ނޭޝަނަލް މާރޝަލް އާރޓްސް ސެންޓަރާއި ހުޅުމާލެ ޓީ.ޓީ. ހޯލް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙް ހުޅުއްވައިދެއްވައިފިއެވެ. ހުޅުމާލެ މިނީ ސްޕޯޓްސް ކޮމްޕެކްސްގައި ހިމެނޭ މާރޝަލް އާރޓްސް ސެންޓަރާއި ޓީ.ޓީ. ހޯލް ރައީސް ހުޅުއްވައިދެއްވީ މިއަދު ހަވީރު ބޭއްވި ރަސްމިއްޔާތެއްގައެވެ.
ރައީސުލްޖުމްހޫރިއްޔާ މިއަދު ހުޅުއްވައިދެއްވި ހުޅުމާލެ ޓީޓީ ހޯލުގައި އެސޯސިއޭޝަންގެ ޕްރޮގާރާމް ތަކާއި މުބާރާތްތައް ކުރިޔަންގެންދިއުމަށް ރާވާފައިވާއިރު، ބައެއް ކޯޗިންކޯސްހާއި ޓްރެއިނިންގ ޕްރޮގްރާމްތައް ކުރިޔަށް ގެންދިއުމަށްވެސް ނިންމާފައިވެއެވެ.
ރައީސް މިއަދު ހުޅުއްވައިދެއްވި މާރޝަލް އާރޓް ހޯލުގައި މާޝަލް އާޓްގެ ފަރިތަކުރުންތަކާއި، އެކި އުމުރު ފުރާގެ ކުދިންނަށް މާޝަލް އާޓްގެ ހުނަރު ތައް ދަސް ކޮށްދިނުމުގެ ޕްރޮގްރާމްތައް މިހާރުވެސް ކުރިޔަށް ގެންދެއެވެ. އަދި މިހޯލް މިނިސްޓްރީ އޮފް ޔޫތު ސްޕޯޓްސް އެންޑް ކޮމިއުނިޓީ އެމްޕަވަރމަންޓްގެ ބެލުމުގެ ދަށުން މާޝަލް އާރޓްސްގެ ހުނަރު ދަސްކޮށްދޭ ހުރިހާ ޖަމިއްޔާތަކަށް ވަކި ޝެޑިއުލްގެ ދަށުން ދޫކުރުމަށް ހަމަޖެހިފައިވާކަމަށް ޔޫތު މިނިސްޓްރީން ވިދާޅުވެއެވެ. މާރޝަލް ޢާރޓް ސެންޓަރުގައި މިހާރުވެސް އެކި އުމުރު ފުރާގެ 254 ކުދިން ބޭރުގެ ކޯޗުންގެ އިރުޝާދާއެކު ދަނީ ތަމްރީން ކުރަމުންނެވެ.
ހުޅުމާލޭގައި ޤާއިމްކޮށްފައިވާ ހުޅުމާލެ މިނީ ސްޕޯޓްސް ކޮންޕްލެކްސް އަކީ ޒުވާނުންނާއި ނެޝަލް ޤައުމީ ކުޅިވަރު އެސޯސިއޭޝަންގެ ޤައުމީ ޓީމް ތަކުގެ ފަރިތަކުރުންތަކަށާއި، ޢާއްމުންނަށް ހުޅުވާލެވިގެން ބައެއް ކުޅިވަރު ކުލެވޭގޮތަށް ޤާއިމްކޮށްފައިވާ ސްޕޯޓްސް މިނީ ހައުސް އެކެވެ. އެތަނުގައި ކުޅޭ ކުޅިވަރު ތެރޭގައި ޕޫލް ބިލިޔާޑް، ސްވިމިން ޕޫލް، ޗެސް، އަދި ޓީޓީ ހޯލް ، ބައުލިންގ އިތުރުން މާރޝަލް ޢާރޓްގެ އެކިކުޅިވަރު ދަސްކުރުމުގެ ޕްރޮގަރާމްތައް ހިމެނެވެ.