ކޯވިޑް19އާ ގުޅިގެން ދިމާވެފައިވާ ޙާލަތުގައި މާލޭގެ ގޭގައި ކުށްޔަށް ދިރިއުޅޭ މީހުންގެތެރެއިން ކުލި ނުދެއްކޭ މީހުން އެމީހުން ދިރިއުޅޭ ތަންތަނުން ނުނެރުމަށް ސަރުކާރުން ގޭގޭގެ ވެރިންނަށް އިލްތިމާސްކުރައްވައިފިއެވެ.
ނެޝަނަލް އެމެޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން އެސެންޓަރުގެ ތަރުޖަމާން މުޙައްމަދު މަބްރޫކް ޢަޒީޒް ވިދާޅުވީ، މިހާރު ކުރިމަތިވެފައިމިވާ ބަލިމަޑުކަމާގުޅިގެން ލިބޭ އާމްދަނީން ކުލި ނުދެއްކިގެން އެކަމުގެ ޝަކުވާ އެސެންޓަރަށް ލިބެމުންދާކަމަށާއި، ކުލި ނުދެއްކިގެން ގެއިން ނެރެމުންދާކަމުގެ ޝަކުވާވެސް ލިބެމުންދާކަމަށެވެ.
މަބްރޫކް ވިދާޅުވީ ކުލި ނުދެއްކިގެން ގެއިން ނެރެލި ދެމީހަކަށް ސަރުކާރުން ވަގުތީ ބޯހިޔާވަހިކަންދީ ބަލަހައްޓަމުން އަންނަކަމަށާއި އެފަދަ ގިނަ މަޢުލޫމާތުތަކެއް ލިބެމުން އަންނަކަމށެވެ. މި ދަނޑިވަޅަކީ އެންމެންނަށްވެސް ދަތި އުނދަގޫ ދުވަސްތަކެއްކަން ފާހަގަކުރައްވައި މަބްރޫކް ވިދަޅުވީ، މިޙާލަތުން އަރައިގަނެވޭނީ އެންމެން އެކުގައި މަސައްކަތްކޮށްގެންކަމަށެވެ.
ކުއްޔަށް އުޅޭ ފަރާތްތަކަށް ކުލި ލުއިކޮށްދެއްވުމަށް ކުއްޔަށް ދޭފަރާތްތަކުގެ ކިބައި އެދިވަޑައިގަންނަވަމުން މަބްރޫކްވަނީ ކުލި ނުދެއްކިގެން އެތަނަކުން އެބަޔަކު ނުނެރުމަށް އިލްތިމާސްކުރައްވާފައެވެ.
"އެއްވެސް ބޭފުޅަކު ގެއެއް ކުއްޔަށް ދެއްވައިގެން އުޅުއްވާ ބޭފުޅަކު ކުލި ނުދެއްކިގެން މިވަގުތު މީހަކު ގެއިން ބޭރަށް ނުނެރުން އެއީ އަޅުގަނޑުމެންގެ އިލްތިމަސެއް. މަގުމަތި ނުކުރުން އެދެން،" މަބްރޫކް ވިދާޅުވިއެވެ.
މަބްރޫކްވަނީ ޙާލަތުގައި މަގުމަތިވާ މީހުން ޖެންޑާ މިނިސްޓްރީގެ ނަންބަރު 1412އަށް ގުޅައިގެން ސަރުކާރުގެ އެހީތެރިކަން ހޯދުމަށް އެދިވަޑައިގެންފައެވެ. ކޯވިޑް-19އާ ގުޅިގެން ރާއްޖޭގެ އިޤްތިޞާދަށްވެސް ބޮޑު ހީނަރުކަމެއް އައިސްފައިވާއިރު، ސަރުކާރުން ވަނީ މިދަނޑިވަޅުގައި އުނދަގުލުގައި އުޅޭ ފަރާތްތަކަށްވެސް ސްޓިމިއުލަސް ޕެކޭޖްތަކުގެ ތެރެއިން އެހީތެރިކަން ފޯރުކޮށްދޭން ނިންމާފައެވެ.