މިހާރު ޢަމަލުކުރަމުންދާ ޤާނޫނު އަސާސީގެ ފެށުމަކީ ސިޔާސީ ޕަޓީއުފައްދަން ކުރި މަސައްކަތް ކަމުގައި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
2008ވަނަ އަހަރު އޭރުގެ ރައީސުލް ޖުމްހޫރިއްޔާ އަލްއުސްތާޛު މައުމޫން އަބްދުލް ޤައްޔޫމް ތަސްދީޤު ކުރެއްވި ޤާނޫނު އަސާސީއަށް މިއަދަށް ވަނީ 11 އަހަރުފުރިފައެވެ. ޤާނޫނު އަސާސީއަށް އެގާރަ އަހަރު ފުރުމާއި ގުޅިގެން މަޖިލީހުގައި ވާހަކަފުޅުދައްކަވަމުން ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވީ، ޤާނޫނު އަސާސީ އުފުދުމުގެ އަސްލަކީ ސިޔާސީ ޕަޓީއުފެއްދުމަށް މަދުބަޔަކު އޭރު ކުރި މަސައްކަތްކަމުގައެވެ.
އޭރު ޢަމަލުކުރަމުންދިޔަ ނޫ ޤާނޫނު އަސާސީގައި ސިޔާސީ ޕަޓީ އުފައްދަން ޖާގަނުދޭތީ އެޖާގަދޭގޮތަށް ޤާނޫނު އަސާސީއަށް ބަދަލުގެނައުމަށް ނިންމައި މިއަދު މިޢަމަލުކުރަމުންދާ ޤާނޫނު އަސާސީއަކީ ވަރަށް ގިނަބައެއްގެ މަސައްކަތުން ގެނެވިފައިވާ ޤާނޫނު އަސާސީއެއްކަމުގައި ރައީސް ނަޝީދު ވިދާޅުވިއެވެ. އަދި މި ޤާނޫނު އަސާސީއަކީ އޭރުގެ ރައްޔިތުންގެ ޚާއްސަ މަޖިލީހުގެވެސް ނުހަނުބޮޑު އެއްބާރުލަމަކާއިއެކު އެކުލަވާލެވިފައިވާ ޤާނޫނު އަސާސީއެއްކަމުގައި ރައީސް ނަޝީދު ފާހަގަކުރެއްވިއެވެ.
މިއަދު އަމަލުކުރަމުންދާ ޤާނޫނު އަސާސީ ތަސްދީޤް ކުރައްވާފައިވަނީ 7 އޮގަސްޓް 2008 ވަނަ ދުވަހުއެވެ. ޤާނޫނު އަސާސީ ތަސްދީޤްކުރައްވާފައިވަނީ ދަރުބާރުގޭގައި ބޭއްވުނު ބޮޑު ރަސްމިްޔާތެއްގައި އޭރުގެ ރައިސުލް ޖުމްހޫރިއްޔާ އަލްއުސްތާޛު މައުމޫން އަބްދުލް ޤައްޔޫމެވެ.