ލޯކަލް ކައުންސިލް އިންތިޚާބު ފަސްކުރުމަށް ރައްޔިތުންގެ މަޖިލީހަށް ހުށައެޅި ބިލުން، އިންތިޚާބުގައި ވާދަކުރާ ސިވިލް ސާރވިސް މުވައްޒަފުންގެ ސަސްޕެންޝަނަށް ހައްލެއް ލިބިގެންދާނެކަމަށް އިލްކްޝަންސް ކޮމިޝަނުން ވިދާޅުވެއްޖެއެވެ.
މިމަހުގެ 4 ވަނަ ދުވަހު ބާއްވަން ކުރިން އިޢުލާންކުރި ލޯކަލް ކައުންސިލްތަކުގެ އިންތިޚާބު ފަސްކޮށްފައިވަނީ ރާއްޖެއިން ކޯވިޑު-19 ޖެހިފައިވާ މީހަކު ފެނުމާ ގުޅިގެން އެ ބަލިން ރައްކާތެރިވުމަށް އަޅަމުންދާ ފިޔަވަޅުތަކުގެ ދަށުންނެވެ.
ކައުންސިލްތަކުގެ އިންތިޚާބު އަންނަ އަހަރުގެ ޖެނުއަރީ މަހުގެ 6 ވަނަ ދުވަހަށް ފަސްކުރުމަށް، "ކައުންސިލް އިންތިޚާބުގެ ޚާއްޞަ ގާނޫނު"ގެ ނަމުގައި ޤާނޫނެއް އެކުލަވާލުމަށް ބިލެއް މަޖިލީހަށް މިހާރު ވަނީ ހުށައަޅާފައެވެ. ސަރުކާރުގެ ފަރާތުން ހުށައެޅި މި ބިލް މަޖިލީހަށް ހުށައަޅާފައިވާކަން މަޖިލީހުގެ ރައީސް އިއްޔެގެ ޖަލްސާގައި ވަނީ ވިދާޅުވެފައެވެ.
އިލެކްޝަންސް ކޮމިޝަންގެ ރައީސް އަޙްމަދު ޝަރީފް ވިދާޅުވީ، އިންތިޚާބު ފަސްކުރުމަށް މަޖިލީހަށް ހުށައެޅި ބިލާ ގުޅޭގޮތުން މަޖިލީހާއެކު މަޝްވަރާކުރައްވާނެކަމަށެވެ. ކައުންސިލް އިންތިޚާބުގައި ވާދަކުރާ ކެނޑިޑޭޓުންގެ ތެރެއިން ސިވިލް ސާރވިސް މުވައްޒަފުން އިންތިޚާބަށް ވާދަކުރާ ދުވަހުން ފެށިގެން ވަޒީފާއިން ސަސްޕެންޑްވެފައިވާތީ، އެކަމަށްވެސް އަލަށް އެކުލަވާލާ ޤާނޫނުގެ ތެރެއިން ހައްލެއް ލިބިގެންދާނެކަމަށް ޝަރީފް ވިދާޅުވިއެވެ.
ކައުންސިލް އިންތިޚާބު ފަސްކޮށްފައިވުމުން އިންތިޚާބުގެ ކެނޑިޑޭޓުންގެ ތެރެއިން ވަޒީފާތަކުގައި އުޅޭ ފަރާތްތަކުގެ ސަސްޕެންޝަނަށް ހައްލެއް ލިބެންޖެހޭކަމަށް މަޖިލީހުގެ މެންބަރުންވެސް ވަނީ މަޖިލީހުގެ ޖަލްސާގައި ވިދާޅުވެފައެވެ. ސިވިލް ސަރވިސްގައި މަސައްކަތްކުރާ 204 މުވައްޒަފުން އިންތިޚާބުގައި ވާދަކުރާކަމަށާއި، ނަމަވެސް މިވަގުތު އެ މުވައްޒަފުން ސަސްޕެންޝަންގައި ހުރުމުގެ ސަބަބުން އެ އާއިލާތަކަށް ގެއްލުންވާނެކަން މެންބަރުން ވަނީ ފާހަގަކުރައްވާފައެވެ.
އަލަށް އެކުލަވާލާ "ކައުންސިލް އިންތިޚާބުގެ ޚާއްޞަ ގާނޫނާ ގުޅޭ އިތުރު މަޢޫލޫމާތު އަދި މިހާތަނަށް ހާމަކޮށްފައެއް ނުވެއެވެ.