3ވަނަ ޗައިނާ - ސައުތު އޭޝިޔާ އެކްސްޕޯ ހުޅުއްވާދެއްވާ ރައީސުލްޖުމްހޫރިއްޔާ އަބްދުﷲ ޔާމީން ވާހަކަފުޅުދައްކަވައިފިއެވެ.މި ފެއަރ ހުޅުއްވައިދެއްވުމުގެ ރަސްމިއްޔާތުގައި ރައީސުލްޖުމްހޫރިއްޔާ ވަނީ ރާއްޖެއާއި ޗައިނާގެ ގުޅުމުގެ މައްޗަށް އަލިއަޅުއްވާލައްވާ ވާހަކަފުޅުދައްކަވާފައެވެ.މިރަސްމިއްޔާތަށްފަހު ރައީސުލްޖުމްހޫރިއްޔާ އަބްދުﷲ ޔާމީންއާއި، ޗައިނާގެ ނާއިބު ރައީސް ލީ ޔުއާންޗާއޯއާ ވަނީ ރާއްޖޭގެ ސްޓޯލަށް ވަޑައިގެން، ރާއްޖޭގެ ވިޔަފާރިވެރިންނާއި ބައްދަލުކުރައްވާފައެވެ. އަރިހުގައި ޗައިނާގެ ޔުނާން ޕްރޮވިންސްގެ ގަވަރނަރއާއި އިސް އެހެން ބޭފުޅުންވެސް ބައިވެރިވެވަޑައިގެންފައިވެއެވެ.މިފަހަރުގެ ފެއަރގައި ރާއްޖޭގެ ސްޓޯލްގައި ގިނަ އަދަދެއްގެ ވިޔަފާރިވެރިން ބައިވެރިވަމުންދެއެވެ.މީގެ އިތުރުން ރައީސުލްޖުމްހޫރިއްޔާގެ މިދަތުރުފުޅުގައި ޔުނާން ޕްރޮވިންސްގެ ގަވަރނަރއާއި ބައްދަލުކުރެއްވުމަށް ވަނީ ހަމަޖެހިފައެވެ.ރައީސުލްޖުމްހޫރިއްޔާގެ މިދަތުރުފުޅުގައި، ރައީސުލްޖުމްހޫރިއްޔާގެ އޮފީހުގެ މިނިސްޓަރ މުޙަންމަދު ޙުސައިން ޝަރީފާއި، މިނިސްޓަރ އޮފް އިކޮނޮމިކް ޑިވެލޮޕްމަންޓް މުޙަންމަދު ސަޢީދުވެސް ބައިވެރިވެވަޑައިގަންނަވައެވެ. އަދި ރާއްޖޭގެ ވަރަށް ގިނަ ކުންފުނިތަކުގެ އިސްވެރިންވެސް މިދަތުރުފުޅުގައި ބައިވެރިވެވަޑައިގަންނަވައެވެ.