ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، ހައްދުންމައްޗަށް ވަޑައިގެންފިއެވެ. އެމަނިކުފާނުގެ މިދަތުރުފުޅަކީ ލ.ގަމުގައި ސަރުކާރުން ކުރިއަށގެންދިޔަ 3 މަޝްރޫޢުއެއްގެ ނިމުން ފާހަގަކުރެއްވުމަށް ކުރައްވާ ދަތުރުފުޅެކެވެ. އޭގެތެރޭގައި ހިމެނެނީ ގަމު ރީޖަނަލް ހޮސްޕިޓަކުގައި ސީޓީ ސްކޭންގެ ޚިދުމަތް ފެށްޓެވުމާއި ސެންޓަރަލް ޕަވަރ ހައުސް ހުޅުއްވައިދެއްވުމާއި ގަމު ޒީން ސްޓޭޑިއަމް ހުޅުއްވައިދެއްވުމެވެ.
މި 3 ޚިދުމަތް ރަސްމީކޮށް ފަށްޓަވައިދެއްވާނީ މިއަދު ހަވީރު ގަމު ޒޯން ސްޓޭޑިއަމްގައި ބާއްވާ ޚާއްޞަ ރަސްމިއްޔާތެއްގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްއެވެ. އެޚިދުމަތްތައް ފަށްޓަވައިދެއްވުމުގެ ކުރިން ރައީސުލްޖުމްހޫރިއްޔާ ކައްދޫ އެމްއެންޑީއެފް ސެންޓްރަލް ކޮމާންޑުގައި ކުރިއަށްދާ ސިފައިންގެ ޓްރެއިނިންގ ބައްލަވާލައްވާނެއެވެ.
ލ.ގަމައު މިއަދު ރަސްމީކޮށް ރައީސް ހުޅުއްވައިދެއްވައި ސެންޓްރަލް ޕަވަރ ހައުސްއަކީ ލ.ގަމުގެ 3 އަވަށުގައި ވަކިވަކިން ބޭނުންކުރަމުންއައި އިންޖީނުގެތަށް އެއްކޮށްލައި ޤާއިމްކޮށްފައިވާ ސެންޓްރަލް ޕަވަރހައުސް ނުވަތަ ސަރަޙައްދީ އިންޖީނުގެއެވެ. މިއީ އެއް ވިއުގައަކުން ކަރަންޓު ގުޅުވާލުމަށް ކުރިއަށްގެންދިޔަ މަޝްރޫޢެކެވެ.
ލ.ގަމުގެ ކަރަންޓު ވިއުގަ ގުޅާލުމުގެ މަސައްކަތް ފަށާފައިވަނީ މިދިޔަ އަހަރުގެ ޖުލައިމަހުއެވެ. އެރަށަށް ކަރަންޓު ފޯރުކޮށްދޭ ފެނަކަ ކޯޕަރޭޝަނުން ވިދާޅުވީ އެއް ވިއުގައަކުން ގުޅާލާފައިވަނީ މުކުރިމަގު، މަތިމަރަދޫ، ތުނޑީ އަވަށުގައި ވަކިވަކިން ހިންގަމުންއައި އިންޖީނުގެތަކާއި، އިދާރީ މަސައްކަތްކުރާ އޮފީސްތަށްކަމަށެވެ.
ތިން އަވަށުގައި ވަކިން ހިންގަމުންއައި އިދާރީ އޮފީސްތައް، އާ އިމާރާތަކަށް ބަދަލުކޮށް މިހާރު ޚިދުމަތްދެނީ އެއް ފުރާޅެއްގެ ދަށުންނެވެ. ލ.ގަމަކީ އާބާދީގައި ފަސްހާހެއްހައި މީހުން ދިރިއުޅެމުން އަންނަ ރަށެކެވެ.
މިއަދު ރައީސް އިފްތިތާހުކޮށްދެއްވި ސީޓީ ސްކޭންގެ ޚިދުމަތަކީ އެސަރަޙައްދުގައިވެސް އަލަށް ފަށާ ޚިދުމަތެކެވެ. ސީޓީ ސްކޭންއަކީ އާއްމުކޮށް ކުރާ ކުދި ޓެސްޓްތަކާއި ޚިލާފަށް، ހަށިގަނޑުގެ ބޮޑެތި ޓެސްޓުތައް ހެދޭ ޚިދުމަތެކެވެ. އެގޮތުން ލޭނާރުތަކާއި ކައްޓާއި އަދި އެހެނިހެން ގުނަވަންތަކުގެ ޒަމާނީ ތަޙުލީލުތައް ކުރެވޭ ޚިދުމަތެކެވެ.
ގަމު ރީޖަނަލް ހޮސްޕިޓަލުގެ މެނޭޖަރ ޢަލީ ނަޝީދު ވިދާޅުވީ ސީޓީ ސްކޭންގެ ޚިދުމަތް ދިނުމުގެ މަސައްކަތުގައި ހަރަކާތްތެރިވާނީ ހޮސްޕިޓަލުގައި މިހާރުވެސް މަސައްކަތްކުރާ މުވައްޒަފުންކަމަށެވެ.
މީގެ އިތުރުން މިއަދު ރަސްމީކޮށް ރައީސް ހުޅުއްވައިދެއްވާ ގަމު ޒޯން ސްޓޭޑިއަމަކީ ރާއްޖޭގެ އަތޮޅުތަކުގައި ޤާއިމްކުރުވުނު މިފަދަ 4ވަނަ ސްޓޭޑިއަމެވެ. އައްޑޫ، ކުޅުދުއްފުށި އަދި ތިނަދޫގެ އިތުރުން ގަމުގައި ޤާއިމްކުރެވުނު ޒޯން ސްޓޭޑިއަމްއާއެކު މިސަރަހައްދުގައި ބާއްވާ ކުޅިވަރުގެ ގިނަ ޙަރަކާތްތައް އެ ސްޓޭޭޑިއަމްގައި ބޭއްވޭނެކަމަށް ގަމު ކައުންސިލުން ވިދާޅުވެއެވެ. 7 މިލިއަށްވުރެ ގިނަ ރުފިޔާ ޚަރަދުކޮށްގެން ޤާއިމްކުރި މިސްޓޭޑިއަމުގައި އެންމެ ޒަމާނީ ފެންވަރުގެ ދަނޑެއް ވަނީ ތަރައްޤީކޮށްފައެވެ.