގަޅު ކަމަށް ވިދާޅުވެފައެވެ. އަދި އެމަނިކުފާނުގެ މައިންބަފައިންނަށް ހިތްވަރު ދެއްވައި ބަލިން ފަސޭހަވެ އެނބުރި އަންނާނީ މާވަރުގަދަކޮށް ކަމަށްވެސް ވިދާޅުވިއެވެ.
"މަންމަ އާއި ބައްޕަ އާއި ވާހަކަ ދެކެވުނުއިރު ވަރަށް ވަރުދެރަ. މަންމަ ކައިރީގަ ބުނި މަންމާ އަހަރެން ރަނގަޅުވާނޭ. އަޅުގަނޑު ކައިރީގަވެސް ބުނި ގަދަވާނޭ. މާ ރަނގަޅުވާނޭ. އެކަހަލަ ދެތިން ބަހެއް ބުނި. މަންމައަށްވެސް ބައްޕައާށްވެސް އަންނިއަށްވެސް އުނދަގޫ ގަޑިއެއް އެއީ. ފެނުނީމަ އުނދަގޫތަކެއް އަދި ފަސޭހަތަކެއްވެސްވި." ޑރ.ނާޝިދު ވިދާޅުވިއެވެ.
ރައީސް ނަޝީދުގެ ޙާލުކޮޅު މިހާރު ރަނގަޅުވަމުން އަންނައިރު، މިހާރުގެ އެންމެ ބޮޑު ރިސްކަކީ އިންފެކްޝަން އުފެދިދާނެތީ އެކަން ރަނގަޅަށް ބެލުންކަމަށާ، ޑޮކްޓަރުން އެކަން ވަރަށް ރަނގަޅަށް މޮނިޓަރ ކުރައްވަމުން އަންނަކަމަށްވެސް ރައީސް ނަޝީދުގެ ބޭބޭފުޅު ވިދާޅުވިއެވެ. އަދި ރައީސް ނަޝީދުގެ ހާލުކޮޅު ރަނގަޅުވަމުން އައި މިންވަރަކުން ރާއްޖެއިން ބޭރަށް އެމަނިކުފާނު ގެންދަވާނެކަމަށްވެސް ރައީސް ނަޝީދުގެ ޢާއިލާއިން ވިދާޅުވިއެވެ.
ސިޔާސީ މަސައްކަތް ހުއްޓައެއް ނުލައްވާނެ
ރައިސް ނަޝީދަށް އޮތް ނުރައްކާ ބޮޑުވަމުން ދިއުމާއި، ނުރައްކާތެރި ހަމަލާއެއް އަމާޒުވެގެން ދިއުމުން އެމަނިކުފާނު ސިޔާސީ މަސައްކަތުން ދުރަށް ވަޑައިގަތުމާ ގުޅޭގޮތުން ބައެެއް ފަރާތްތަކުން ދަނީ ސުވާލު އުފައްދަމުންނެވެ. ރައީސް ނަޝީދުގެ ދާއިރާއަކީ އަދި މަސައްކަތަކީވެސް ސިޔާސީ ދާއިރާކަމަށެވެ.
އެމަނިކުފާނަށް އަމާޒުކޮށް ހަމަލާއެއް ދިންމަވެސް ސިޔާސީ މަސައްކަތުން ދުރަށް ވަޑައިގަންނަވާނެކަމަކަށް ނުބެލެވޭކަމަށް ޢާއިލާއިން ވިދާޅުވިއެވެ. އަދި ސިޔާސީ މަސައްކަތް ދޫކޮށްލަންޖެހޭކަމަށްވެސް ރައީސް ނަޝީދުގެ އާއިލާއިން ދެކެވަޑައިނުގަންނަވައެވެ.
"މެޗް ބޮޑުވި ވަރަކަށް ތްރެޓުވެސް އަދި ކޮމްޕެޓިޝަން ވެސް ބޮޑުވާނެތާ! އެއީ މަސައްކަތް ދޫކޮށްލަން ޖެހޭ ސަބަބެއް ކަމަކަށް އާއިލާއިން ނުދެކެން!" ޑރ.ނާޝިދު ވިދާޅުވިއެވެ.
ކޮންމެއަކަސް ރައީސް ނަޝީދުގެ ޙާލުކޮޅު ރިކަވަރ ވަމުން އަންނަލެއް އަވަސްކަމުން ޢާއިލާގެ ބޭފުޅުން ތިއްބެވީ ހިތްޕުޅު ހަމަޖެހިގެންނެވެ. ރައީސް ނަޝީދަކީ ވަރަށް ހިތްވަރުފުޅު ގަދަ ބޭފުޅެއްކަން އާއިލާއިން ތަކުރާރުކޮށް ފަހަގަކުރެއްވިއެވެ. ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، ރައީސް ނަޝީދަށް ޒިޔާރަތްކުރެއްވުމަށްފަހުވެސް ވިދާޅުވީ އެހެންނެވެ. އެމަނިކުފާނަކީ ހިތްވަރުފުޅު ގަދަ ބޭފުޅެއްކަމެވެ.