ރެސްޓޯރެންޓްތަކާއި ކެފޭތަކުން އުކާލާ ޕްލާސްޓިކް ފުޅި ރިސައިކަލް ކުރުމުގެ ބޮޑު ޕްރޮޖެކްޓެއް މޯލްޑިވްސް އޯޝަން ޕްލާސްޓިކް އެލަޔަންސް(މޯޕާ)އިން ފަށައިފިއެވެ. މި ޕްރޮޖެކްޓްގައި ރެސްޓޯރަންޓުތަކުން އުކާލާ ޕްލާސްޓިކް ފުޅި، އެތަކެތި ސަޕްލައި ކުރާ ކުންފުނިތަކުން އަނބުރާ ނެގުމަށްފަހު، ޕަރލޭ މެދުވެރިކޮށް ރިސައިކަލް ކުރާގޮތަށް ވަނީ ހަމަޖެހިފައެވެ.
މޯޕާއިން ފެށި ޕްލާސްޓިކް ފުޅި ރިސައިކަލް ކުރުމުގެ މިމަޝްރޫޢުގެ މަޤުސަދަކީ އެއްފަހަރު ބޭނުންކޮށްފަ އުކާލާ ކުނިން ތިމާވެއްޓަށް ލިބޭ ގެއްލުން ކުޑަކުރުމެވެ. "ޕްލާސްޓިކް ރިވަރސް ލޮޖިސްޓިކް ޕްރޮޖެކްޓް" އިފްތިތާޙުކޮށްދެއްވީ މިނިސްޓަރ އޮފް އެންވަޔަރަންމަންޓް ޑރ.ހުސައިން ރަޝީދު ހަސަންއެވެ.
މިމަޝްރޫޢު އިފްތިތާޙުކޮށްދެއްވައި ވާހަކަފުޅު ދައްކަވަމުން މިނިސްޓަރ ވިދާޅުވީ ތިމާވެށީގެ ގޮތުން ރާއްޖެއަށް މިހާރު ކުރިމަތިވެފައިވާ އެންމެ ބޮޑު ނުރައްކަލަކީ ޕްލާސްޓިކްކަމަށެވެ. މީގެތެރެއިންވެސް އެއް ފަހަރު ބޭނުންކޮށްފައި އުކާލާ ކުނީގެ މައްސަލަ ނިސްބަތުން ރާއްޖޭގައި ވަރަށް ބޮޑުކަން ފާހަގަކުރައްވަމުން، ތިމާވެށި ރައްކާތެރިކުރުމަށް ކުރާ މަސައްކަތުގައި ސަރުކާރުން މިހާރު އެންމެ އިސްކަންދެނީ އެއްފަހަރު ބޭނުންކޮށްފައި އުކާލާ ކުނި ވީހާވެސް މަދުކުރުމަށްކަމަށް މިނިސްޓަރ ވިދާޅުވިއެވެ.
ރާއްޖޭގެ މުޅި އިޤްތިޞާދު ރާއްޖޭގެ ގުދުރަތީ ރީތިކަމަށް ބަރޯސާވެފައިވާއިރު، ޕްލާސްޓިކް ބޭނުންކުރާ މިންވަރު މަދުކުރުމަކީ ކޮންމެހެން ކުރަންޖެހިފައިވާ ކަމެއްކަމަށްވެސް މިނިސްޓަރ ވިދާޅުވިއެވެ.
"ޕްލާސްޓިކާ ދެކޮޅަށް ހަނގުރާމައެއް ކުރަންޖެހިފައި މިއޮތީ. ޕްލާސްޓިކާ ނުލާ ނޫޅެވޭގޮތަށް މިހާރު ދިރިއުޅުން ބައްޓަންވެފައި މިއޮތީ. މިކަން ބަދަލުކުރަންޖެހޭ." މިނިސްޓަރ ވިދާޅުވިއެވެ.
މޯޕާގެ ރައީސް ތޯރިޤް އިބްރާޙިމް ވިދާޅުވީ މިމަޝްރޫޢު އަދި ފަށާފައިވަނީ މާލޭގައި ނަމަވެސް، ވަރަށް އަވަހަށް ވިލިމާލެއާ ހުޅުމާލޭގައިވެސް ފަށާނެކަމަށެވެ. ތޯރިޤް ވިދާޅުވި ރާއްޖޭގައި އުފައްދާ ކުނީގެ 12އިންސައްތައަކީ ޕްލާސްޓިކަށްވާއިރު، މި ފަށާ މަސައްކަތަކީ ޕްލާސްޓިކާ ދެކޮޅަށްކުރާ މަސައްކަތަށް ވިޔަފާރިތައް ހޭލުންތެރިކުރަން ކުރެވޭ މުހިންމު މަސައްކަތެއްކަމަށެވެ. މިހާތަނަށް މި ޕްރޮގްރާމްގައި ކޭފޭ ރެސްޓޯރަންޓް ހިމެނޭހެން 120 ތަނަކުންވަނީ ބައިވެރިވެފައެވެ.
"45ދުވަސްމިވީ މަސައްކަތް ކުރިއަށްދާތާ. މި މުއްދަތުގައި 4 ޓަނުގެ ފުޅި ޕަރލޭއާ ހަވާލުކޮށްފިން. ކުރިއަށްއޮތްތާނގައި އިތުރަށް ފުޅާކުރާނަން." ތާރިޤް އިބްރާޙިމް ވިދާޅުވިއެވެ.
މި ޕްރޮޖެކްޓްގައި ޕްލާސްޓިކް ފުޅީގައި ބަންދުކޮށް ޕްރޮޑަކްޓްތައް ވިއްކާ ހެޕީ މާކެޓް(ލައިފް ފެން)، މާލޭ އެރޭޓެޑް ވޯޓަރ ކޮމްޕެނީ (ކޯކު ފުޅި)، އައިލެންޑް ބެވަރޭޖަސް މޯލްޑިވްސް(ތާޒާ)އިންވަނީ ބައިވެރިވެފައެވެ.
ރާއްޖޭގައި އަހަރަކު 3300ޓަނުގެ ފުޅި ބޭނުންކޮށް އުކާލައެވެ. އެއީ 163މިލިއަން ފުޅިއެވެ.