ވައި ތަޣައްޔަރުވުމާ ދެކޮޅަށް މަސައްކަތްކުރާނެގޮތުގެ ޤައުމީ އެކްޝަން ޕްލޭނެއް އެކުލަވާލައިފި
ވައި ތަޣައްޔުވުމާއި ދެކޮޅަށް ޤައުމީ ފެންވަރުގައި މަސައްކަތްކުރާނެގޮތުގެ އެކްޝަން ޕްލޭނެއް މިހާރު އެކުލަވާލާފައިވާކަމަށާއި، މިމަހުގެ 11ވަނަ ދުވަހު އެ ޕްލޭން ރަސްމީކޮށް އިފްތިތާޙްކުރުމަށް ހަމަޖެހިފައިވާކަމަށް އެންވަޔަރަމަންޓް މިނިސްޓްރީން ވިދާޅުވެއްޖެއެވެ.
ޕީ.އެސް.އެމް ނިއުސްގެ ރާއްޖެމިއަދު ޕްރޮގްރާމުގައި ވާހަކަފުޅުދައްކަވަމުން އެންވަޔަރަމަންޓް މިނިސްޓްރީގެ ޑިރެކްޓަރ ޖެނެރަލް މުޙައްމަދު ޒާހިރު ވިދާޅުވީ، ވައި ނުސާފުވުން ނުވަތަ ތަޣައްޔަރުވުން އެއީ ދުނިޔޭގެ ގިނަ ޤައުމުތަކެކޭ އެއްފަދައިން ރާއްޖެއަށްވެސް މިހާރު ކުރިމަތިވެފައިވާ ބޮޑު މައްސަލައެއްކަމަށެވެ. ވަކިން ޚާއްސަކޮށް މާލޭ ސަރަޙައްދުގައި ވައި ތަޣައްޔަރުވުމުގެ މައްސަލަ ބޮޑުވެފައިވާއިރު، ރާއްޖޭގެ އާބާދީގެ ބޮޑުބައެއް ދިރިއުޅެމުންދަނީ މާލޭ ސަރަޙައްދުގައިކަމުން، މިއީ ޤައުމީ ފެންވަރުގައި ވިސްނަންޖެހިފައިވާ މައްސަލައެއްކަމަށް ޒާހިރު ވިދާޅުވިއެވެ.
ޒާހިރު ވިދާޅުވީ، އަޅުގަނޑުމެން ނޭވާލާން ބޭނުންކުރާ ވަޔަކީ މުޅިން ސާފުވައިކަމަށް މިހާރު ބެލެވެން ނެތްކަމަށާ، ފަހުގެ ދިރާސާތައް ދައްކާގޮތުން، އިންޖީނުލީ އުޅަނދުތައް ބޭނުންކުރާ ނިސްބަތް އިތުރުވުމާއި ކުނި އެންދުމާއި ހަކަތަ އުފެއްދުމަށް ތެޔޮ އެންދުމުގެ ސަބަބުން މި ސަރަޙައްދުގެ ވައި ކިލަނބުވާން ފަށާފައިވާކަމަށެވެ. އަދި މިއީ ތިމާވެށްޓާއި އިންސާނުންގެ ޞިއްޙަތާ ވަރަށް ބޮޑަށް ގުޅިލާމެހިފައިވާކަމެއްކަމުން، އެކަމާގުޅޭ ދިރާސާތައް ކަމާބެހޭ ފަރާތްތަކާ ގުޅިގެން ކުރެވި، އެދިރާސާތަކުގެ ހޯދުންތަކުގެ މައްޗަށް ބިނާކޮށް ޤައުމީ ފެންވަރުގައި އެކްޝަން ޕްލޭނެއް އެކުލަވާލާފައިވާކަމަށް ޒާހިރު ވިދާޅުވިއެވެ. މި ޕްލޭން ރަސްމީކޮށް އިފްތިތާޙްކުރުމަށް ހަމަޖެހިފައިވަނީ މިމަހުގެ 11ވަނަ ދުވަހުކަމަށްވެސް އޭނާ ވިދާޅުވިއެވެ.
"ރާއްޖެއަކީ ކުދިކުދި ރަށްތަކެއްގެ މައްޗަށް އެކުލެވޭ ޤައުމެއް. އެހެންވީމަ ކުޑަކުޑަ ތަންކޮޅެއްގެ ތެރޭގައި ވައި ނުސާފުވެގެންދިޔައިމަ ވަރަށް ބޮޑު މައްސަލައަކަށްވާނެ. ހަޤީޤަތުގައި މިއީ ތިމާވެށްޓާއި ޞިއްޙަތާއި ގުޅިލާމެހިފައިވާކަމެއް. މިހާރު އަޅުގަނޑުމެންގެ ދިރާސާތަކުން ފެންނަގޮތުގައި މާލެއަށް ބަލާލާއިރު، މާލޭގައި ނޭވާލާން މި ބޭނުންކުރާ ވައި ވަނީ ތަޣައްޔަރުވެފައި. ވަރަށް ބޮޑަށް. އެހެންވީމަ މިކަމާބެހޭގޮތުން އެކްޝަން ޕްލޭނެއް ޤައުމީ ފެންވަރުގައި މިވަނީ އެކުލަވާލެވިފައި." މުޙައްމަދު ޒާހިރު ވިދާޅުވިއެވެ.
ޒާހިރު ވިދާޅުވީ، މިއަހަރުގެ ދުނިޔޭގެ ތިމާވެށީގެ ދުވަސް ދިމާވަނީ ފިތުރު ޢީދު ބަންދާކަމުން، ތިމާވެށީގެ ދުވަހާ ގުޅުވައިގެން މިނިސްޓްރީން ހިންގުމަށް ހަމަޖެހިފައިވާ ހަރަކާތްތައް ފަސްކޮށްފައިވާކަމަށެވެ. އެގޮތުން ވައި ތަޣައްޔަރުވުމާދެކޮޅަށް މަސައްކަތްކުރާނެގޮތުގެ ޤައުމީ އެކްޝަން ޕްލޭން އިފްތިތާޙްކުރުމުގެ އިތުރުން، ދުވަހާ ގުޅޭ ޚާއްސަ ސެމިނާއަކާއި، އެގްޒިބިޝަނެއް ބޭއްވުމަށްވެސް ވަނީ ހަމަޖެހިފައެވެ. މީގެއިތުރުން "މާސްކް ޗެލެންޖް"ގެ ނަމުގައި މިމަހުގެ 3 ވަނަ ދުވަހުން ފެށިގެން ސޯޝަލް މީޑިއާގައިވެސް އަންނަނީ ޙާއްސަ ހަރަކާތެއް ހިންގަމުންނެވެ. މިއީ ވައި ތަޣައްޔަރުވުމާއި ގުޅޭގޮތުން އާއްމުން ހޭލުންތެރިކުރުވައި، އެކަން ހުއްޓުވުމުގައި ފަރުދީ ޒިންމާގެ މުހިއްމުކަން އަންގައިދިނުމުގެ މަޤްޞަދުގައި ހިންގާ ހަރަކާތެކެވެ.