ވެހެމުން ދިޔަ ބޯ ވާރޭ ތުނިކޮށްލިކަމަށް ބަލައިގެން ރިހާކުރުފުޅި ހެދުމުގެ ފަސްބަޔަށް ލާ އޮޅައިލިއެވެ. އަދި މަގުމަތީގައި ހެދިފައިވާ ފެންގަނޑުން ހެދުމާއި އަންނައެތި ވެސް ތެމިދާނެތީ ކޮށިކޮށްލިއެވެ. އިސްދަށަށް ޖަހައިގެން ފާރުކައިރިން އޭނާ ހިނގައި ގަތެވެ. ހީކުރި ގޮތާ ޚިލާފަށް ވެހޭ ވާރޭ ތުންޏެއް ނޫނެވެ. ގެއާއި ހަމައަށް ދާންވާއިރަށް ތެމިދާނެއޭ އޭނާގެ ހިތަށް އެރިއެވެ. ފެން ހެދިފައިވާލެއް ބޮޑުކަމުން ބައެއް ފަހަރު ކަށިމައްޗާ ހަމައަށް ވެސް ފެނުގެ އަސަރު ކުރެއެވެ. ވެލި މަގުގައި ފެން ހެދިފައިވާތީ ކިސަޑުގަނޑުގަނޑަށް ވެސް ފައި ވަންނަ ފަހަރުދެއެވެ. މިއީ ހުޅަނގު މޫސުމުގެ ވިއްސާރައެވެ. މިއަދު ވެސް ހެނދުނުއްސުރެ ވާރޭ ދަނީ ވެހެމުންނެވެ. އޭނާ ހިނގަނީ ވަރަށް ބަލައިގެންނެވެ. އުވަ ނުޖަހާ ހުރި ފާރުގައި ހިފަހައްޓައިގެން މަޑުމަޑުންނެވެ. ހިކިފަސްކޮޅެއް އޮތް ތަނަކާއި އަރާ ހަމަ ވެއްޖެއެވެ. އެންމެ އަވަހަށް ފެންނަން ހުރި ގޭގެ އަސްކަނިދޮށަށް ވަނުމުގެ ޚިޔާލު ވެސް ކުރިއެވެ.
ވެހެމުންދިޔަ ވާރޭ ކުއްލިއަކަށް ހުއްޓައިލި ކަމުގެ އިހުސާސެއް ވިއެވެ. އެ ހިނދު މައްޗަށް ބަލައިލިއިރު ބޯމަތީގައި ވަނީ އަލަ ފަތެކެވެ. އަދި ވަރަށް ގާތުގައި މީހަކު ހުރި ކަމުގެ އިހުސާސް ކުރެވުނެވެ. ކުއްލި ސިހުމަކާއެކު އެ މީހެއްގެ މޫނަށް ބަލައިލީ ވަށްކަޅިންނެވެ. ކުރިން ވެސް ކޮންމެވެސް ވަރަކަށް ފެނިފައި ހުރި މީހެއްހެން ހީވިއެވެ. އެކަމަކު ރައްޓެއްސެއް ނޫނެވެ. ބުނާނެ ބަހެއް ނެތި ނުހުއްޓި ކުރިއަށް ހިނގައިގަތީ ލަދުރަކިކަމާއެކުގައެވެ. އަދި ޖެހިލުންވެ ހުރެގެންނެވެ.
އުޅޭ ގެއާއި އަރާ ހަމަވަންދެން ތެމުނަ ނުދީ އަލަފަތުން ހިޔާ ކޮށްދެމުން އެމީހަކު އައެވެ. އެ މީހާ ހުރިލެއް ގާތްކަމުން އޭނާ ހުރީ ނޭވާ އަވަސް ވެފައެވެ. އެމީހަކަށް އެކަން އިހުސާސް ކުރެވުނީހެން ހީވިއެވެ. ތަންކޮޅެއް ދުރަށް ޖެހިލިއެވެ. އެކަމަކު އަލަފަތް ހުރީ ހަމަ ދިމާ ބޯމަތީގައެވެ. ކުރީ އެންމެ ސުވާލެކެވެ. "ކޮން ނަމެއް ކިޔަނީ؟"
"އަޅުގަނޑަށް ކިޔަނީ ހަފީޒާ" މިހެން ބުނުމާއެކު އަވަހަށް ފުޅަލި ހުޅުވައިލާފައި ހަރުކޮށް ގެއަށް ވަދެގެން ހަފީޒާ ހިނގައިގަތީ ފަސް އެނބުރި ބަލައިލާހައި ހިތްވަރު ނެތުމުންނެވެ. ރިހާކުރުފުޅި ބަދިގޭ މޭޒުމަތީގައި ބެހެއްޓިއިރު ވެސް ހިތަށް އަރަނީ އެއީ ކާކުބާވައެވެ. ނުދަންނަ މީހެއްގާތު ނަން ވެސް ބުނެވިއްޖެއެވެ. ހުތުރު މީހެއް ނޫނެވެ. އޭނާ އަދި އަހަރެން ހޯދާނެ ބާވައެވެ. އެރޭ ނިދަން އޮތް އިރު ވެސް ކުރެވެނީ އެ ޚިޔާލެވެ.
ހަފީޒާ މާލެ ފައިބާ ހުރި ގޭގައި ވަރަށް ގިނަ މަސައްކަތް ކުރާން ޖެހެވެ. ކައްކައި ކާން ދިނުމެވެ. ދޮވެ އިސްތިރި ކުރުމެވެ. މުޅި ގޯތި ކުނި ކެހުމެވެ. ރަށު މަދަރުސާއިން ކިޔެވި އެއްޗެއް ފިޔަވައި އިތުރު ތައުލީމެއް އޭނާއަކަށް ނުލިބެއެވެ. ހަފީޒާގެ ބައްޕަ މުހައްމަދަކީ މަސް ވެރިއެކެވެ. ހަފީޒާއާއި އެއްބަނޑު ދެން ތިބި މީހުން ތިބީ ރަށުގައެވެ.
ދެ ތިން ދުވަސް ފަހުން މަގުމަތި ކުނިކަހަން އޮއްވާ އެއްކަލަ މީހާއާ ބައްދަލު ވެއްޖެއެވެ. މިފަހަރު ކުރީ މުޅިން އެހެން ސުވާލެކެވެ. "އަހަރެންނާ އިންނަން ކެރޭނެތަ؟ އަހަރެންނަކީ މާލޭ މީހެއް. ކިޔަނީ އަލި މަނިކު."
ހަފީޒާ އެދުވަހު ޖަވާބެއް ނުދެއެވެ. އޭގެ ހަފްތާއެއް ހާ ދުވަސް ފަހެވެ. އަނެއްކާ އަލި މަނިކާ ދިވާވެއްޖެއެވެ. މިފަހަރު ވެސް ދެއްކީ ކައިވެނި ކުރަން ބޭނުން ވާ ވާހަކައެވެ. އެ ދުވަހު ހަފީޒާ ދިންހައި ވެސް ޖަވާބަކީ ބައްޕަގެ އާނބަސް ހޯދާފައި ނޫނީ ތިޔަވަރުގެ ކަމަކަށް ޖަވާބެއް ނުދެވޭނެއެވެ. ހަފީޒާއަކީ ކުރިން މާލޭގެ ބޭފުޅަކު ކައިވެނި ކުރި ކުއްޖެކެވެ. ނަމަވެސް އެއީ ކުޑަ ދުވަސް ކޮޅެއްގެ ކަމެކެވެ. އޭރު އުމުރުން ސާދަ އަހަރެވެ. އެ ކައިވެނި ވީ ހަމަ ހުވަފެނަކަށެވެ. ކައިވެނި އެހައި އަވަހަށް ރޫޅުމުން ލިބުނު ހިތާމައިގައި އެނބުރި ރަށަށް ދިޔައަސް ބައްޕަގެ އެދުމުގެ މަތިން އަލުން މާލެ ފޭބީ ކިޔެވުމުގެ ބޭނުމުގައެވެ. އުމުރުން މިހާރު 15 ފުރިއްޖެއެވެ. އެ ޒަމާނަކީ ތަސައްރަފު ފުރުމާއެކު މީހުންނާ ކައިވެނި ކުރި ޒަމާނެވެ. 1950 ގެ އަހަރުތަކެވެ.
އަލަފަތުގެ ހިޔަލުން އުފެދުނު ލޯބި ނިމުނީ ކައިވެންޏާ ހަމައިންނެވެ. ކިޔަވަން ދާނެ ފުރުސަތެއް ވެސް ނުލިބުނެވެ. ލަސްތަކެއް ނުވެ ބައްޕަގެ ޖަވާބާ އެކު ވަލީ ލިބި ކައިވެނި ކުރެވިއްޖެއެވެ. އަލި މަނިކުގެ މައިފުނަގެއަށް ހަފީޒާ ގެންގޮސްފިއެވެ.އަލި މަނިކު ކުރިން ކުރި ކައިވެންޏަށް ލިބުނު ދަރިފުޅު ބަލަނީ އެ ދަރިފުޅުގެ މަންމައެވެ. އެއީ މާލޭ މީހެކެވެ. ގެދޮރު ހުރި މީހެކެވެ. އަލި މަނިކުގެ މާބޮޑު އެހީތެރިކަމެއް ނުލިބުނަސް އޭނާ އައީ އެ ދަރިފުޅު ބަލައި ބޮޑު ކުރަމުންނެވެ. އެ ކައިވެނި ރޫޅުނު ގޮތުގެ މާބޮޑު ވާހަކައެއް އަލި މަނިކު ނުދައްކައެވެ. ހަފީޒާއަކީ ބަސް މަދު އުޅުން ހުރި ކެތްތެރި އަންހެނެކެވެ. އިސްކޮޅު ވެސް ރޫފަޔާއި އެއްވަރަށް ހުރި ރީތި އަންހެނެކެވެ. އަލަށް އައި ގޭގައި ވެސް ކުރިން އުޅުނު ގޭގައި ކުރި ފަދަ ބުރަ މަސައްކަތް ހަފީޒާއަށް ކުރާން ޖެހުނެވެ. އަލި މަނިކުގެ ބައްޕަ ނިޔާވެފައި ވުމުން ހަގަށް ތިބި ހަތް ކުދިންނާއި މަންމަ ބެލުމުގެ ޒިންމާ އޮތީ އަލި މަނިކުގެ ކޮނޑުގައި އެޅިފައެވެ. އުޅެނީ ފަގީރު ދިރި އުޅުމެކެވެ. ގެ ވެސް ހުރީ މާކަ މޮޅަށް ހަދާފައެއް ނޫނެވެ. ރާނާފައި ހުރި ބަޔަށް ވުރެ ފަނުން ހަދާފައި ހުރި ބައި ބޮޑެވެ. ގޯތީގައި ބޮޑީ ހުސްތަނެވެ. ފާޑުފާޑުގެ ގަސްތައް އިންދާފައި އޮވެއެވެ. އަލަ ގަސްތައް ވެސް މަދެއް ނޫނެވެ. ދިވެހި ރުކާ އަނބާ ފަޅޮލާ ފަތް ކޭލެވެ.
އަލި މަނިކުގެ މަންމައަކީ މީރުކޮށް ހެދިކާ ހަދާ މީހެކެވެ. އެ މަސައްކަތުގައި މައިދައިތައަށް އެހީ ވަނީ ހަފީޒާއެވެ. ހަދާ ހެދިކާ ހޮޓާތަކަށް ގެންދަނީ އަލި މަނިކެވެ. އެއްބަނޑު އެއްބަފާ ކުދިންނަށް ކިޔަވާދިނުގެ ޚަރަދުބަރަދު ބެލެހެއްޓުމުގެ ޒިންމާ ވެސް އެޅިފައި އޮތީ އަލި މަނިކުގެ ކޮނޑުގައެވެ.
ކައިވެނި ކުރިތާ މާގިނަ ދުވަހެއް ނުވެ ފުރަތަމަ ދަރިފުޅު ލިބިއްޖެއެވެ. އެ ދަރިފުޅަށް އަހަރު ވީއިރު އަނެއް ކުއްޖަކު ލިބިއްޖެއެވެ. އަދި ކައިރިކައިރީގައި ހަފީޒާއަށް ހަ ކުދިން ލިބި ވިހެއުމުގެ ތެރޭގައި ދެ ކުދިން މަރުވެ ދިޔައީއެވެ. އެހާ ކައިރީގައި ކުދިން ލިބި މަރުވެ ދިޔައިމާ ހަފީޒާއަށް ލިބު ހިތާމަ ކުޑައެއް ނޫނެވެ. ދުނިޔޭގައި ތިބި ހަތަރު ކުދިން ބޮޑު ކުރެވޭތޯ ބެލީއެވެ. ރަނގަޅު ބޭސް ފަރުވާއެއް ނުކުރެވެއެވެ. ރަނގަޅު ކާނާއެއް ނުދެވެއެވެ.
އެ ގޭގައި ދިރިއުޅޭތާ ދިހަވަރަކަށް އަހަރު ފަހުން އަލި މަނިކަށް މާލެއިން ގޯއްޗެއް ލިބިއްޖެއެވެ. އަލަށް ލިބުނު ގޯއްޗަށް ބަދަލުވެވެން އޮތީ އެތަނުގައި ގެއެއް އަޅައިގެންނެވެ. ގޯތި ލިބުނު ސަރަހައްދުގެ ވެލިގަނޑުގައި އޮތީ މުޅިން ވެސް އަކިރިއެވެ. މޫދާ ގާތްކަމުންނެވެ. ހުސް ބިމެކެވެ. އަލި މަނިކަށް ލިބޭ ހުސްވަގުތުގައި އެ ގޯތީގައި ފުރަތަމަ ބެހެއްޓީ ފެންވަޅެކެވެ. އެ ވަޅު ބަހައްޓަން ވަރަށް މަސައްކަތް ކުރާން ޖެހުނެވެ. އާނު ކެނޑުމުގައި އުފުލި ބުރައެވެ. ދެން ބެލީ ގެއެއް އެޅޭތޯއެވެ. ލިބޭ މަދު ފައިސާކޮޅުން ދަނޑިފަނުން ގެއެއް އަޅައިފިއެވެ. އަލި މަނިކު ވެސް އިތުރަށް ތައުލީމު ހޯދުމަށް ޓަކައި ކުރިން ވަނީ މާލިމީކަން ދަސްކޮށްފައެވެ. ނަތީޖާ ވެސް ވަރަށް ރަނގަޅެވެ. ނަސީބު ދިމާކުރި ގޮތުން ބޯޓުފަހަރުގެ މާލިމީކަން ކުރުމުގެ ފުރުސަތު ލިބުނެވެ. މިހާރު ލިބޭ އާމްދަނީ ވެސް އިތުރެވެ. ފުރަތަމަ ފެށީ ރާއްޖޭގެ އެތެރޭގެ ދަތުރުތައް ކުރާށެވެ. ނަމަވެސް ފަހުން ރާއްޖޭން ބޭރަށް ދަތުރު ކުރާ ބޯޓުފަހަރުގެ މާލިމީއަކަށް ވީއެވެ. މިހާރުގެ ގޮތުން ބުނާނަމަ ކެޕްޓަނެވެ.
ރާއްޖޭއިން ބޭރަށް ދަތުރުތައް ކުރާއިރު ގިނަ ދުވަސް ހޭދަ ވެއެވެ. އެ ދުވަސް ތަކުގައި ހުރިހާ ކުދިން ގޮވައިގެން އުޅެނީ ހަފީޒާއެވެ. ދަރުފެޅިއަސް ގެއަށް ގެންނަ މަސް ކެނޑިއަސް ހަމަ ހަފީޒާއެވެ. ހަފީޒާގެ ނަސީބަކީ ރާއްޖެއާއި އަވަށްޓެރި ގައުމުތަކަށް އަލި މަނިކު ދަތުރު ކުރާ ބޯޓު ދާކަމެވެ. ކުއްޖަކަށް ފަހު ކުއްޖެއް ލިބެމުން ދިޔައެވެ. 1970 ގެ އަހަރުތަކަށް އެޅިއިރު ކުދިންކޮޅު ވެސް ބޮޑެތި ވާން ފަށައިފިއެވެ. މިގޮތަށް ދަތުރު ކުރާތާ އަހަރުތަކެއް ވީ ފަހުން އަލި މަނިކު ކުރާ ދަތުރުތަކުގައި ހަފީޒާ ގެންދަން ފަށައިފިއެވެ. ބޭސް ކުރުމަށާއި ހިތް އުފާ ކޮށްލުމަށެވެ. ސިލޯނާއި އިންޑިޔާއަށެވެ. ސިލޯނުގެ ބައިސްކޯފު ތިއޭޓަރުތަކުގައި އަޅުވާ ރީތި ހިންދީ ފިލްމްތައް ފެންނަން ފަށައިފިއެވެ. އަބީމާން، ބޮބީ، އާރުޒޫ، ސަންގަމް ފަދަ ފިލްތަކެވެ. އަލި މަނިކަކީ ހިންދީ ފިލްމާއި ލަވައަށް ވަރަށް ލޯބި ކުރާ މީހެކެވެ. ހޮޅިއާއި ހޮޅިޖަހާ އެއްޗެއް ވެސް އެ ގޭގައި ހުރެއެވެ. ދޮށީ ފިރިހެން ދަރިފުޅަކީ ވެސް ލަވަޔަށް ލޯބި ކުރާ ކުއްޖެވެ. ޢަލި މަނިކާ ހަފީޒާގެ ލޯބީގެ ރަން ޒަމާން އައިހެން ދެ މީހުންނަށް ވެސް ހީވިއެވެ. އެއީ އެ ޒަމާނުގައި ރާއްޖޭގެ މަދު މީހަކަށް ނޫނީ ނުލިބޭނެ ފުރުސަތަކެވެ. ބޯޓުގެ ކެޕްޓަނަށް އޮންނަ އިމްތިޔާޒުގެ ބޭނުން އަލި މަނިކު ހިފަމުން ދިޔައީ ވަރަށް ފުރިހަމައަށެވެ. މިފަދަ ދަތުރުތަކަށް ހަފީޒާ ރަށުން ބޭރަށް ދާއިރު ދަނީ ކޮންމެވެސް ގާތް މީހަކު ކުދިން ބެލުމަށް ގޭގައި ބައިންދާފައެވެ. ފަހުންވެސް ކުދިން ލިބެމުން ދިޔައެވެ. ޖުމުލަ 11 ކުދިން ލިބުނެވެ. ހުރިހާ ކުދިންނަށް ކިޔަވައި ދިނުމަށް އަލި މަނިކު ވަރަށް ޚާއްސަ އިސްކަމެއް ދިނެވެ. އެ ގޮތުން ހުރިހާ ކުދިންނަށް ރަސްމީ ތައުލީމުދިނެވެ. އަމީނިއްޔާ، މަޖީދިއްޔާ އަދި އީޕީއެސް ސްކޫލުންނެވެ.
އަލި މަނިކުގެ ލޯބީގެ ރަން ޒަމާނަށް ފަނޑު ކަމެއް ގެނުވީ އޭނާގެ ދޮށީ ފިރިހެން ދަރިފުޅު ސައިކަލު އެކްސިޑެންޓެއް ވުމުންނެވެ. އެ އެކްސިޑެންޓްގައި އޭނާގެ ބޯފަޅައިގެން ގޮސް ސިކުނޑިއަށް ލޭ އެޅުނެވެ. ހަސްފަތާލުން ދެމުން ދިޔަ ފަރުވާއިން ކުރިއެރުމެއް ނުލިބި ނިޔާވީއެވެ. ސްރީލަންކާއަށް ގެންދެވޭތޯ ވެސް ބެލިއެވެ. ނަމަވެސް އެ ފުރުސަތު ލިބުމަށް ވަގުތު ތަނެއް ނުދިނެވެ. މުޅި އާއިލާއަށް މިކަން ވީ ވަރަށް ބޮޑު ހިތާމައަކަށެވެ. ހުރިހާ ކުދިންގެ ދޮންބޭބެ ކުއްލި ގޮތެއްގައި ނެތި ދިއުމުންނެވެ. އިސްކޫލު ނިމި ވަޒީފާއެއްވެސް އޭރު އޭނާ ވަނީ އަދާކުރަން ފަށާފައެވެ. އެ ކުދިންގެ ދޮންބޭބެއަކީ މުޅި ގޭގެ ދިރުމެވެ. އަލި މަނިކުގެ ދެމަފިރިންނަށް ވެސް ބަރުދާސްތު ނުކުރެވޭ ވަރުގެ ހިތާމައަކަށް މިކަން ވިއެވެ. ހަފީޒާ ވެސް ހަސްފަތާލުގައި އެނދުމަތި ކުރާން ޖެހުނެވެ. މި ހިތާމާގައި އަލި މަނިކު ގަސްދުކުރީ ދަތުރު ކުރުން ހުއްޓައިލާށެވެ. އަދި ހަފީޒާއާއި ކުދިންގެ ގާތުގައި މާލޭގައި ހުންނާށެވެ. ސަބަބަކީ ދެން ދޮށްޓަށް ތިބީ މުޅިން ވެސް އަންހެން ކުދިންކަމަށް ވާތީއެވެ.
އާ ފެށުމަކުން އާމްދަނީ ހޯދުމުގެ މަސައްކަތް ފެށިއެވެ. މާލޭގެ ބޮޑު ސޭޓެއްގެ ފިހާރައިގެ ހިސާބު ބަލަހައްޓާ މީހެއްގެ ގޮތުގައެވެ. ބޯޓު ކެޕްޓަނަކަށް އުޅުނު އިރަށް ވުރެ މުސާރަ ކުޑައެވެ. ހެނދުނު ދާ މީހާއަށް އާދެވެނީ ހަވީރުއެވެ. ދޮށީ ފިރިހެން ދަރިފުޅު ނިޔާވިތާ ދެ އަހަރު ނުވެ އުޅެނިކޮށް އަނެއްކާ އަނެއް ކުއްޖަކު ނިޔާ ވެއްޖެއެވެ. މިފަހަރު ނިޔާވީ ދޮށީ އަންހެން ދަރިފުޅެވެ. އޭރު އަލި މަނިކަށް ކާފަ ކިޔާ އަންހެން ކުއްޖަކު ވެސް އޭނާގެ ހުއްޓެވެ. ދެވަނަ ދަރިފުޅު ވިހެއުމުގެ ތެރޭގައި އޭނާ ނިޔާވީއެވެ.
ދުނިޔޭގެ ކަންކަން ބަދަލު ވަނީ ހަމަ އެކަކަށް ވެސް ބުނެދޭން ނޭނގޭ ގޮތަކަށެވެ. ވަގުތު ޖެހުމުން ޒުވާނެއް ކުޑަ ކުއްޖެއް މުސްކުޅިއެއް ތަފާތު ކުރުމެއް ނެތި މިދުނިޔެއާ ވަކި ވެގެން ދަނީއެވެ. އަހަރެމެން އިންސާނުންނަށް އެއްވެސް އާރެއް ބާރެއް ނުފޯރުވެއެވެ. ޑަކްޓަރުން އިންސާނުންގެ ފުރާނަ ސަލާމަތް ކުރާން ކިތަންމެ މަސައްކަތެއް ކުރިއަސް އެކަމުގެ ބާރު ވަނީ ހަމަ އެންމެ ފަރާތެއްގައެވެ. އެއީ އިންސާނުން މި ދުނިޔެއަށް އުފަން ކުރުވި ޚާލިގުވަންތަ މާތް ﷲ އެވެ.
ދޮށީ ދެބެން މި ގޮތަށް ގާތް ގާތުގައި ނިޔާވުމީ އަނެއްކާ ވެސް މުޅި އާއިލާއަށް ކުރިމަތިވި ވަރަށް ބޮޑު ހިތާމައެކެވެ. މި ހިތާމަތަކާ ދުރަށް ދިއުމަށް އަލި މަނިކު ފިހާރައިން ޗުއްޓީ އެއް ނަގައިގެން އަންހެނުންގެ ބޭސް ފަރުވާއަކަށާ އެކު އިންޑިޔާއަށް ދިޔައެވެ. އިންޑިޔާ ދަތުރަށް ފަހު މާލެ އަޔަސް އެ ހިތާމަތަކާ ދުރުވޭ ގޮތެއް ދެމަފިރިންނަކަށް ނުވެއެވެ. ކުރީގައި ހުރި އުފާވެރިކަމެއް ވެސް ނެތެވެ.
ދެން ބެލީ ދެން ތިބި ކުދިންނަށް ރަނގަޅު ތަރުބިއްޔަތެއް ދެވޭތޯއެވެ. ކިޔަވައި ދިނުމަށް ބޮޑު ޚަރަދެއް ވެސް ކުރާން ޖެހެއެވެ. ފޮތްތައް ވެސް އޭރު ޖެހެނީ ގަންނާށެވެ. ވަރަށް އަގު ބޮޑު ޓެކްސްޓް ފޮތް ވެސް ހުރެއެވެ. މީހުނަށް ނުދަރާ ހުރިހާ ކުދިންނަށް ކިޔަވައި ދިނުމުގެ އުއްމީދު އަލި މަނިކުގެ ހިތުގައި އޮވެއެވެ. ބައެއް ފަހަރަށް ބައެއް ފޮތް ނުލިބިގެން އެކަމާ ވެސް ދެމަފިރިން ފިކުރު ކުރެއެވެ. ނުފޯރާ ފޮތިން ފޫ ނުގެޅުމުގެ އަޒުމު އަލި މަނިކުގެ ހިތުގައި އޮވެއެވެ. ހަފީޒާއަކީ ވެސް ތެދުވެރި ވަފާތެރި އަނތްބެކެވެ. ހުރިހާ ކުދިން ބަލައި ބޮޑުކުރީ ކެތްތެރިކަމާއި ވަފާތެރިކަމާ އެކުގައެވެ.
ގޭގައި ފަނުން ހުރި ބައިތައް މަޑުމަޑުން ރާނަމުން ބަދަލު ކުރަމުން ގެންދިޔައެވެ. ހުރިހާ ކުދިން ތަސައްރަފު ފުދި ބޮޑުވެއްޖެއެވެ. ދޮށްޓަށް ތިބި ކުދިން ކިޔަވާ ނިމިއްޖެއެވެ. އެ ކުދިންނަށް ރަނގަޅު ވަޒީފާ ހޯދައި ދިނުމަށް ތަފާތު މީހުން ގާތަށް އަލި މަނިކު ހިނގިއެވެ. ނަތީޖާ ވެސް ފެނުނެވެ. ބޮޑެތި ކުންފުނިތަކުން ބައެއް ކުދިންނަށް ވަޒީފާ ލިބުނެވެ. ހަގަށް ތިބި ކުދިން ވެސް ކިޔަވައިގެން ސަރުކާރުގެ ވަޒީފާތަކަށް ވަނެވެ. ފަހަރަކު ކުއްޖަކު މީހުންނާއި ކައިވެނި ކުރަމުން ދިޔައެވެ. ހުރިހާ ކުދިން ވެސް ކައިވެނި ކުރީ އަޚުލާގު ރަނގަޅު މީހުންނާއެވެ. އަލި މަނިކު އޭރުވެސް ވަޒީފާ އަދާކުރަމުން ގެންދިޔައެވެ. ހަމަ އެފިހާރައިގައެވެ. މިހާރު އެ ފިހާރަ ވަނީ ބޮޑު ކުންފުންޏަކަށް ބަދަލުވެފައެވެ. މާލޭގެ ނަންހިނގާ މަޝްހޫރު ކުންފުންޏެކެވެ. ވިޔަފާރި ފުޅާވީ ވަކިގޮތަކަށް ނޫނެވެ. އެކި ޒާތުގެ ވިޔަފާރިއެވެ. އަލި މަނިކަކީ ހުރިހާ ވިޔަފާރިތަކުން ގެންނަ ފައިސާ ގުނާ އަދި ޖަމާކުރާ އެންމެ އިސް މީހާއެވެ.
އަލި މަނިކުގެ ދެމަފިރިންނަކީ ވަރަށް އަޅުވެރި ދެ މީހުންނެވެ. ކޮންމެ އަހަރަކުހެން އުމުރާއަށް ނުވަތަ ހައްޖަށް ނުދާ އަހަރެން ނުދެއެވެ. އުމުރުން ދުވަސްވީ ވަރަކަށް އަލި މަނިކުގެ ގައިބާރު ދިޔައީ ދެރަވަމުންނެވެ. ދަތުރުފަތުރު ކުރުމުގައި ވެސް މައްސަލަތަކާއި ކުރިމަތިލާން ޖެހެއެވެ. ނަމަވެސް އަލި މަނިކަކީ ގޮތް ދޫކުރާ މީހަކަށް ނުވާތީ ބޭރަށް ކުރާ ބޭސް ދަތުރު ވެސް ހުއްޓައެއް ނުލައެވެ. ވަޒީފާ އަދާކުރަމުން ދިޔަ ފިހާރަ ބޮޑު ކުންފުންޏަކަށް ބަދަލުވެ އަލި މަނިކުގެ މައްޗަށް މީހުން އިސްކުރެވެން ފަށައިފިއެވެ. މިހާރު ބޭނުންވަނީ ވަޒީފާއިން ވަކިވެ ގޭގައި ހުރުމަށެވެ. މާބޮޑަށް ބަލިވަނީއެވެ. އަބަދު ބޭހަށް ރާއްޖޭން ބޭރަށް ދާން ޖެހެނީއެވެ. ބޭސް ކުރަން ދާ ދަތުރުތަކުގައި ހަފީޒާ ވެސް ގެންދެއެވެ. ހަފީޒާގެ ބަލިހާލު ވެސް ދަނީ ބޮޑުވަމުންނެވެ. އަހަރަކު ދެތިން ފަހަރު ބޭހަށް ދާން ޖެހެއެވެ.
ދެ މީހުންގެ ހިތުގައި އޮތް ލޯތްބަކަށް ބަދަލެއް ނާދެއެވެ. އަލި މަނިކު މެންދުރު ފިހާރައިން އައުން ލަސް ވިއަސް ދޮރާށި ދޮށަށް ނުކުމެ އަލި މަނިކުގެ އިންތިޒާރުގައި ހަފީޒާ ހުރެއެވެ. ކާއިރު ކައިރީގައި އިނދެއެވެ. މިއީ ފެށުނީއްސުރެ ހަފީޒާގެ އާދައެވެ. އެންމެ ފަހުން ފިހާރައިން އަލި މަނިކު ވަކިވާން ގަސްތު ކުރާކަން ދަރިން ގާތުގައި ބުނެފިއެވެ. އަދި އެ ގޮތުގެ މަތިން ވަކި ވެގެން ގޭގައި ހުންނަން ފަށައިފިއެވެ.
ދުވަސްކޮޅަކުން އަލި މަނިކުގެ ދެމަފިރިންނަށް ކާފަމާމަ ކިޔާ ކުދިން އިތުރުވާން ފަށައިފިއެވެ. އެވަރު ވީއިރު ވެސް ހަފީޒާ ބަދިގޭގައި އަދާކުރަމުން ދިޔަ މަސްއޫލިއްޔަތުން އަތެއް ދުލެއް ނުކުރެއެވެ. މެންދުރު ކުރީގައި ދަރިން އޮފީހުގައި އުޅޭއިރު އެ ކުދިންގެ ދަރިން ބަލަމުން ކެއްކުމުގެ މަސްއޫލިއްޔަތު އުފުލަމުން ދިޔައެވެ. އެއް ގެއެއްގައި އެކުވެރިކަމާއެކު ހުރިހާ ކުދިންވެސް އުޅެމުން ގެންދިޔައެވެ. ޒަމާން ބަދަލުވެ އާއިލާ ބޮޑުވުމުން އެއްކޮށް ނޫޅެވޭ ވަރަށް ގޯތި ކުޑަވެއްޖެއެވެ.
އަލި މަނިކު އަބަދުވެސް ބުނަމުން ދަނީ އަހަރެން ދުނިޔޭގައި ހުރެ ގޯތި ބަހަން ބޭނުން ނުވާ ކަމުގައެވެ. މި ވާހަކަތައް ދަރިން ގަބޫލުކުރާން ބޭނުމެއް ނުވެއެވެ. ސަބަބަކީ ކުދިކުދި ކޮޓަރީގައި ދިރިއުޅުން ފަސޭހަ ނުވުމެވެ. ގޯތީގައި ވަކި ބިސީތަކަށް އުޅުން އުނދަގޫ ވުމެވެ. ކުދިން ލިބެން ފެށުމުން ގޭތެރޭގައި މައްސަލަތައް ނުކުންނާން ފެށީއެވެ. ހަފީޒާ ދަރިންނަށް ދޭ ނަސޭހަތަކީ ބައްޕަ އެދޭ ގޮތަށް ކަން ކުރުމެވެ. ގޯތި ބެހުމުން ވަކިވެ ދަރިން ނުފެންނާނެ ކަމުގެ ކަންބޮޑުވުން ހަފީޒާގެ ހިތުގައި އޮވެއެވެ. އަވަށްޓެރިންގެ ގެތަކަށް ވެސް ވީ އެހެންނެވެ.
އެތައް ފަހަރަކު އަލި މަނިކާ ދަރިން އެކި ގޮތްގޮތަށް ވާހަކަ ދައްކާ އެންމެ ފަހުން ގޯތި ބަހަން އެއްބަސް ވެއްޖެއެވެ. ގޯތި ތިންބައިކޮށް ކޮންމެ ތިންކުއްޖަކަށް ބައެއްގެ މަތިން ބަހައިފިއެވެ. ހުރިހާ ކުދިން ވެސް އުސްކޮށް އިމާރާތްކޮށް ފަހި ދިރިއުޅުމެއް އުޅެން ފަށައިފިއެވެ.
ހަފީޒާގެ ދެފައިގައި ރިއްސާތީ އެކަމުގެ ވޭނުގައި އުޅޭތާ އެތައް ދުވަހެއް ވެއްޖެއެވެ. ފަރުވާ ކުރެއެވެ. ލުއެއް ނުލިބެއެވެ. ހިނގުމަށް ދަތިވެ އެންމެ ފަހުން ހުޅު ބަދަލު ކުރުމުގެ އޮޕަރޭޝަނެއް ކުރާން އަލި މަނިކު ނިންމިއެވެ. ދެފައި އެއްކޮށެވެ. ދަރިން އެކަމާ ގަބޫލެއް ނޫނެވެ. ނަމަވެސް އަލި މަނިކު ގެ އަތްމަތީ ބަހަކީ ކަލޭމެންނަން މަންމަ އުޅޭ ހާލެއް ނޭނގޭނެއެވެ. ދަންވަރު އަދި ފަތިހު އެނދުން ނުތެދުވެވި ހިނގައިނުގަނެވި އަޅާ ވޭން ފެންނަނީ އަހަރެންނަށެވެ. އެކަން އަހަރެން ބަލާކަށް ނުހުންނާނަމެވެ.
ރާއްޖެއިން ބޭރަށް ދާން ކުއްލިއަކަށް ފުރައިފިއެވެ. ބަސްބުނި ހިނދުން ހަފީޒާގެ އޮޕަރޭޝަން އިންޑިއާގެ ހަސްފަތާލެއްގައި ކޮށްފިއެވެ. އަލި މަނިކު ބޭނުންވި ފަދައިން ދެފައި އެއްކޮށެވެ. އޮޕަރޭޝަން ކުރިތާ ދެވަނައަށް ވީދުވަހު އެއްފައިގެ އޮޕަރޭޝަންގައި މައްސަލަ ޖެހި ދެވަނަ އޮޕަރޭޝަނެއް ކުރާން ޖެހިއްޖެއެވެ. މިކަމުގެ ސަބަބުން ހަފީޒާއަށް ލިބުނު ޝޮކްގައި އެތައް ދުވަހަކު ހަސްފަތާލުގައި އެނދުމަތި ކޮށްފައި އޮތެވެ.
ތިން މަސް ފަހުން ރާއްޖެ އަތުވެއްޖެއެވެ. ހަފީޒާ ގެންނަން ޖެހުނީވެސް ވަރަށް އުނދަގުލުންނެވެ. ސަބަބަކީ ހިނގަން ބިރު ގަތުމެވެ. ގޮނޑީގައި އުފުލާން ޖެހުމެވެ. މާލެ ގެނެވުނަސް އޮންނަނީ އެނދުގައެވެ. އަލި މަނިކަށް ހަފީޒާގެ ދެފައި އެއްފަހަރާ އޮޕަރޭޝަން ކުރެވުން އެއީ ހެދުނު ގޯހެއްކަން މިއަދު އިހުސާސް ވާން ފަށައިފިއެވެ. މިހާރު އަލި މަނިކު އަބަދު އިންނަނީ ހަފީޒާ ގާތުގައެވެ. ކޮންމެ ހަފުތާއަކު ކަސްރަތު ކުރާ ޑޮކްޓަރު ގެއަށް ގެނެސްގެން ފަރުވާ ދޭން ފަށައިފިއެވެ. ކުޑަކޮށް ރަނގަޅުވާހެން ހީވެއެވެ. ނަމަވެސް އަނެއްކާ ވެސް ހުޅުން ނެއްޓިއްޖެއެވެ. ރާއްޖޭގެ ޑޮކްޓަރުން ވެސް ފަރުވާކުރެވޭތޯ ބެލިއެވެ. އެކަމަކު އަލި މަނިކު ބޭނުން ވަނީ ހަމަ އިންޑިއާއަށް ދާށެވެ. އަލުން ހުޅު ބަދަލު ކުރާން ޖެހުނީއެވެ.
އެފަހަރުގެ ދަތުރުގައި ވެސް އެތައް މަހެއް އިންޑިއާގައި ހޭދަކުރާން ޖެހުނެވެ. މިފަދަ ކޮންމެ ދަތުރެއްގައި ޢަލިމަނިކު ދާން ބޭނުން ވެއެވެ. ހަފީޒާއާއެކު އޭނާއަށް ވާގޮތް ގާތުން ބެލުމުގެ ލޯބި ހިތުގައި އޮންނަލެއް ބޮޑު ކަމުންނެވެ. ހަފީޒާ ވެސް ބޭނުން ވަނީ އެގޮތެވެ.
އުމުރުން ދުވަސްވުމުގެ ސަބަބުން އަލި މަނިކުގެ ގައިބާރު ވެސް މިހާރު ދެރަވާން ފަށައިފިއެވެ. އަންހެނުން ހަފީޒާ އަލި މަނިކަށް ވުރެ މާކުރިން ބަލި އެނދުގައި އޮށޯންނާން ޖެހުނީއެވެ. ކުރި އޮޕަރޭޝަނާ ގުޅިގެންނެވެ. އަލި މަނިކަކީ ރާއްޖޭގެ ޑަކްޓަރުންނަށް އިތުބާރު ކުރާ މީހެއް ނޫނެވެ. މާޒީގައި ދިމާވި ދެ ހާދިސާގައި ދޮށީ ދެބެން ވަކިވެ ދިޔަ ފަހުން އެކަން ހިތުން ފިލައިގެން ނުދެއެވެ. އެކަން އަބަދުވެސް ސިކުނޑީގައި ހަރުލާފައި ހުރެއެވެ. އަވަށްޓެރި އުތުރުކަރައިގެ ބޭސް ފަރުވާއަށް މާބޮޑު އިތުބާރެއް ކުރަނީއެވެ. ތިން މަހުން ތިންމަހުން ބޭސް ފަރުވާ އަށް ނުގޮހެއް ހިތެއް ހަމައެއް ނުޖެހެވެ.
ހަފީޒާއަކީ އެނދުގައި އޮށޯންނާން ޖެހެންދެން އޭނާގެ ހުރިހާ ދަރިންނަށް ތަފާތު ކުރުމެއް ނެތި އަޅައިލި މަޔެކެވެ. އަލަފަތު ލޯބިން ފެށުނު ކައިވެނީގައި ރަން ޒަމާން ދިޔައިރު އަލި މަނިކަށް ވަނީ ނޭނގޭ ބަދަލު ތަކެއް އައިސް ފައެވެ. ރުޅި ގަދަ ވުމެވެ. އެއްވެސް މީހެއްގެ ބަސް ގަބޫލު ނުކުރުމެވެ. ޚުދު ހަފީޒާ ކިތަންމެ ރަނގަޅު ވާހަކައެއް ބުންޏަސް ގަބޫލު ނުކުރުމެވެ. ބުނާހާ ވެސް ބަހަކީ އަހަރެންނަކީ ތައުލީމު ލިބިފައި ހުރި މީހެކެވެ. އަހަރެން ވިސްނަނީ ސަތޭކަ ސިކުނޑިންނެވެ. ތައުލީމު ނުލިބޭ މީހުންނަން ރަނގަޅަކަށް ނުވިސްނޭނެއެވެ. ހަފީޒާއަށް ރަނގަޅު ތައުލީމެއް ނުލިބުނީ ވެސް އަލި މަނިކުގެ އަލަފަތުގެ ލޯބީގައި ޖެއްސުމުންނެވެ. ކުރުނުކޮށް ކުރި އާދޭހެވެ. އެޅި މުގޯއްޔެވެ.
ގޭގައި ހަފީޒާ އެނދުމަތި ކޮށްފައި އޮތުމުން ތަފާތު ބަލިތައް އިތުރު ވާން ފެށިއެވެ. އަލި މަނިކުގެ ހިތުގައި ހަމަދަރުދީ އާއިލޯބި އިހުނަށް ވުރެ ބޮޑު ވާން ފެށިއެވެ. އަބަދާ އަބަދު ހަފީޒާގެ ހާލު ގާތުން ބަލައެވެ. ކައިރީގައި އިނދެ ފިރުމާދީ ހަދައެވެ. ދަންވަރު ހޭލައިގެން ހަފީޒާއަށް މައިލޯ ކަހަލަ ކޮންމެ ވެސް ބުއިމެއް ނުދޭ ރެއެއް ނުދެއެވެ. ބަނޑުހައި ވެދާނެ ކަމުގެ ބިރުގައެވެ. އެނދުމަތި ކުރިފަހުން ހަފީޒާ އިހުނަށްވުރެ ބަސް މަދު ވިއެވެ. މަދު ފަހަރަކު ނޫނީ ވާހަކައެއް ނުދައްކައެވެ. އުމުރުން ދުވަސްވެ ގައިބާރު ނެތުނަސް ލޯތްބަކަށް ބަދަލެއް ނާދެއެވެ.
ހަފީޒާއަކީ އަލި މަނިކާއި އިނީއްސުރެ ރީތި ބަހުން ވާހަކަ ދައްކާ މީހެކެވެ. ކުދިންނަށް ވެސް އެގޮތް ދަސްކޮށްދިން މީހަކީ ހަމަ ހަފީޒާއެވެ. ހުރިހާ ކުދިންނަކީ ދީނަށް ލޯބި ކުރާ ދަރިންނަށް ހެދުމުގައި ހަފީޒާގެ ރޯލު ކުޑައެއް ނޫނެވެ. ހަމަ އެގޮތަށް ގޯތި ނުބަހާއިރު ކޮންމެ ރެއަކު ފަތިހު ނަމާދަށް ތެދުވުމަށް ކުދިންނަން ގޮވާ ނެގުމުގައި އަލި މަނިކުގެ ދައުރު ވެސް ކުޑައެއް ނޫނެވެ.
އެނދުމަތިކޮށްފައި ހަފީޒާ އޮންނައިރު ދުވަސް ކޮޅުކޮޅުން ހަސްފަތާލަށް ގެންގޮސް ފަރުވާދޭން ޖެހެވެ. ހަސްފަތާލަށް ގެންދިޔައަސް އަލި މަނިކު އިރުއިރުކޮޅުން ހަފީޒާގެ ޚަބަރު ބަލައެވެ. އަދި އެވަރު ނުފުދިގެން އޭނާގެ ހާލު ބަލަށް ދެއެވެ. އެހާ ވެސް ބޮޑަށް ލޯބިވެއެވެ.
ހަފީޒާ ބެލެހެއްޓުމަށް ބިދޭސީ ދެ އަންހެނުން ވެސް ހޯދިއެވެ. އެކަމަކު ދަރިންގެ އަޅައިލުން ވެސް ލިބެއެވެ. އެނދުމަތީގައި އޮންނައިރު ދޭންޖެހޭ ޚިދުމަތަކީ ކުޑަ ޚިދަމަތެއް ނޫނެވެ. ފެންވެރުވުމެވެ. ކާންދީ ނަމާދު ކޮށްދިނުމެވެ. އަބަދު ގާތުގައި މީހަކު ހުރުމެވެ.
އަލި މަނިކަކީ ވެސް ވަރަށް ގިނަ ވިޓަމިންތަކާއި ބޭސްތައް ކަމުން ގެންދިޔަ މީހެކެވެ. އަދި އަމިއްލައަށް ވެސް ބޭސް ނަގައިގެން ކަމުން ދިޔައެވެ. އެކަމުގެ ސަބަބުން ސިއްހީ މައްސަލަތައް ނުކުންނަން ފެށިއެވެ. ތިންމަހުން ބޭރަށް ދާ ދިއުމަށް ނިމުމެއް ނާދެއެވެ.
އެއް ފަހަރަކު ހަފީޒާ ހާލު މާ ބޮޑުވިއެވެ. ހަސްފަތާލުގައި އެނދުމަތި ކޮށްފިއެވެ. މިފަހަރު އައިސީޔޫގައި ފަރުވާދޭން ޖެހުނެވެ. އެކަހެރި ކޮށްފައި އެތައް ދުވަހަކު އޮތެވެ. ފަހުން ލުއި ވުމުން ކޮޓަރިއަކަށް ބަދަލު ކުރީއެވެ.
ހަމަ އެދުވަސްކޮޅު އަލި މަނިކު ވެސް ހިނގާ އުޅެން ދަތިވެ ހަސްފަތާލުގައި އެނދުމަތި ކުރާން ޖެހުނެވެ. ދެ މީހުން އެއް ކޮޓަރިއެއްގައި އެއް ހާލެއްގައި ތިބުމީ ދަރިންނަށް ވެސް އަދި ދެމަފިރިންނަށް ވެސް ފުން އަސަރުތަކެއް ކުރުވި ކަމެކެވެ. އެކަކު އަނެކަށް ގޮވައިލުން ފިޔަވާ ކުރެވޭނެ ކަމެއް މިއަދަކު ނެތެވެ. ފިރުމާލަދެވޭ ކަށް ވެސް ނެތެވެ.
ހަސްފަތާލުގައި ދުވަސްކޮޅެއް ވަންދެން ފަރުވާ ކުރުމަށްފަހު ދޫކޮށްލިއެވެ. ހަފީޒާގެ ބޮޑު ބައްޔަކީ ފުއްޕާމޭގެ ބައްޔެވެ. ދަރު އުނދުނުން ކެއްކި ޒަމާނުގެ ގެދަބުޅިއާއި ދުމުގެ އަސަރު ހަރުލާފައި ހުރުމެވެ. ފުއްޕާ މޭ މަސައްކަތް ކުރަންވާ ވަރަށް ނުކުރުމެވެ. މެޝިންގެ އެހީތެރިކަން ހޯދާން ޖެހުމެވެ.
ހަސްފަތާލުގައި އޮތް އިރު ހަފީޒާއަށް ހޮޅިން ކާންދޭން ފެށިއެވެ. ގެއަށް ބަދަލު ކުރިއަސް މިކަމަށް ނިމުމެއް ނާދެއެވެ. ހާލަތުގެ ގޮތުން އެކަން ބަދަލު ނުކުރެވޭނެ ކަމަށް ޑޮކްޓަރުން ލަފާދިނެވެ.
ގޭގައި އެއް ކޮޓަރީގައި ދެމަފިރިން އެނދުމަތި ކޮށްފައި ތިބޭ އިރު ދެ މީހުންގެ ލޯބީގެ ރަން ޒަމާނުގެ ވާހަކަތައް ދަރިންނަށް ކިޔައިދެމުން ގެންދެއެވެ. އެކުގައި ބައިސްކޯފަށް ދާ ވާހަކައެވެ. އެކުގައި ބޯޓުގައި ކުރި ދަތުރުތަކުގެ ވާހަކައެވެ. ކުރީގެ އެކިއެކި ހާދިސާތަކެވެ. ހަފީޒާއަކީ ތަފާތު ޅެން ހިތުން ދަސްކޮށްފައި ވާ މީހެކެވެ. ދޭތެރެއަކުން ޅެމެއް ކިޔައިލައެވެ. ދަރިންނަށް އިބުރަތްތެރި ބައިތުތައް ކިޔައިދެއެވެ.
އެ ދެ ލޯބިވެރިންގެ މިއަދުގެ ޝަކުވާއަކީ އަބަދު ހުރިހާ ކުދިން ނުފެންނަ ކަމެވެ. ގޯތި ބައި ކުރެވި އެކި ކުދިން އެކި ބިސީތަކަށް އުޅެން ފެށުމުންނެވެ. އެކި ކުދިން އެކި ގައުމުގައި އެކި ބޭނުންތަކުގައި ތިބުމެވެ. ކުރިން ބޮޑު އެއް އާއިލާއަކަށް އުޅުނުއިރު އެއް ތަށިމަތިން ހުރިހާ ކުދިން ކެއި ޒަމާން ވަނީ މާޒީވެފައެވެ. އެއީ މި ޒަމާނުގައި ވާގޮތެވެ.
ގޭހުން ކެއްކެން ނެތް ޒަމާނުގައި ދަރުފަޅައިގެން އެ މަންމަ ކާތަކެތި ރޯފިލުވާ ދިނެވެ. ވަޅުން ފެންނަގައިގެން ފެންވަރުވާ އަތުން އަންނައުނު ދޮވެ ހެދުމަށް އުފުލި ބުރައެވެ. ކަރަންޓު ފަންކާގެ ފިނިކަން ނެތް އިރު އެ މަންމަ އެ ކުދިންނަށް ވިހެދޭން ނުނިދާ އިން ރޭ ތައް ވެސް މާޒީ ވެއްޖެއެވެ. އަނގައިން ނާނާ ކިޔައި ވާހަކަ ކިޔައި ދީގެން އެ ކުދިން ނިންދެވިއެވެ. ބޮޑުވެ ތަސައްރަފު ފުދުނުއިރު ވެސް ބައެއް ކުދިންނަށް ބަތްތަށި މޮޑެދިންކަން އެ މަންމަގެ ހަނދާނުގައި މިއަދު ވެސް އެބަހުއްޓެވެ. އެކަމަކު ބައެއް ކުދިންގެ ހަނދާނުން މިއަދު ވަނީ އެކަން ފޮހެވިފައެވެ. ޑައިޕާއާއި ޒަމާނީ ވަސީލަތް ނެތް އިރު އަބަދު ތާހިރު ކުރިއެވެ. ފުޅި ކާނާ ނެތް އިރު ވަނުން ބިންބި ކަނޑައިގެން ކައްކައިގެން ކާންދިން ހަނދާން އެ މަންމަގެ ލޯމަތީގައި މިއަދު ވެސް ކަޅާ ހުދުގެ ފިލްމެއް ހެން ތަސްވީރުވަމުން ދެއެވެ. ކުރީގެ ހަނދާނުން ތަންތަންކޮޅު އެ މަންމަ މިއަދު ވެސް އާކުރެއެވެ.
އެ މަންމަ އާއި ބައްޕަ މިއަދު އެނދުގައި އޮތީ އަލަފަތަކުން އުފެދުނު ލޯބީގައި އުމުރުގެ ފަހު ދުވަސްތައް ގުނާލަ ގުނާލައެވެ. އެ ގޮތަށް އެނދުމަތި ކޮށްފައި އޮތް އިރު އެ ދެމަފިރިން އެދެނީ ދަރިންގެ އޯގާތެރިކަމާއި ލޯބި ހައްދެއްނެތި ލިބުމެވެ. އަބަދު ފިރުމައިލަ ދިނުމެވެ. އަބަދު ފެނުމެވެ. މައިފުނަ ގޭގައި އެއް އާއިލާއެއްގެ ގޮތުގައި އުޅުނުހެންނެވެ. އަލަފަތުގެ ހިޔާފަދަ ލޯބިވެރި ލޯތްބަކަށެވެ. ނަމަވެސް އެއީ މާޒީއެވެ. އެ ދުވަސް ހިނގައްޖެއެވެ.
ނިމުނީ.
ނޯޓް : މީ ދިވެހިރާއްޖޭގެ އަޑުން މިރޯދަމަހު ގެެނެސްދޭ ކުރު ވާހަކަ މުބާރަތަށް ހުށައަޅާފައިވާ ވާހަކަތަކުގެ ތެރެއިން ވާހަކައެކެވެ. މި ވާހަކަ ލިޔުނީ ގ. ހުދުރުވާ/ އަޙްމަދު ޝިޔާމުއެވެ. ވާހަކަ ހުށަހަޅާދިނީ މ. ހިޔަމަ/ މާޖިދާ އަބްދުލް ކަރީމްއެވެ. ރޭޑިއޯއިން މި ވާހަކަ ބްރޯޑްކާސްޓްކޮށްފައިވަނީ 01 ރަމަޟާން 1442 އެވެ.