ރާއްޖޭގެ ފަތުރުވެރިކަމުގެ ތާރީޚުގައި ވެސް ކުރިއަށްގެންދިޔަ އެންމެ ބޮޑު ޕްރޮޖެކްޓް، ކްރޮސްރޯޑްސް މޯލްޑިވްސް ރަސްމީކޮށް އިފްތިތާޙުކޮށްފައިވާއިރު ކްރޮސްރޯޑްސްއަށް ޒިޔާރާތްކޮށް މިތަނުގެ ފުރިހަމަކަން ހަމަލޮލުން ބަލާލުމަކީ އާންމުންގެ ގިނަ ބަޔަކުވެސް ބޭނުންވާނެ ކަމެކެވެ.
އެހެންކަމުން އާންމުންނަށް މި ފުރުސަތު ހޯދުމަށްޓަކައި ކްރޮސްރޯޑްސް މޯލްޑިވްސްއިން މިހާރު ވަނީ އާންމު ފެރީގެ ޙިދުމަތްތައް ފެށުމަށް ތައްޔާރުވެފައެވެ.
ކްރޮސްރޯޑްސް މޯލްޑިވްސްއިން އާންމު ދަތުރުފަތުރު ކުރުމަށް ފެރީގެ ޚިދުމަތްތައް ހަމަޖައްސާފައިވަނީ 4 ސަރަޙައްދަކުންނެވެ. އެއީ މާލޭ ފެރީ ޓާރމިނަލްތަކުންނާއި ހުޅުމާލެ، ވެލާނާ އިންޓަރނޭޝަނަލް އެއަރޕޯޓް އަދި މާފުށިންނެވެ. މި ސަރަޙައްދުތަކުން ކޮންމެ 20 އަދި 25 މިނެޓަކުން ކްރޮސްރޯޑަށް ދަތުރުކުރާނެކަމަށް ކްރޮސްރޯޑްސް މޯލްޑިވްސްއިން ބުނެއެވެ.
ކްރޮސްރޯޑްސް މޯލްޑިވްސްގައި ނޫސްވެރިންނާއި ވާހަކަދައްކަވަމުން ކްރޮސްރޯޑްސްގެ ޗީފް އޮޕަރޭޝަނަލް އޮފިސަރ، ތީޓީ ތޮންގްބެންޖަމަސް ވިދާޅުވީ ކްރޮސްރޯޑްސްގައި އާންމު ފެރީގެ ޚިދުމަތް މިއަދުން ފެށިގެން ކުރިއަށްދާނެކަމަށެވެ. އެގޮތުން ކޮންމެ ދުވަހުވެސް ހެނދުނު 10 އަކުން ދަންވަރާއި ހަމައަށް ފެރީގެ ޚިދުމަތް ކުރިއަށްގެންދިއުމަށް ހަމަޖެހިފައިވާކަމަށް އޭނާ ވިދާޅުވިއެވެ. އަދި ފެރީގެ އަގުތައް ކްރޮސްރޯޑްސްގެ އެޕްލިކޭޝަނުން ފެންނަން ހުންނާނެކަމަށް ވެސް އޭނާ ފާހަގަކުރެއްވިއެވެ.
"ކްރޮސްރޯޑްސްގައި އާންމު ދަތުރުފަތުރު ވެސް އޮންނާނެ. ފެރީގެ ޚިދުމަތްތައް އާންމުންނަށް ވެސް ލިބޭނެ. މިމަހުގެތެރޭ އަޅުގަނޑުމެންގެ ފެރީ އޮންނާނެ ހެނދުނު 10 އަކުން ދަންވަރު 12 އަށް. އަންނަ މަހުން ފެށިގެން ދަތުރުތައް އޮންނާނެ ދަންވަރު އެކަކާއި ހަމައަށް. މާލެއިން ކްރޮސްރޯޑަށް ފެރީތައް ފުރާނީ މާލޭގެ ފެރީ ޓަރމިނަލްތަކުން. މީގެ އިތުރުން ހުޅުމާލެއިންނާއި އެއަރޕޯޓް އަދި މާފުށިން ވެސް ކްރޮސްރޯޑްއަށް ފެރީ ދަތުރު އޮންނާނެ." ތީޓީ ވިދާޅުވިއެވެ.
ކްރޮސްރޯޑްސް މޯލްޑިވްސްއަކީ 9 ރަށުގެ މައްޗަށް އެކުލެވޭ ބިޔަ ޕްރޮޖެކްޓެކެވެ. މުޅި މަޝްރޫޢުގެ މަސައްކަތް ދެ ފިޔަވައްސަކަށް ބަހާލައިގެން ކުރިއަށްގެންދާއިރު ފުރަތަމަ ފިޔަވަހީގެ މަސައްކަތް މިހާރު ވަނީ އެއްކޮށް ނިންމާލާފައެވެ.
ފުރަތަމަ ފިޔަވަހީގެ ތެރެގައި ދުނިޔޭގެ ނަން މަޝްހޫރު ހޮޓެލްސް ޗެއިން، ހިލްޓެން ކަލެކްޝަންގެ އެސް ހޮޓެލްސް އެންޑް ރިސޯޓްސްގެ ދަށުން ރާއްޖޭގައި ހުޅުވާ ފުރަތަމަ ރިސޯޓް، ސައި ލެގޫން މޯލްޑިވްސްއާއި، ނަން މަޝްހޫރު ހާޑް ރޮކް ހޮޓެލް އަދި ގިނަ ވަސީލަތްތަކެއް އެއްތަނަކުން ލިބިގެންދާ ގޮތަށް ތަރައްޤީކޮށްފައިވާ މެރީނާ ބޭ ހިމެނެއެވެ.
މެރީނާ ބޭ އެކުލެވިގެންވަނީ ބޭރުގެ މަޝްހޫރު ގިނަ ފެޝަން ބްރޭންޑްތަކާއި، ކެފޭ ރެސްޓޯރެންޓް ހިމެނޭގޮތަށެވެ. އެހެންކަމުން ކްރޮސްރޯޑްސްއަށް އާންމު ދަތުރުފަތުރު ފެށުމާއެކު އާންމުންނަށް މިތަންތަން ބަލާލާއި އަމިއްލަފުޅަށް ތަޖުރިބާކޮށްލުމުގެ ފުރުސަތު ލިބިގެންދާނެކަމަށް ކްރޮސްރޯޑްސް މޯލްޑިވްސްއިން ބުނެއެވެ.