ހިޔާ ފްލެޓް ދޫކޮށްލާ މީހުންނަށް ކުރިއަށް ހުރި މަޝްރޫޢުތަކުން ފްލެޓްދޭން މަޖިލީހުން ފާސްކޮށްފި
ހިޔާ ފްލެޓް ދޫކޮށްލާ މީހުންނަށް ކުރިއަށް ހުރި މަޝްރޫޢުތަކުން ފްލެޓް ލިބޭނެކަމުގެ ޔަޤީންކަން ދިނުމަށް ރައްޔިތުންގެ މަޖިލީހުން ފާސްކޮށްފިއެވެ.
މަޖިލީހުން ފާސްކޮށްފައިވަނީ ހިޔާ މަޝްރޫޢުގެ ދަށުން ފްލެޓް ލިބިފައިވާ މީހުންގެ ތެރެއިން ފްލެޓްދޫކޮށްލުމަށް އެދޭ ފަރާތްތަަކަށް، ކުރިއަށް އޮތްތަނުގައި ސަރުކާރުން ދޫކުރުމަށް ނިންމާފައިވާ ގެދޮރުވެރިކުރުމުގެ މަޝްރޫޢުތަކުގެ ތެރެއިން އެކަށޭނެ ފްލެޓް ލިބޭނެކަމުގެ ޔަޤީންކަން ދިނުމަށް ސަރުކާރަށް ހުށައެޅުމަށެވެ.
މަޖިލީހުން މިގޮތަށް ފާސްވީ ވޯޓްގައި ބައިވެރިވެވަޑައިގެންނެވި 33 މެންބަރުންގެ އަޣްލަބިއްޔަތުންނެވެ.
ޤައުމީ ތަރައްޤީއާއި ތަރިކައިގެ ކޮމިޓީން ދިރާސާކޮށް މަޖިލީހުގެ ތަޅުމުން މިއަދު ފާސްކުރި ރިޕޯޓްގައި ވަނީ ހިޔާ މަޝްރޫޢުއަކީ އިޖްތިމާޢީ ބޯހިޔާވަހިކަމަށް އަމާޒުކޮށްފައިވާ މަޝްރޫޢުއަކަށްވެފައި، އެ މަޝްރޫޢުގެ ދަށުން ފްލެޓް ލިބޭ މީހުންނަކީ އިޖްތިމާޢީ ބޯހިޔާވަހިކަމުގެ ދަށުން ފްލެޓް ލިބޭ މީހުންކަން ކަށަވަރުކުރުންކަމަށް ކޮމިޓީއަށް ފެންނަކަމަށެވެ.
އެމަޝްރޫޢުގެ ދަށުން ހިމެނިފައިވާ ނަރުހުންނާއި ޑޮކްޓަރުންނަށް ޚާއްޞަ ކެޓަގަރީން ފެލްޓޭ ލިބުމަށް ޝަރުތު ހަމަވެ ފެލެޓް ލިބޭނެކަމަށް މިހާރު ސަރުކާރުން ކަނޑައަޅާފައިވާގޮތަށް މަޝްވަރާކުރުމަށްފަހު މިހާރު ލިބިފައިވާ ފްލެޓް ދޫކޮށްލުމަށް އެދޭ ފަރާތްތަަކަށް ކުރިއަށް އޮތްތަނުގައި ސަރުކާރުން ދޫކުރުމަށް ނިންމާފައިވާ އެކިއެކި ގިންތިތަކުގެ ގެދޮރުވެރިކުރުމުގެ މަޝްރޫޢުތަކުގެ ތެރެއިން އެފަރާތްތަކަށް ލިބޭ އާމްދަނީއާއި ދިރިއުޅުމުގެ ޙާލަތަށް އެންމެ އެކަށޭނެ ގިންތިއަކުން ފެލެޓް ނުވަތަ ހައުސިން ލިބޭނެކަމުގެ ޔަޤީންކަން ދިނުމަށްވެސް މަޖިލީހުން ފާސްކުރި ރިޕޯޓްގައިވެއެވެ.
މީގެ އިތުރުން މަޖިލީހުން ފާސްކުރި ރިޕޯޓްގައި ވަނީ ސުނާމީ ކާރިސާއަށް 16 އަހަރުވެފައިވާއިރު، އެ ކާރިސާގައި ގެއްލުންވި ހުރިހާ ފަރާތްތަކަކަށް ދިމާވެފައިވާ ބޯހިޔާވަހިކަމުގެ މައްސަލަތައް މިހާތަނަށް އާއިރުވެސް ޙައްލުވެ ނިމިފައިނުވާކަމަށާއި، އެކަމަކީ ކޮމިޓީން ނުހަނު ކަންބޮޑުވާކަމެއްކަަމަށެވެ. އެހެންކަމުން އެ މައްސަލަ 2023 ވަނަ އަހަރުގެ ނިޔަލަށް ޙައްލުކޮށް ދިނުމަށް ސަރުކާރަށް ހުށައެޅުމަށް ރިޕޯޓްގައިވެއެވެ. އަދި ސަރުކާރުގެ އެއްފަސްކުރުމުގެ ސިޔާސަތުގެ ދަށުން، އެއް ރަށުން އަނެއް ރަށަށް ބަދަލުކޮށްފައިވާ ޢާއިލާތަކަށް ކުރިމަތިވެފައިވާ ބޯހިޔާވަހިކަމުގެ މައްސަލަތައްވެސް 2023 ވަނަ އަހަރުގެ ނިޔަލަށް ޙައްލުކޮށްދިނުމަށްް ހުށައެޅުމަށް ރިޕޯޓްގައި ހިމަނާފައިވެއެވެ.
މި ރިޕޯޓްގައި ދިވެހިރާއްޖޭގެ އެކި ހިސާބުތަކުގައި ބޯހިޔާވަހިކަމަށް ބޭނުންޖެހިފައިވާ މިންވަރު ދެނެގަތުމުގެ މަސައްކަތް 2023 ވަނަ އަހަރުގެ ނިޔަލަށް ނިންމުމަށާއި، ބޯހިޔާވަހިކަމުގެ އެއްބަސްވުންތަކުގެ ދަށުން ކުރިއަށް ގެންދާ މަޝްރޫޢުތައް އަވަހަށް ނިންމޭނެފަދަ ނިޒާމެއް ޤާއިމުކުރުމަށް ސަރުކާރަށް ދެންނެވުމަށްވެސް ހިމަނާފައިވެއެވެ އެގޮތުން، އެ މަޝްރޫޢުތައް ކުރިއަށްދާ މިންވަރު ގަވާއިދުން މޮނިޓަރކުރަމުން ގެންދިއުމަށާއި، އެ މަސައްކަތްތައް 2023 ވަނަ އަހަރުގެ ނިޔަލަށް ނިންމުމަށް ވަނީ ކަނޑައަޅާފައެވެ.
މީގެ އިތުރުން މާލެ އޮތް ޙާލަތަށް ބޮޑެތި ބަދަލުތަކެއް އައިސްފައިވާކަމަށާއި، ދަފްތަރާ ގުޅޭ ޒަމާނީ ޤާނޫނީ އޮނިގަނޑެއް ތައްޔާރުކުރަން ޖެހޭކަމަށް ފެންނަކަމަށްވެސް ރިޕޯޓްގައިވެއެވެ. އެރިޕޯޓުގައި ބުނެފައިވަނީ ދަފްތަރު ތަޢާރަފުކުރިއިރު ދިވެހިރާއްޖެ އަދި ޚާއްސަކޮށް މާލޭގެ ޙާލަތު އޮތްގޮތަށް މިހާރު ބޮޑެތިި ބަދަލުތަކެއް އައިސްފައިވާތީ، ދަފްތަރާ ގުޅޭ ހަރުދަނާ ޤާނޫނީ އޮނިގަނޑެއް ބޭނުންވެފައިވާކަމަށެވެ. އެގޮތުން ޒަމާނާ އެއްގޮތަށް އާ ޤާނޫނީ އޮނިގަނޑެއް ތައްޔާރުކުރަށް ފެންނަކަމަށާ، އެފަދަ ނިޒާމެއް ޤާއިމުކުރުމުގެ މަސައްކަތް ސިޓީ ކައުންސިލުން ކުރިއަށްގެންދިއުމަށް މަޖިލީހުން ފާސްކުރި ހުށައެޅުމުގައިވެއެވެ.