މާލެއާއި ވިލިމާލެއާއި ގުޅިފަޅާއި ތިލަފުށި ގުޅާލުމަށް ހަދާ ބްރިޖުގެ މަސައްކަތް ފެށުމަށް އަންނައަހަރުގެ ބަޖެޓުގައި 411 މިލިއަން ރުފިޔާ ހިމަނާފައިވާކަމަށް ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެއެވެ.
2020ވަނަ އަހަރުގެ ބަޖެޓް ބަޔާން ރައްޔިތުންގެ މަޖިލީހުގައި އިއްވަވަމުން ފިނޭންސް މިނިސްޓަރ ވިދާޅުވީ، ގްރޭޓަރ މާލޭ ސަރަޙައްދު އެއްގަމު ދަތުރުފަތުރުގެ ނިޒާމަކުން ގުޅާލުމަކީ ސަރުކާރުގެ މުހިއްމު އަމާޒެއްކަމަށްވާއިރު، އެކަމަށް ބޭނުންވާ ފައިސާ އަންނަ އަހަރުގެ ބަޖެޓުގައި ހިމަނާފައިވާކަމަށެވެ.
އެގޮތުން މާލެއާއި، ވިލިމާލެއާއި، ގުޅީފަޅު އަދި ތިލަފުށި ގުޅާލުމަށް ބޭނުންވާ ބްރިޖުގެ މަސައްކަތް ފެށުމަށް 2020ވަނަ އަހަރުގެ ބަޖެޓުގައި 411 މިލިއަން ރުފިޔާ ހިމަނާފައިވާކަން މިނިސްޓަރ ފާހަގަކުރެއްވިއެވެ. ފިނޭންސް މިނިސްޓަރ ވިދާޅުވީ، މި މަޝްރޫޢު ކުރިއަށް ގެންދިއުމަށް ކުރަންޖެހޭ ދިރާސާތަކުގެ މަސައްކަތް މިހާރު ކުރަމުންދާކަމަށެވެ.
"މާލެ އާއި ވިލިނގިއްޔާއި ގުޅީފަޅު އަދި ތިލަފުށި ގުޅާލާނެ ބުރިޖެއްގެ މަސައްކަތް ފެށުމަށް 2020 ވަނަ އަހަރުގެ ބަޖެޓުގައި 411 މިލިއަން ރުފިޔާ ހިމެނިފައިވާނެ. މިހާރު މި މަޝްރޫޢު ކުރިއަށް ގެންދިއުމަށް ކުރަންޖެހޭ ދިރާސާތަކުގެ މަސައްކަތް ދަނީ ކުރެވެމުން" ފިނޭންސް މިނިސްޓަރ އިބްރާހީމް އަމީރެވެ.
މާލެ، ވިލިމާލެ، ތިލަފުށި އަދި ގުޅީފަޅު ބްރިޖަކުން ގުޅާލުމަށް އަޅާ ބްރިޖުގެ މަޝްރޫޢަކީ އަންނަ އަހަރުގެ ބަޖެޓުގައި ހިންގުމަށް ކަނޑައަޅާފައިވާ މަޝްރޫޢުތަކުގެ ތެރޭގައި ހިމެނޭ އެންމެ ބޮޑު އެއް މަޝްރޫޢެވެ. މި މަޝްރޫޢުއަށް 488 މިލިއަން ޑޮލަރު ނުވަތަ 7.5 ބިލިއަން ޑޮލަރު ޚަރަދުވާނެކަމަށް ސަރުކާރުން މީގެކުރިން ވަނީ ލަފާކޮށްފައެވެ. އަދި މިމަޝްރޫޢުގެ ސަބަބުން މާލޭ ސަރަހައްދުގެ ދަތުރުފަތުރު ފަސޭހަވެ، އިގްތިޞާދީ ގޮތުން ފައިދާތަކެއް ކުރާނެކަމަށްވެސް ސަރުކާރުން ވިދާޅުވެއެވެ.
މީގެއިތުރުން މާލެއާއި ގްރޭޓަރ މާލެ ރީޖަން ގުޅާލުމުން މިހާރު މާލޭގައި ހުރި ގުދަންތައް، އިންޑަސްޓްރިއަލް ސަރަހައްދަށް ބަދަލުކޮށް، މުދާ އުފުލުމުގައިވެސް ފަސޭހަތައް ލިބިގެންދާނެކަން ސަރުކާރުން ފާހަގަކުރެއެވެ.