ވ ތިނަދޫން ދެ މީހަކު ކޯވިޑް-19އަށް ޕޮޒިޓިވްވެއްޖެއެވެ.
ހެލްތު އެމާޖެންސީ އޮޕަރޭޝަން ސެންޓަރުން ވިދާޅުވީ، މިއަދު ކޯވިޑް-19އަށް ވ ތިނަދޫން ޕޮޒިޓިވްވެފައި ވަނީ ދެ ދިވެހިންކަމަށެވެ. މިގޮތުން އެރަށުން ޕޮޒިޓިވްވެފައި ވަނީ އުމުރުން، 36 އަހަރުގެ އަންހެނަކާއި ފިރިހެނެއް ކަމުގައި އެޗްއީއޯސީން ވިދާޅުވެފައި ވެއެވެ.
ވ ތިނަދޫއިން ޕޮޒިޓިވްވި ދެމީހުންނަކީ، ފުރަބަންދުގެ ކަރަންޓީނުގެ މުއްދަތު ހަމަވެގެން ކަރަންޓީނުން ދޫކޮށްލުމަށް ޓެސްޓު ކުރި ދެމީހުންނެވެ.
ހެލްތު ޕްރޮޓެކްޝަން އޭޖެންސީ އެޗްޕީއޭއިން ހާމަކުރައްވާފައިވާ ގޮތުގައި، ރާއްޖޭގެ އަތޮޅުތަކުގެ 18 ރަށެއްގަޔާއި، 13 ރިޒޯޓެއްގައި ކޯވިޑް-19އަށް ޕޮޒިޓިވްވެފައިވާ މީހުން އެބަތިއްބެވެ.
ރާއްޖެއިން ކޯވިޑް-19އަށް ޕޮޒިޓިވްވެފައިވާ މީހުންގެ އަދަދު މިހާރު ވަނީ 6000އަށް ވުރެ މައްޗަށް އަރާފައެވެ. އިއްޔެ އެކަނިވެސް 170 މީހުން ޕޮޒިޓިވްވެފައި ވެއެވެ.