ރާއްޖޭގެ އެންމެ އުތުރުން ހއ.ހޯރަފުށީގައި ތަރައްޤީކުރި އެއަރޕޯޓް ހުޅުވުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް މިއަދު މެންދުރު އެރަށަށް ވަޑައިގަންނަވާނެއެވެ.
މިމަހުގެ 17 ވަނަ ދުވަހު ހުޅުވުމަށް ކުރިން ހަމަޖެހިފައި އޮތް އެއަރޕޯޓް ހުޅުވުން ފަސްކޮށްފައިވަނީ މޫސުން ގޯސްވުމުގެ ސަބަބުންނެވެ. ހޯރަފުށީ އެއަރޕޯޓް ހުޅުވުމަށް ރައީސުލްޖުމްހޫރިއްޔާ ހޯރަފުއްޓަށް ވަޑައިގަތުމަށް ހަމަޖެހިފައިވަނީ މިއަދު މެންދުރު 13:00 ގައެވެ.
ހޯރަފުށި އެއަރޕޯޓް ހުޅުވުމަށް މުޅި ރަށްވަނީ ޒީނަތްތެރިކޮށްފައެވެ. އަދި އެ އެއަރޕޯޓް ހުޅުވުމުގެ ރަސްމިއްޔާތުގައި ބައިވެރިވުމަށް އުތުރުގެ އެކި ރަށްރަށުން މީހުން މިހާރުވެސް ދަނީ ހޯރަފުއްޓަށް ޒިޔާރަތްކުރަމުންނެވެ. ހޯރަފުށީ އެއަރޕޯޓްވެގެން ގޮސްފައިވަނީ، އެންމެ ކުރުމުއްދަތެއްގެ ތެރޭގައި ބިން ހިއްކައިގެން އެއަރޕޯޓް އަޅާ ޓެސްޓް ފްލައިޓް ޖެއްސި އެއަރޕޯޓަށެވެ. ހއ. ހޯރަފުށީ އެއަރޕޯޓްގެ ބިން ހިއްކުމުގެ މަސައްކަތް މުޅިން ނިންމާލާފައިވަނީ ދޮޅުއަހަރުދުވަހުގެ ތެރޭގައެވެ.
198 މިލިއަން ރުފިޔާ ޚަރަދުކޮށްގެން ހއ.ހޯރަފުށީގައި އެއަރޕޯޓެއް ތަރައްޤީކޮށްފައިވާއިރު މި އެއަރޕޯޓްގައި 1200 މީޓަރު ދިގު، 35 މީޓަރު ފުޅާ ރަންވޭއެއް އޮވެއެވެ. އަދި 8635 ސްކުއަރ މީޓަރުގެ އޭޕްރަން އަކާއި ޓެކްސީ ވޭއެއްގެ އިތުރުން ސާވިސް މަގުތަކާއި، 9473 ސްކުއަރ މީޓަރުގެ ޕާކިން އޭރިއާއަކާއި 1718 ސްކުއަރ މީޓަރުގެ ފަޔާ އެކްސެސް މަގެއްވެސް މި މަޝްރޫޢުގެ ދަށުން ވަނީ ތަރައްޤީކޮށްފައެވެ.