ކައުންސިލަރުންގެ މުސާރައަށް ބަދަލު ގެންނަން ފާސްކޮށްފި

ރަށު ކައުންސިލްތަކުގެ ރައީސަށް 20،000ރުފިޔާ އަދި ކައުންސިލް މެންބަރަކަށް 13،000ރުފިޔާ ދޭގޮތަށް ބަދަލުގެނެސް ކައުންސިލަރުންގެ މުސާރަ ރައްޔިތުންގެ މަޖިލީހުން ފާސްކޮށްފިއެވެ.

ކައުންސިލަރުންގެ މުސާރައާއި އިނާޔަތްތައް މުރާޖަޢާ ކުރުމަށް ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނަށް އިޞްލާޙު ގެނައުމަށް މަޖިލީހުގެ މާލިއްޔަތު ކޮމިޓީން ނިންމި ރިޕޯޓު އިތުރު އިސްލާޙަކާއެކު ފާސްވީ ވޯޓުގައި ބައިވެރިވި 62 މެންބަރުންގެ އަޣުލަބިއްޔަތުންނެވެ.

މާލިއްޔަތު ކޮމިޓީން ނިންމައި ރައްޔިތުންގެ މަޖިލީހުން މިއަދު ފާސްކުރި ރިޕޯޓުގައިވާގޮތުން އެންމެ ބޮޑު މުސާރައެއް ކަނޑައަޅާފައިވަނީ ސިޓީތަކުގެ މޭޔަރުންނަށެވެ. އެގޮތުން މޭޔަރަށް މުސާރައިގެ ގޮތުގައި 30،000 ރުފިޔާ އަދި އެލަވަންސްގެ ގޮތުގައި 10،000 ރުފިޔާއާއެކު، ޖުމްލަ 40،000 ރުފިޔާގެ މުސާރައެއް ލިބިގެންދާނެއެވެ. ކުރިއަށްއޮތްތަނުގައި ޑެޕިއުޓީ މޭޔަރަށް މުސާރައާއި އިނާޔަތުގެ ގޮތުގައި ޖުމްލަ 35000 ރުފިޔާ ލިބިގެންދާނެއެވެ. އަދި ސިޓީ ކައުންސިލް މެންބަރުންނަށް މުސާރައާއި އިނާޔަތުގެ ގޮތުގައި ލިބޭނީ 30000 ރުފިޔާއެވެ.

މަޖިލީހުން ފާސްކޮށްފައިވާގޮތުން މިހާރު އަތޮޅު ކައުންސިލްގެ ރައީސްގެ މުސާރަވެސް ވަނީ ބޮޑުވެފައެވެ. އެގޮތުން އަތޮޅު ކައުންސިލްގެ ރައީސްގެ މުސާރަ 25،000 ރުފިޔާއިން 28،000 ރުފިޔާއަށްވަނީ ބޮޑުކޮށްފައެވެ.

މާލިއްޔަތު ކޮމިޓީން ރަށު ކައުންސިލްގެ ރައީސްގެ މުސާރައިގެ ގޮތުގައި ޖުމުލަ 23،000 ރުފިޔާ ދިނުމަށާއި ރަށު ކައުންސިލުގެ ނައިބު ރައީސްގެ މުސާރައިގެ ގޮތުގައި 15،000 ރުފިޔާ އަދި ރަށު ކައުންސިލް މެމްބަރެއްގެ މުސާރައިގެ ގޮތުގައި 12،000 ރުފިޔާ ދިނުމަށް ފާސްކޮށްފައިވީ ނަމަވެސް މަޖިލީހުގެ ތަޅުމުގައި ހުށައެޅުނު އިސްލާހަކާއެކު ރަށު ކައުންސިލްގެ ރައީސްގެ މުސާރައިގެ ގޮތުގައި 15،400 ރުފިޔާ އަދި އިނާޔަތުގެ ގޮތުގައި 4،600 ހަމަޖައްސައި، ޖުމުލަ މުސާރަ 20،000 ރުފިޔާއަށް ކުޑަކޮށް، ކައުންސިލުގެ ނައިބު ރައީސްގެ މުސާރަ މާލިއްޔަތު ކޮމިޓީން ނިންމިގޮތަށް 15،000 ރުފިޔާ ދިނުމަށްވަނީ ނިންމާފައެވެ.

އަދި ކައުންސިލްގެ މެންބަރުންގެ މުސާރައިގެ ގޮތުގައި 9،600 ރުފިޔާ އަދި އެލަވެންސްގެ ގޮތުގައި 2،400 ރުފިޔާ ހަމަޖައްސައި، ޖުމުލަ 12،000 ރުފިޔާ ދިނުމަށް ކޮމިޓީން ނިންމިނަމަވެސް ބިލު ފާސްވީ ކައުންސިލް މެންބަރުންގެ މުސާރަ ޖުމްލަ 13000 ރުފިޔާއަށް ބޮޑުކުރުމަށް ހުށައެޅި އިސްލާހާއެކުގައެވެ.

ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނަށް ގެނެވުނު އިސްލާހްގެ ދަށުން ކައުންސިލްތަކުގެ އޮނިގަނޑަށް އައިސްފައިވާ ބަދަލުގެ ސަބަބުން މުސާރައާއި ޢިނާޔަތުގެ ގޮތުގައި މަހަކަށް 13،508،000 ރުފިޔާ އަދި އަހަރަކަށް 162،096،000 ރުފިޔާ ޚަރަދުވާނެކަމަށް ކޮމިޓީން ވަނީ ލަފާކޮށްފައެވެ. މިއީ މިހާރު ދެމުން އަންނަ މުސާރައާއި ޢިނާޔަތަށްވުރެ މަހަކަށް 7،088،000 ރުފިޔާ އަދި އަހަރަކަށް 85،056،000 ރުފިޔާގެ އިތުރުވުމެއް ކަމަށް ކޮމިޓީ ރިޕޯޓްގައި ބުނެފައިވެއެވެ.

ކައުންސިލް މެމްބަރުންގެ މުސާރަތައް ކަނޑައެޅި ނަމަވެސް އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކަށް ދޭ އެލަވަންސް ކަނޑައަޅާނީ ފިނޭންސް މިނިސްޓްރީންނެވެ.

ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނަށް އެންމެ ފަހުން ގެނެސްފައިވާ އިޞްލާހުތަކާއެކު ކައުންސިލްތަކަށް ބޮޑެތި ބާރުތަކެއް ވަނީ ލިބިގެންގޮސްފައެވެ. އެގޮތުން ރަށުގެ އިޙްތިޞާސްގެ ތެރެއިން ވާކަންކަމުން އާމްދަނީ ހޯދުމާއި، ދައުލަތުގެ ބަޖެޓުން ކައުންސިލްތަކަށް ފައިސާ ދިނުމާއި، މުނިސިޕަލް ޚިދުމަތްތަކުން ލިބޭ އާމްދަނީ ކައުންސިލްތަކަށް ސީދާ ލިބޭގޮތަށް ވަނީ ކަނޑައަޅާފައެވެ. އަދި ޤާނޫނު އަސާސީއަށް ގެނައި އިޞްލާހާއެކު އައު ކައުންސިލްތަކުގެ ދައުރު ވަނީ ތިން އަހަރުން 5 އަހަރަށް އިތުރުކޮށްފައެވެ.