ފަތުރުވެރިކަމުގެ ބޭނުންތަކަށް ދޫކޮށްފައިވާ ތަންތަނުގެ ބޭނުމަށް ފަޅުތަކުން ވެލި ނެގުމަށް ހުއްދަދީފައިވާ އުސޫލު އުވާލުމަށް ޓްއަރިޒަމް މިނިސްޓްރީން ނިންމައިފިއެވެ.
މިދިޔަ ސަރުކާރުން 2017 ވަނަ އަހަރުގެ ޑިސެމްބަރ މަހު އުސޫލެއް އެކުލަވާލާ ރިސޯޓްތަކުގެ ބޭނުމަށް ފަޅުތަކުން ވެލި ނެގުމުގެ ހުއްދަ ވަނީ ދީފައެވެ. އެ އުސޫލްގައިވާ ގޮތުން ފަތުރުވެރިކަމުގެ ބޭނުންތަކަށް ދޫކޮށްފައިވާ ތަންތަނުގެ ގޮނޑުދޮށްތައް ޙިމާޔަތްކޮށް
ރައްކާތެރިކުރުމަށާއި، ވެލިން މުއްސަނދިކުރުމަށް އެރިޒޯޓުގެ އިޙްތިޞާސުން ބޭރުގައިވާ ފަޅުތަކުން ވެލި ނެގުމަށް ހުއްދަވަނީ ދީފައެވެ.
ޓްއަރިޒަމް މިނިސްޓްރީން ވިދާޅުވީ އެ އުސޫލުން އުވާލަން ނިންމީ ފަޅުތަކުގެ ތިމާވެއްޓަކީ ކަނޑުގެ ދިރުންތައް އާލާވުމަށް މުހިންމު މާޙައުލެއް ކަމުން ފަޅުތައް ހިމާޔަތްކުރުމުގެ ގޮތުން އަޅާ ފިޔަވަޅެއްގެ ގޮތުންކަމަށެވެ.
ފަތުރުވެރިކަމުގެ ދާއިރާގައި ހަރަކާތްތެރިވާ ބައެއް ފަރާތްތަކުން ތިމާވެއްޓާއި މެދު އިޙުމާލުވެ ދިވެހިރާއްޖޭގެ ޤާނޫނުތަކާއި ގަވާއިދުތަކާއި ޚިލާފަށް އަމަލުކުރަމުންދާ ކަމުގެ ޝަކުވާ ލިބެމުމުންދާކަމަށް ޓްއަރިޒަމް މިނިސްޓްރީގެ ބަޔާނުގައިވެއެވެ.
" މިކަމާއި ގުޅޭގޮތުން މިމިނިސްޓްރީއިން ވަނީ ފަތުރުވެރިން ބައިތިއްބާ އެންމެހައި ތަންތަނަށް ޤާނޫނު ތަކާއި ގަވާއިދުތަކާއި އެއްގޮތަށް ޢަމަލުކުރުމަށް އަންގައި 2019 އެޕްރީލް 16 އަދި މޭ 28 ގައި ސަރކިއުލަރ ފޮނުވާފަ. ނަމަވެސް، އަދިވެސް ބައެއް ފަރާތްތަކުން މިފަދަ ކަންކަމުގައި އިޙުމާލުވާތީ މިކަމާއި މެދު ފިޔަވަޅު އެޅުމަށް މިމިނިސްޓްރީއިން ވަނީ ނިންމާފަ" ޓްއަރިޒަމް މިނިސްޓްރީގެ ބަޔާނުގައިވެއެވެ.
ތިމާވެއްޓާއި ގުޅުންހުރި ކަންކަމަށް އިސްކަންދީގެން ޤައުމު ތަރައްޤީ ކުރުމަކީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ސަރުކާރުގެ މައިގަނޑު އެއް ފަލްސަފާ ކަމުގައި ވުމުން މިފަދަ ކަންކަމުގައި މިމިނިސްޓްރީން އަޅަންޖެހޭ އެންމެހައި ފިޔަވަޅުތައް އަޅާނެކަމުގެ ޔަޤީންކަން ދިވެހި ރައްޔިތުންނަށް ދޭކަމަށްވެސް ޓްއަރިޒަމް މިނިސްޓްރީގެ ބަޔާނުގައިވެއެވެ.
ކުރީގެ ރައީސް އަބްދުﷲ ޔާމީން އަބްދުލްގައްޔޫމުގެ ސަރުކާރުގެ ދުވަސްވަރުގައި އެކުލަވާލާފައިވާ އުސޫލުގައިވާ ގޮތުން ފަތުރުވެރިކަމުގެ ބޭނުންތަކަށް ދޫކޮށްފައިވާ ތަންތަނުގެ ގޮނޑުދޮށްތައް ޙިމާޔަތްކޮށް ރައްކާތެރިކުރުމަށާއި، ވެލިން މުއްސަނދިކުރުމަށް ވެލި ނެގިދާނެއެވެ. ވެލި ނަގާ ފަޅަކީ މީހުން ދިރިއުޅޭ ރަށްރަށާއި ދުރުގައި އޮންނަ ނުވަތަ ތަރައްޤީކުރާ ރިސޯޓްއަކާއި ދުރުގައި އޮންނަ ފަޅަކަށް ވާންޖެހެއެވެ. އަދި ނަގާ ކޮންމެ ކޮޑި މީޓަރެއްގެ ވެއްޔަށް ތިން ޑޮލަރު މޯލްޑިވްސް އިންލެންޑް ރެވެނިއު އޮތޯރިޓީ ދައްކަންޖެހެއެވެ.