ޤަވާއިދާއި ޚިލާފަށް އުޅޭ ބިދޭސީން ފޮނުވާލުމަށް، މޯލްޑިވިއަންއިން ބަންގްލަދޭޝްއަށް 50 ދަތުރުކޮށްފިއެވެ.
ބިދޭސީން މީހުން ފޮނުވާލުމަށް މޯލްޑިވިއަންއިން ބޭއްވި 50 ވަނަ ފްލައިޓް ބަންގްލަދޭޝްގެ ޑާކައަށް ދަތުރުކޮށްފައި ވަނީ މިއަދުއެވެ.
ދިވެހިރާއްޖޭގައި ޤަވާއިދާ ޚިލާފައި އުޅޭ ބިދޭސީންނާއި، އަނބުރާ ޤާއުމަށް ދާން ބޭނުންވާ ބިދޭސީން ފޮނުވާލުމުގެ ޕްރޮގްރާމަކީ މިނިސްޓްރީ އޮފް އިކޮނޮމިކް ޑިވެލޮޕްމަންޓުން އިސްކަމެއް ދީގެން ފަށާފައިވާ މަސައްކަތެކެވެ.
ރާއްޖޭގައި ޤަވާއިދާ ޚިލާފަށް އެންމެ ގިނައިން އުޅެނީ ބަންގްލަދޭޝްގެ ރައްޔިތުންނެވެ. މޯލްޑިވިއަންގެ އެންމެ ފަހުން ބޭއްވި ފްލައިޓުގައި ބަންގްލަދޭޝްގެ 200 ރައްޔިތުން ފޮނުވާލިއެވެ. މޯލްޑިވިއަންއިން ޑާކާއަށް މީހުން ފުރުވާލި 50 ވަނަ ފްލައިޓާއިއެކު މި މަސައްކަތުގެ ދަށުން މިހާތަނަށް ގަވާއިދާ ޚިލާފައިއުޅޭ 9633 ބަންގްލަދޭޝްގެ ރައްޔިތުން ވަނީ މޯލްޑިވިއަންގެ ފްލައިޓުތަކުގައި އަނބުރާ ޤައުމަށް ފޮނުވާލެވިފައެވެ.
Our 50th #repatriation flight with 200 Bangladeshi nationals has left to Dhaka from @VelanaAirport.
— Maldivian (@MaldivianAero) December 31, 2020
As of today, #Maldivian has flown a total of 9633 Bangladeshi passengers on these repatriation flights.#NationalAirline pic.twitter.com/S0J4yU14xv
ސަރުކާރުން 2020 ވަނަ އަހަރަށް ޢަމާޒުހިފީ ޤަވައިދާ ޚިލާފައި އުޅޭ 20000ބިދޭސީން ޤައުމަށް ފޮނުވާލުމަށެވެ. ނަމަވެސް ކޯވިޑް 19ގެ ޙާލާތާއި ގުޅިގެން މި ޢަމާޒަށް ވާސިލު ނުވެވުނުނަމަވެސް، ފޮނުވާލި މީހުންގެ އަދަދު 10000އާ ގާތްކުރެއެވެ.
ޤަވާއިދާ ޚިލާފަށް އުޅޭ ބިދޭސީންގެ އިތުރަށް، އަމިއްލައަށް އެދިގެން ޤައުމަށް ދާން ބޭނުންވާ މީހުން ފޮނުވާލުމުގެ މަސައްކަތްވެސް ވަނީ ފަށާފައެވެ. މީގެކުރިން ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން އިކޮނޮމިކް މިނިސްޓަރ ފައްޔާޟް އިސްމާއިލް ވިދާޅުވީ ސައްޙަ ލިޔެކިޔުން އޮތް މީހުންގެ ތެރެއިންވެސް އަނބުރާ ޤައުމަށް ދާން ބޭނުންވާ 8000 އަށްވުރެ ގިނަ މީހުން ފޮނުވާލާފައިވާކަމަށެވެ.
ބިދޭސީން ފޮނުވާލުވުމުގެ މަސައްކަތް ކުރަނީ އެމީހުން ނިސްބަތްވާ ޤައުމުތަކާއި ގުޅިގެންނެވެ. ކޯވިޑް 19އާ ގުޅިގެން މި މަސައްކަތް ވަނީ އިތުރަށް ހަރުދަނާކޮށްފައެވެ. ޤަވައިދާ ޚިލާފަށް އުޅޭ ބިދޭސީންނާއި، އަނބުރާ ޤައުމަށް ދާން ބޭނުންވި ބިދޭސީންގެ ތެރޭގައި ބަންގްލަދޭޝް، އިންޑިއާ، ލަންކާ، ނޭޕާލް، ޕިލިޕީންސް ތައިލޭންޑް އަދި އިންޑޮނޭޝިޔާގެ މީހުން ހިމެނެއެވެ.
ޤަވާއިދާ ޚިލާފަށް އުޅޭ މީހުންނާއި، އަދި އަމިއްލައަށް އެދިގެން ޤައުމަށް ދާން ބޭނުންވި މީހުންނާއިއެކު ގާތްގަނޑަކަށް 20000އާ ގާތްކުރާ އަދަދަކަށް މީހުން ވަނީ ފޮނުވާލާފައެވެ.
އިކޮނޮމިކް މިނިސްޓްރީން ލަފާކުރާގޮތުގައި ރާއްޖޭގައި އެކި މަސައްކަތްތަކުގައި 130000އަށްވުރެ ގިނަ ބިދޭސީން އުޅެއެވެ. މީގެތެރެއިން 60 ހާހަށްވުރެ ގިނަ މީހުންނަކީ ލިޔެކިޔުންތައް ހަމަނުކޮށް، ޤަވާއިދާ ޚިލާފަށް އުޅެމުން އަންނަ މީހުންނެވެ.